Chi daub̶ʉʉrʉmaa sello wãabarii waud̶a
7
1 Mau maad̶akare mʉʉba ángel kimare unusii. Maarã nau iujãad̶e õkid̶ucha akʉ topanasid̶au. Maarãba pũatu mamareecha pũayu ida kabid̶aabasii nau iujãad̶e, mard̶e, maud̶e bakurumaa bid̶a. 2 Dachi Akõreba ãchimaa poyaabarii dea b̶uasii chi iujãa maud̶e mar ãrid̶amera. Maka b̶uud̶e mʉʉba ángel maucha ʉmada urubariare uruu unusii. Mauba Dachi Akõre chokae niid̶e sello wãabarii uru b̶uasii. Mauba naka jarakuasii chi kimare angelerãmaa: 3 «Nau iujãa, mar maud̶e bakururã ãrirã́sturu, ab̶a daiba Dachi Akõre seña chi ichi baita bari trajabadaurã daub̶ʉʉrʉd̶e joma wauduud̶aa».4 Maud̶e mʉʉba ũrisii Dachi Akõre sello uru panuu sãabe panuu: 144.000 basii. Maarã joma Israeld̶ebena imiped̶aad̶arã basii. 5 Judad̶ebena imiped̶aad̶arã 12.000 basii. Rubend̶ebena imiped̶aad̶arã 12.000 basii. Gadd̶ebena imiped̶aad̶arã 12.000 basii. 6 Ased̶ebena imiped̶aad̶arã 12.000 basii. Neftalid̶ebena imiped̶aad̶arã 12.000 basii. Manasesd̶ebena imiped̶aad̶arã 12.000 basii. 7 Simond̶ebena imiped̶aad̶arã 12.000 basii. Levid̶ebena imiped̶aad̶arã 12.000 basii. Isacard̶ebena imiped̶aad̶a 12.000 basii. 8 Zabulond̶ebena imiped̶aad̶arã 12.000 basii. Josed̶ebena imiped̶aad̶arã 12.000 basii. Maud̶e Benjamind̶ebena imiped̶aad̶arã 12.000 basii.
Ẽbẽrarã ãrea Dachi Akõre daad̶e nuree
9 Mau maad̶akare Dachi Akõreba waya mʉʉmaa ẽbẽrarã ãrea unubisii. Ab̶au bid̶a maarã poyaa juasiibasii. Druachad̶ebena, puuruchad̶ebena ẽbẽrarã didiwaraacha jomad̶ebena maud̶e bed̶ea didiwaraacha jomad̶ebena chi nuree ab̶aab̶aa duanasii. Joma paru torroa jʉ̃ duanasii maud̶e kĩrajʉʉ duanasiid̶eeba ãchi juad̶e meme kiruu uru panasid̶au. Dachi Akõre rey ãkau daad̶e maud̶e chi Oeja Kaebe Nii daad̶e b̶ari topanasid̶au. 10 Maud̶e joma naka kĩrud̶eeba jarasid̶au: «¡Dai Akõre nau rey ãkaud̶e akʉ b̶uu maud̶e chi Oeja Kaebe nii baarauba dai karibasid̶au!»
11 Maud̶e chi kimare chokae nuree panuurãba maud̶e chi 24 chõrarã chi rey ãkau kaita duanasid̶au. Joma chi angelerã chi maarã ad̶u jũra b̶ari topanasid̶au. Maud̶e chi joma angelerã õdarrd̶e kopaneesid̶au maud̶e chi rey ãkau daad̶e daub̶ʉʉrʉ jaab̶arid̶aped̶a maabae Dachi Akõre biꞌia kʉ̃riasid̶au. 12 Naka jarasid̶au:
«¡Machiba jara panuu biawãrabʉ!a Ewaricha jomaurãba Dachi Akõremaa biꞌia berread̶ai panuu, ichi chi aude mechiu niid̶eeba,
chi aude kuitaa niid̶eeba, ne jomad̶e poyaabariid̶eeba maud̶e meserãa ãrea niid̶eeba.
Ichimaa ichíturu kid̶ibai ad̶ai panuu maud̶e chi biawãra b̶uu ad̶ai panuu. ¡Biawãra biꞌia b̶uu maka b̶uai!» b
13 Maabae chi 24 chõrarãd̶ebena ab̶aba mʉʉmaa naka id̶isii:
—¿Bichiba kuitaa b̶uka jãarã chi paru torroa jʉ̃ panuu kai maud̶e samareeba neesid̶au?
14 Mʉʉba panausii:
—Bichiaburu kuitaa b̶uu.
Maabae ichiba jarasii:
—Naarã ẽbẽrarã́turu karibasid̶au chi kaad̶ebena ãrea biꞌiwãe panabiai ewari. Maarã chi Oeja Kaebe Nii oaba ãchi paru torroa jeraasid̶au. 15 Maud̶eeba maarã Dachi Akõre rey ãkau jãkaa duanuu. Ichi ded̶e ãyadaa maud̶e ẽsabud̶e ichi baita ne wau panuu. Maud̶e chi ãkaud̶e akʉ b̶uu maarã baara b̶uai.c 16 Maarã makaa jarbisiad̶aabai maud̶e waya obisia sid̶a uru panad̶aabai. Ʉmadaba makaa baakuabai maud̶e pisia bid̶a makaa joebai. 17 Chi Oeja Kaebe Nii rey ãkaud̶e akʉ b̶uuba maarã nu b̶uai. Maarã uad̶oi chi chokae nibabiabarii iorod̶e bania bumadru b̶uumaa dod̶amera. Mau ewarid̶e Dachi Akõreba ãchi dau b̶aa joma jarekuai.