Angelba karta kaebeu uru b̶uad̶a
10
1 Mau maad̶akare mʉʉba ángel ãrea poyaabarii ab̶a bajãad̶ebena jʉ̃rʉara tãed̶e uruu unusii. Ichi boro ʉ̃rʉ iuma jũra nub̶uasii. Ichi kĩedarr ʉmada kĩra urua b̶uasii. Ichi jʉ̃rʉ tʉbʉ aoko nub̶uu kĩra b̶uasii. 2 Ichi juad̶e karta kaebeu ewa uru b̶uasii. Ichi jʉ̃rʉ biarebena mard̶e tʉa ʉkʉ nub̶uasii. Jʉ̃rʉ sordoarebena iorod̶e tʉa ʉkʉ nub̶uasii. 3 Maabae ichi imama arraaruu kĩra jĩwa b̶iasii. Maka b̶iaruud̶e bã 7 b̶es tosii. 4 Bã 7 b̶es tosiid̶e mau bã tooruuba jarad̶a mʉʉba kartad̶e b̶ʉʉruu basii. Maamina bajãad̶e mʉʉba mimi ũrisii naka jaraaruu: «Bã 7 b̶es tosiiba jarad̶a chũpea uru b̶uase. Kartad̶e b̶ʉrã́se».5 Maabae chi ángel mʉʉba unud̶a jʉ̃rʉ ab̶a mard̶e tʉa akʉ nub̶uad̶a maud̶e jʉ̃rʉ ab̶a iorod̶e tʉa akʉ nub̶uad̶a ichi jua biarebena ʉtaa bajãad̶aa jirasii. 6 Maabae Dachi Akõre trʉ̃d̶eeba berreasii chi nau iujãad̶ebena, bajãad̶ebena, mard̶ebena joma waud̶a. Dachi Akõre ewaricha chokae nii trʉ̃d̶eeba naka jarasii: «Dachi Akõreba jarad̶a kãꞌãabariwãed̶e joma makai. 7 Ichi baita berreabadaurã, ichi baita bari trajabadaurãbʉ. Naed̶e Dachi Akõreba ãchimaa jara b̶uad̶a ichiba kaad̶eare unubiwẽa b̶uad̶a joma makai. Kaad̶ebena ángel ab̶aba chi kachu chaaruud̶e biawãra joma makai».
8 Maabae bajãad̶e chi mimi mʉʉba naed̶e ũrid̶aba waya mʉʉmaa naka jarasii: «ángel ab̶a ichi jʉ̃rʉ ab̶a mard̶e tʉa uru b̶uu maud̶e ab̶a iorod̶e tʉa uru b̶uuba karta kaebeu ichi juad̶e ewa uru b̶uu adaud̶e wãse».
9 Ara makʉd̶e chi angelmaa wãped̶a chi karta kaebeu id̶isii mʉʉmaa deamera. Chi mauba panausii: «Adause. Kotase. Bichi okarrd̶e nidurr kũab̶ari b̶aa kĩra kũaa b̶uai, maamina bichi b̶id̶e asia b̶uai».
10 Mau karta kaebeu chi ángel juad̶ebena adauped̶a kosii. Mʉ okarrd̶e nidurr kũab̶ari b̶aa kĩra kũaa b̶uasii maamina kosiid̶e mʉ b̶id̶e asia b̶uasii. 11 Maabae ichiba mʉʉmaa jarasii: «Bichi waya Dachi Akõred̶eeba berreai b̶uu puuru ãrea makai ʉ̃rʉbena, drua ãrea sakai ʉ̃rʉbena, berreabadaucha sakai ʉ̃rʉbena, maud̶e reyrã sakai ʉ̃rʉbena».