Chi kaad̶eare chi wãa kub̶uu oetad̶a ʉ̃rʉbena
8
1 Oeja Kaebe Niiba chi kaad̶earebena chi wãa kub̶uu oetasiid̶e, bajãa ãrea chũpea nub̶uad̶ausii.a 2 Mau maad̶akare mʉʉba 7 angelerã Dachi Akõre daad̶e akʉ topanuu unusii. Maarãmaa kachu 7 deasii. 3 Maabae ángel june neeped̶a Dachi Akõre baita kera baabadaumare akʉ nub̶eesii. Mau Dachi Akõre baita kera baabadau nee waud̶a chi rey ãkau kĩraare nub̶uu. Chi angelba ichi juad̶e paratu nee waud̶a uru b̶uasii kera baai baita. Ab̶aba ichimaa kera ãrea deasii Dachi Akõre baita baamera ẽbẽrarã Dachi Akõred̶erã ʉtaa id̶imaa panuumisa. Ara makʉd̶e ichiba chi kera baasii chi kera baa deabadau ʉ̃rʉ. 4 Chi ẽbẽrarã Dachi Akõred̶erãba ʉtaa id̶iped̶aad̶a mau angelba kera baad̶a nari baara ãbua chi Dachi Akõremaa ʉtaa piumaa wãsii. 5 Maabae chi angelba kera baa deabadaud̶ebena tʉbʉ kĩra adauped̶a, chi paratu waabirubisii. Mau tʉbʉ kĩra nau iujãad̶aa jiratasii. Mauba bã tosii, ʉrʉrʉa wã kob̶eesii, bajãa puri chebi kob̶eesii maud̶e nau iujãa sid̶a uri kob̶eesii.Angelerãba kachu chaaped̶aad̶a
6 Maabae chi 10 angelerãba kachu 7 chaad̶ai baita kopaneesid̶au.
7 Ab̶auba ichi kachu chaasii. Ara makʉd̶e bajãad̶ebena nau iujãad̶e hielo kui kĩra b̶aesid̶au. Maud̶e nau iujãad̶e tʉbʉchia oa baara b̶aesid̶au. Mauba nau iujãa jomad̶ebena beraa mita baawãsii maud̶e bakururã sid̶a.b Mama chi siruarã joma baawãsii.
8 Mau maad̶akare june ab̶a angelba ichi kachu chaasii. Ara makʉd̶e ab̶auba ea kĩra urua aoko b̶uu mard̶e jiratasii. Mauba beraa mita chi mar oa ba nub̶eesii. 9 Chi oa ba nub̶ee b̶uad̶amare ãnimararã mard̶ebena beraa mita kinisid̶au maud̶e jãba aria duanad̶a beraa mita teakuasii.
10 Mau maad̶akare june ab̶a angelba ichi kachu chaasii. Ara makʉd̶e bajãad̶ebena pusterrea mechiu ab̶a tʉbʉchiaba bʉra b̶uu b̶aesii. Beraa mita doorã ẽsad̶e b̶aesii maud̶e bania bumadru b̶uud̶e. 11 Mau pusterrea “Asia Nii” abadau. Chi mau b̶aed̶amare bania beraa mita asia nub̶eesii. Mau baniaba ẽbẽrarã ãrea kinisad̶au.
12 Mau maad̶akare june ab̶a angelba ichi kachu chaasii. Ara makʉd̶e beraa mita jed̶ako pãriusii maud̶e ʉmada. Maud̶e beraa mita pusterrearã sid̶a pãriusii. Maud̶eeba beraa mita ewari ab̶a pãriu nub̶eesii. Maud̶e ẽsabud̶e bid̶a beraa mita chi jed̶ako maud̶e pusterrearã sid̶a pãriu nub̶eesii.
13 Mʉʉba ʉtaa ichiasiid̶e ũrisii nejõo ab̶a ʉtʉ ũub̶ari kãriiba naka jara kãrii:c «¡Mia pera! ¡Mia pera! ¡Mia pera! Ẽbẽrarã nau iujãad̶ebena kĩra chuburiad̶ai chi waabena angelerãba ãchi kachu chaaduud̶e!»