9
1 Mau maad̶akare june ab̶a angelba ichi kachu chaasii. Ara maud̶e mʉʉba pusterrea ab̶a nau iujãad̶e b̶aeruu unusii. Ab̶auba mau pusterreamaa llave ab̶a poraa eakarr ed̶aa chob̶ea ewabarii deasii. 2 Mau eakarr ed̶aa chob̶ead̶e poraa ewasiid̶e, chob̶ead̶ebena ʉtaa nari ãrea chesii mode baaruud̶e makabarii kĩra.a Mau nariba ʉmada paimaa ãrea kob̶eesii maud̶e chi bajãa sid̶a. 3 Maud̶e jãu narid̶ebena nau iujãad̶aa sisi mechiu ũub̶ari chesid̶au. Dachi Akõreba maarã sisirãmaa poyaabarii deasii ẽbẽrarã kaad̶amera, dosurĩba kaaruu kĩra. 4 Chi sisirãmaa jarasii siruarã maud̶e bakururã ãriraad̶amera. Bari ẽbẽrarãba ãchi daub̶ʉʉrʉd̶e Dachi Akõre selloswãe nuree kaabiasii. 5 Dachi Akõreba chi sisirãmaa ẽbẽrarã ida beabiaibasii, bari jed̶ako jua ab̶a pirabíturu deasii. Mau pira b̶uu dosurĩba kaad̶a kĩra pira b̶uai. 6 Mau ewarid̶e ẽbẽrarãba biud̶ai jʉrʉd̶ai. Biawãra biud̶ai kʉ̃ria panumina, biud̶aabai.7 Mau sisi mura kokoroaba chĩod̶e adoebarii kĩra nureasii. Ãchi borod̶e boro jũra ab̶a nee waud̶a kĩra b̶uu jʉ̃ panasii. Ẽbẽra kĩedarr kĩra nibasid̶au. 8 Ãchi bud̶a wẽra bud̶a kĩra panasii. Ãchi kid̶a imama kid̶a kĩra panasii. 9 Ãchi kakuad̶e chaarea b̶uu jʉ̃barii jiorr waud̶a jʉ̃ panasii. Ãchi ikia mura ãrearã piraaduud̶e ãchi karreta baara chĩod̶e wãaduu kĩra chirĩderrea panasii. 10 Ãchi druu dosurĩ druu kĩra misua panasii. Maarãba ẽbẽrarã ãchi druuba jed̶ako jua ab̶a poyaa puꞌua pirabiad̶ai panasii. 11 Chi maarã sisi rey chi eakarr ed̶aa chob̶ead̶ebena angelbʉ. Ichi trʉ̃ hebreo bed̶ead̶e Abadón abadau maud̶e griego bed̶ead̶e Apolión.b
12 Chi nabena mia pera jarad̶a wãꞌãesii, maamina wabid̶a ome panuu.c
13 Mau maad̶akare june ab̶a angelba ichi kachu chaasii. Maud̶e chi Dachi Akõre daad̶e kera baa deabadau nee waud̶a kachu kimare panuumareeba mʉʉba ab̶a berreamaa b̶uu ũrisii. 14 Chi berrea b̶uuba chi ángel chi kachu chaad̶amaa naka jarasii: «Chi kimare angelerã do Éufrates mechiu abadaumare jʉ̃ panuu enatase». 15 Ara makʉd̶e ichiba maarã kimare enakuasii nau iujãad̶ebena ẽbẽrarã beraa mita bead̶amera.d Dachi Akõreba maarã uru b̶uasii maka bead̶amera ara mau añod̶e, ara mau jed̶ako ab̶ad̶e, maud̶e ara mau ewarid̶e bid̶a. 16 Maud̶e mʉʉba ũrisii ab̶auba jaramaa b̶uasii sãabe kokoroa nuree murad̶e ataubadau eneemaa panuu. Dosientos millones eneemaa panuu asii.
17 Chi murarã mʉ daumaa unubid̶a naka nureasii: ãchi boro imama boro kĩra nureasii. Ãchi okarrd̶ebena tʉbʉchia, maud̶e nari aokokobadau panasii. Mau kakuad̶e chaarea b̶uu puria aoko b̶uu kĩra b̶uasii, zafiro mo pãwaraa kĩra b̶uasii maud̶e azufre mo kĩra kuaraa b̶uasii.e 18 Chi mura okarrd̶ebena aokooruuba, nariba maud̶e azufre chi cheeruu bid̶a beraa mita chi nau iujãad̶ebena ẽbẽrarã kenasii. 19 Mau murarã poyaa ãchi okarrd̶e maud̶e ãchi drud̶e b̶uasii. Ãchi druu dama kĩra panasii. Ãchi druu boro bara nureeba ẽbẽrarã kaad̶aped̶a maabae beabachid̶au.
20 Maka b̶uukaud̶e chi ẽbẽrarã mauba biud̶aabad̶aba wabid̶a chi kachirua waud̶ayu maud̶e jai kachiruarã ijãad̶ai ida b̶ud̶aabasii. Dachi Akõre kĩra nuree juaba kaped̶aad̶arã ida b̶ud̶aabasii: chi nee waud̶a, parata waud̶a, bronce waud̶a, mo waud̶a maud̶e bakuru erad̶a ida b̶ud̶aabasii. Maarã unud̶akau, ũrid̶akau, maud̶e nibad̶akau. 21 Maud̶e mia beabadau, waabenarã ẽpermabadau, dachi kakuaba barikiu kachirua waubadau maud̶e chiruabadau ida b̶ud̶aabasii.