Wẽra Juanba unud̶a
12
1 Bajãad̶e ne makai b̶uu ʉ̃rʉbena unusii. Mʉʉba wẽra ab̶a ʉmada paru kĩra jʉ̃ b̶uu unusii.a Mau jʉ̃rʉ jed̶ako ʉ̃rʉ tʉa kub̶uasii. Boro jũra pusterrea 12 waud̶a jʉ̃ b̶uasii. 2 Mau wẽra warr baraa b̶uasii. Chi warr anakʉd̶e tooruud̶eeba chi puaba b̶ia b̶uasii.3 Maabae maucha ne makai b̶uu ʉ̃rʉbena bajãad̶e unusii. Mʉʉba dragón mimichia puria nii unusii. Mau dragón boro 7 inibasii maud̶e kachu sid̶a 10 inibasii. Boro jũra borocha jʉ̃ b̶uasii. 4 Chi druu neapesiid̶e pusterrearã bajãad̶ebenarã beraa mita b̶aesid̶au nau iujãad̶e.b Mau dragón wẽra warr adaui baita b̶uumare b̶ari nub̶eesii chi warr adauruud̶e mii baita. 5 Ara maud̶e chi wẽraba warr adausii. (Mau warrba kĩra chuburiayuwãe joma nau iujãad̶ebenarãmaa ichid̶e ijãabia b̶uai).c Maamina mau dragonba mii naed̶e Dachi Akõreba mau warr ʉtaa adoesii ichi ãkaud̶e akʉ b̶uumaa. 6 Maabae chi wẽra drua sirua wãꞌãed̶aa miru wãsii. Dachi Akõreba aria joma maka wau b̶uasii 1.260 ewarid̶aa mau nu uru panad̶amera.
7 Mau maad̶akare chi ángel mechiu Miguel abadau maud̶e chi angelerã joma ichi baara duanuu, chi dragón chi ichi baara duanuu ome bajãad̶e chĩosid̶au. 8 Maamina chi dragonba maud̶e chi ichi baara duanuuba poyaad̶aabasii. Maud̶eeba chi maarã makaa poyaa bajãad̶e panad̶aabasii. 9 Ara maud̶e chi dragón mechiu maud̶e joma chi ichi baara duanuu nau iujãad̶aa jirakuasid̶au. Mau dragón chi nabẽraed̶ebena damabʉ. Chi mau trʉ̃ jʉbawãe nii maud̶e Satanás abadau.d Mauba joma nau iujãad̶ebenarã setaa kũrua ua b̶uu.
10 Maabae mʉʉba ab̶a bajãad̶e jĩkua berrearuu ũrisii. Naka jarasii:
«Id̶i Dachi Akõreba ichi ẽbẽrarã karibamaa b̶uu.
Id̶i ichi poyaabariiba jomaurã ichi juad̶e ua b̶uu.
Cristo chi karibabarii deai jarad̶aba joma poyaai.
Bajãad̶ebena iujãad̶aa chi dachi ãbarã jideabarii jiratasii.
Mauba ẽsabud̶e maud̶e ãyadaa Dachi Akõre daad̶e makabachii.
11 Dachi ãbarãba Oeja Kaebe Nii oa ched̶aba maud̶e ichi bed̶ea jara panuud̶eeba poyaasid̶au.
Dachi biud̶ai panuu ʉ̃rʉbena waped̶aabasii, bari Cristo kakua biud̶ayua panasii.
12 ¡Maud̶eeba joma chi bajãad̶e panuurã kĩrajʉ́sturu!
Maamina chi nau iujãad̶e maud̶e mard̶e panuurã sid̶a miichuburi panad̶ai, jʉbawãe nii machimaa neesiid̶eeba.
Mau miusia ãrea b̶uu, ãrea b̶uabai b̶uu kuitaa b̶uud̶eeba».
13 Chi dragonba ichi nau iujãad̶aa jiratad̶a kuitaasiid̶eeba, mau wẽra warr adaud̶a wãraasii kachirua wauyua. 14 Maamina Dachi Akõreba mau wẽramaa nejõo mechiu ikia ome deasii drua sirua wãꞌãed̶aa ũub̶ari wãmera. Dachi Akõreba aria joma wau uru b̶uasii año õbea y medio chi dragond̶ebena nu uru b̶uai baita. 15 Maud̶eeba chi dragonba ichi okarrd̶ebena bania id̶utasii do kĩra chi mau wẽra ũu adoemera. 16 Maamina ioroba mau wẽra karibasii. Chi ioro ewaped̶a maabae chi bania dragonba ichi okarrd̶ebena id̶u b̶uad̶a joma dosii. 17 Maud̶eeba chi dragón chi mau wẽra ome ãrea kĩru kob̶eesii. Ara makʉd̶e chi waabenarã chi mau wẽrad̶ebena imiped̶aad̶a ome chĩod̶e wãsii. Maarã imiped̶aad̶a chi Dachi Akõreba waubi b̶uu bed̶ea waubadaurãbʉ maud̶e chi Jesusba jaradead̶ad̶e ijãabadaurãbʉ.