Chi ẽbẽra ome Cristo ʉ̃rʉbena berreabadau
11
1 Mau maad̶akare ab̶auba bakuru ne chaabarii mʉʉmaa deaped̶a naka jarasii: «Dachi Akõre de mechiu bakuruba chaayase asii, maud̶e chi Dachi Akõre baita ne baa deabadaumare. Maud̶e chi aria Dachi Akõre biꞌia kʉ̃ria panuurã joma juasiise. 2 Maamina Dachi Akõre de mechiu mooba aude ad̶u kĩra b̶uu ekarebena drua chaarã́se, mau Dachi Akõred̶e ijãad̶akaurã deasiid̶eeba. Maarãba Dachi Akõre puuru Jerusalén poyaad̶ai 42 jed̶akod̶aa.a 3 Mau ewarid̶e mʉʉba ẽbẽra ome bʉi mʉ ʉ̃rʉbena dod̶aa berread̶amera. Maarã paru parrba jʉ̃d̶aped̶a 1.260 ewari Dachi Akõre baita berread̶ai».4 Chi nau iujãad̶ebena Mechiu daad̶e olivo bakuru ome topanuu maud̶e ʉ̃d̶aa koabarii ome topanuu. Mau chi ichi ʉ̃rʉbena dod̶aa berreabadau ome panuu jara b̶uu. 5 Ab̶auba maarã kachirua waui kʉ̃riaruubʉrã, ãchi okarrd̶ebena aokoi maud̶e maarã kĩramaabadaurã baakuai. Ara mau kĩra chi maarãmaa kachirua waud̶ai kʉ̃riaduu joma kenad̶ai. 6 Maarã ome ẽbẽra Dachi Akõre baita berreamaa panuud̶e, bajãa poyaa jʉ̃ad̶ai kui chebiamaaba. Maud̶e bania sid̶a poyaa oa babid̶ai, maud̶e ne kachirua didiwaraa poyaa neebid̶ai nau iujãa ãchi kʉ̃ria ãrid̶ai baita.
7 Maamina joma Dachi Akõre ʉ̃rʉbena berreaped̶aad̶akare mau ãnimara eakarr ed̶aa chob̶ead̶ebenab neeruuba ãchimaa orrai. Maarã poyaaped̶a kenai. 8 Chi biuped̶aad̶a chi Jerusalén puuru mechiud̶e jirata b̶ari panad̶ai. Mau puuru «Sodoma» maebʉrã «Egipto» abadau, aria ãchi Mechiu Jesús cruzd̶e jirab̶u beasid̶aud̶eeba. 9 Ẽbẽrarã didiwaraacha jomad̶ebena, bed̶ea didiwaraacha jomad̶ebena, puurucha maud̶e drua jomad̶ebenarãba mau biuped̶aad̶a aria jirata b̶ari b̶ee unud̶ai ewari õbea bad̶aped̶a maud̶e ãsad̶aac. Maarã biuped̶aad̶a ʉyaad̶ai ida kabid̶aabai. 10 Chi ẽbẽrarã nau iujãad̶ebena mau biuped̶aad̶a kakua kĩrajʉʉd̶ai. Kĩrajʉʉba ne kaebea bia ãchiba chiya bari dead̶akad̶ai, Dachi Akõre baita berreabadaurãba maarã ãrea biꞌiwãe panabiasid̶aud̶eeba. 11 Maamina ewari õbea ẽsa basiid̶e Dachi Akõreba ãchi chokae jiradubisii. Ãchi jiraduuduu unuped̶aad̶a ãrea perasid̶au. 12 Maabae chi Dachi Akõre baita berreabadaurãba bajãad̶e mimi jĩkua ũrisid̶au. Naka jarasii: «Namaa ʉtaa urústuru». Ara makʉd̶e chi kĩramaabadaurãba ichiamaa panuud̶e, ʉtaa jʉ̃rʉara tãed̶e bajãad̶aa wãsid̶au.
13 Maud̶e ioromia meserãa neesii. Mauba Jerusalén puurud̶e de ãrea korekuasii.d Siete mil ẽbẽrarã biusid̶au. Ara maud̶e chi chokae panuuba perad̶eeba chi bajãad̶ebena Dachi Akõremaa biꞌia nii a jarasid̶au.
14 Chi mawãarebena mia pera jarad̶a wãꞌãesii. Maamina chi kaad̶earebena mia jarad̶a kãꞌãabariwãed̶e neei.e
Kaad̶earebena kachu chaad̶a
15 Chi kaad̶earebena angelba ichi kachu chaasii.f Maud̶e bajãad̶e ãreaba jĩkua berreasid̶au. Naka jarasid̶au:
«Chi nau iujãad̶ebenarã reyrãba ãchi juad̶e naed̶e ua panaped̶aad̶a, Dachi Mechiu maud̶e ichi Cristo omeeba mau joma ãchi juad̶e ua paneesid̶au.
Id̶iiba waitaa jomaurã ichi juad̶e ua b̶uai».
16 Maud̶e chi 24 chõrarã mechiurã ãchi rey ãkaud̶e sĩu duanad̶a Dachi Akõre daad̶e õdarrd̶e kopaneesid̶au maabae Dachi Akõre biꞌia kʉ̃riasid̶au. 17 Naka jarasid̶au:
«Dai Akõre Mechiu chi Joma Poyaabarii, chi nibad̶a maud̶e chi nii.g
Bichíturu kid̶ibai a jara panuu bichi ãrea poyaabarii unubia b̶uud̶eeba maud̶e jomaurã bichi juad̶e ua b̶eesiid̶eeba.
18 Druachad̶ebena bichi ome kĩru kopaneesid̶au. Maamina chi bichi kastikai ewari neesii.h Jãabae bichiba chi biuped̶aad̶a jideai.
Maud̶e chi bichi baita berreabadaurã trajabadaurãmaa, bichi ẽbẽrarãmaa, joma chi bichi wapeabadaurãmaa, chi aude kaebeurãmaa maud̶e chi aude mechiurãmaa ne bia dead̶akai chi bia ãchiba wauped̶aad̶a kĩra.
Maamina chi nau iujãad̶e kachirua wauped̶aad̶a bichiba kastikakuai».
19 Maabae Dachi Akõre de mechiu bajãad̶e kub̶uu ewa wãsii. Aria chi Dachi Akõreba waubid̶a baúli kub̶uu mʉʉba unusii. Ara maud̶e bã puri chebi kob̶eesii, bã to kob̶eesii, maud̶e chi bã ãrea ʉrʉrʉa wã kob̶eesii. Nau iujãa uri kob̶eesii maud̶e hielo sid̶a kui kĩra ãrea che kob̶eesii.