Chi kartamaa wãa kub̶uu oetad̶a
6
1 Maabae mʉʉba unusii chi Oeja Kaebe Niiba chi kartamaabena wãa kub̶uu ab̶a oetasii. Maka b̶uud̶e chi kimare chokae nureed̶ebena ab̶auba naka jaraaruu ũrisii: «¡Neese!»a Chi mimi bã kĩra jĩwa b̶uasii. 2 Araa ichiasiid̶e, mura torroa nii unusii. Chi mau mura ʉ̃rʉ akʉ b̶uasiiba ichi juad̶e enadrʉma uru b̶uasii: Ab̶auba ichimaa borod̶e jũra jʉ̃barii ab̶a deasii. Ara makʉd̶e chi nuree poekuaped̶a maabae maucha poekuad̶e wãsii.3 Mau maad̶akare chi Oeja Kaebe Niiba chi wãa kub̶uu maucha oetasiid̶e mʉʉba ũrisii chi chokae nureed̶ebena ab̶aba naka jaraaruu: «¡Neese!». 4 Maud̶e mura puria nii awara neesii. Ab̶auba chi mau mura ʉ̃rʉ akʉ b̶uumaa espada ab̶a deasii. Dachi Akõreba maumaa ẽbẽrarã chi nau iujãad̶e nebʉraswãe duanuumaa kachirua wauyu ida b̶usii chĩod̶aped̶a chiya bead̶amera.
5 Mau maad̶akare chi Oeja Kaebe Niiba chi wãa kub̶uu maucha oetasiid̶e mʉʉba ũrisii chi chokae nureed̶ebena ab̶aba naka jaraaruu: «¡Neese!». Araa ichiasiid̶e mʉʉba mura parrba nii unusii. Chi mau mura ʉ̃rʉ akʉ b̶uuba ichi juad̶e chikʉa chaabarii uru b̶uasii. 6 Maka b̶uud̶e mʉʉba chi kimare chokae nuree panuu tãed̶e ab̶a berrearuu ũrisii. Mauba naka jarasii chi mura ʉ̃rʉ akʉ b̶uumaa: «Chi trigo ãrisii. Maka ẽbẽra ab̶a ewari ab̶a trajai, trigo libra ome nedoi baita. Maud̶e chi cebada sid̶a ãrisii. Maka ẽbẽra ab̶a ewari ab̶a trajai cebada 6 nedoi baita. Maamina olivo jõ maud̶e uva jõ ida biꞌia chaubise drabirua maud̶e uva b̶aa baraamera».
7 Mau maad̶akare chi Oeja Kaebe Niiba chi wãa kub̶uu maucha oetasiid̶e mʉʉba ũrisii chi chokae nureed̶ebena ab̶aba naka jaraaruu: «¡Neese!» 8 Araa ichiasiid̶e mʉʉba mura kukuaraa nii unusii. Chi mau mura ʉ̃rʉ akʉ b̶uu trʉ̃ «Biud̶a» abadau. Chi ichi ome nibabarii chi trʉ̃ «Biud̶arã Panabadau» abadau. Joma nau iujãad̶e ẽbẽra kimared̶ebena ab̶a Dachi Akõreba maarãmaa ida beabisii. Maarã ẽbẽrarã beasid̶au chĩoduuba, jarrbaba, dachi kakua kachirua paneebibadauba maud̶e ãnimara kachirua nureeba.
9 Mau maad̶akare Oeja Kaebe Niiba chi wãa kub̶uu maucha oetasiid̶e mʉʉba unusii chi Dachi Akõre bed̶ea jaradea panuu kakua beaped̶aad̶a jaurirã. Maarã bajãad̶e chi ãnimara baa deabadau jãkaa panasid̶au. 10 Kĩrud̶eeba naka berreasid̶au: «Jomaurã Mechiu, bichi ãrea bia nii maud̶e biawãra berreabarii. ¿Bichiba sakaed̶e chi jãu iujãad̶ebenarã dai beaped̶aad̶a kakua kastikakuaima?» 11 Dachi Akõreba ãchi ab̶aab̶aa paru torr dead̶akasii jʉ̃d̶amera. Maabae naka jarasii: «Apii esed̶au panad̶áusturu joma chi ẽbẽrarã beaduud̶aa joma bichi ãbarã Cristoba pekuad̶a machi beaped̶aad̶a kĩra».
12 Mau maad̶akare mʉʉba unusii chi Oeja Kaebe Niiba chi wãa kub̶uu maucha oetaaruu. Maud̶e ioromia ãrea urisii. Ʉmada pãriusii paru parr ab̶a biud̶akare jʉ̃badau kĩra. Jed̶ako joma oa kĩra puria kob̶eesii. 13 Ãrea pũatuuruud̶e higo jõo pãaraa b̶aebadau kĩra chi bajãad̶ebena pusterrearã iujãad̶e b̶aesid̶au. 14 Bajãa wãꞌãesii karta araa bʉrabarii kĩra. Joma earã maud̶e islarã sid̶a chi naed̶e kub̶uad̶amare wãꞌãesii. 15 Maud̶e chi nau iujãad̶ebena rey mechiurã, chi gobernadorã, chi kokoroarã mechiurã, chi nejarra barau nuree, chi meserãa nuree, chibari baita bari trajabadaurã maud̶e chibariswãe nuree ea chob̶ead̶e maud̶e ead̶e mo kob̶ead̶amare mirusid̶au. 16 Maarãba naka jarasid̶au: «¡Ea, mo, dai ʉ̃rʉ b̶áesturu. Dai mirubiásturu chi rey ãkaud̶e akʉ b̶uuba dai unurãamera maud̶e chi Oeja Kaebe Niiba kastikarãamera. 17 Chi ichiba kastikai ewari mechiu neesii. ¿Kaiba mau ome dauchia jãadua b̶uaima?»