Oeja kaebeu Juanba unud̶a
5
1 Maud̶e mʉʉba unusii chi rey ãkaud̶e akʉ b̶uu ichi juad̶e karta bʉra uru b̶uasii. Chi kartad̶e muriacha ne b̶ʉ kub̶uasii. Chi karta kub̶uumaa 7 jʉrrʉba wãa kub̶uasii ab̶au bid̶a ewarãamera. 2 Maud̶e mʉʉba ángel ab̶a poyaabarii unusii. Mauba jĩkua berrearuuba id̶isii: «Kai biꞌia b̶uma chi kartamaa wãa kub̶uu oetaped̶a ewai baita?» 3 Maamina mau karta ewaped̶a ed̶a jarai baita ab̶a bid̶a chi bia wãꞌãe basii. Bajãad̶e, nau iujãad̶e maud̶e biuped̶aad̶a duanaabadaumarebena sid̶a wãꞌãe basii.a 4 Maud̶e mʉ ãrea jẽa kob̶eesii ẽbẽra bia ab̶a bid̶a wãꞌãe basiid̶eeba mau karta ewaped̶a ed̶a jaramera. 5 Maamina ab̶a chi 24 chõrarãd̶ebenaba mʉʉmaa naka jarasii: «Jẽarã́se. Ichiáse, Davidd̶ebena ab̶a need̶abʉ. Mau Judad̶ebena need̶a Imama abadauba Dachi Akõre kʉ̃riad̶akaurã poyaasii. Maud̶eeba chi nau kartad̶e 7 wãa nub̶uu poyaa oetaped̶a ewai b̶uu».6 Maud̶e Dachi Akõred̶e rey ãkau kaita, kimare chokae nuree kaita maud̶e 24 chõrarã mechiurã tãed̶e oeja kaebeu ab̶a akʉ nub̶uu unusii. Mau chi bea panad̶a kĩra nibasii. Kachu 7 bara nibasii. Maud̶e 7 dau bara nibasii. Mau dau jara b̶uu chi 7 jauri Dachi Akõre daad̶e panuu. Dachi Akõreba nau iujãa jomad̶e maarã bʉikasii. 7 Maud̶e mau oeja kaebeu chi rey ãkaud̶e akʉ b̶uumaa wãped̶a chi karta mau jua biare uru b̶uad̶a adausii. 8 Mau karta adausiid̶e chi kimare chokae nuree maud̶e chi 24 chõrarã sid̶a ichi daad̶e õdarrd̶e kopaneesid̶au. Ãchi ab̶aab̶aa arpa maud̶e sãu nee waud̶a uru panasid̶au. Chi sãu incienso keraba waabiru uru panasii. Chi kera incienso jara b̶uu ẽbẽrarã Dachi Akõred̶erãba chi ichimaa ʉtaa id̶ibadau. 9 Chi 24 chõrarã maud̶e chi kimare chokae nureerãba nau kari wid̶i karisid̶au:
«Bichíturu biꞌia nii, mau karta adauped̶a, chi wãa kob̶ee oekuai baita, bichi beasid̶aud̶eeba.
Bichi oa chesiiba ẽbẽrarã nedokuasii Dachi Akõre baita.
Ẽbẽrarã didiwaraacha jomad̶ebena, bed̶ea didiwaraacha jomad̶ebena, puurucha maud̶e drua jomad̶ebena chi nuree nedosii.
10 Bichiba maarã duanusii Dachi Akõred̶e paarerã bad̶amera.
Maud̶e nau iujãad̶e ichi baara chi karrarã bad̶ai».
11 Maka b̶uud̶e mʉʉba angelerã karimaa panuu unusii. Maarã ãrea basiid̶eeba mʉʉba poyaa juasiibasii.b Maarãba Dachi Akõre chi rey ãkau, chi chokae duanuurã, maud̶e chi 24 chõrarã ad̶u jũra duanasid̶au. 12 Naka jĩwa kari panasid̶au:
«¡Chi oeja kaebeu beaped̶aad̶a ãrea biꞌia nii!
Jomaurãba mau biꞌia kʉ̃riad̶ai panuu ne joma poyaabariid̶eeba, ne joma uru b̶uud̶eeba, joma kuitaa b̶uud̶eeba maud̶e ãrea poyaabariid̶eeba.
Ichi chi aude mechiu nii ad̶ai panuu maud̶e chi aude bia nii ad̶ai panuu».
13 Maud̶e mʉʉba ũrisii chi joma Dachi Akõreba waukuad̶a chi bajãad̶e duanuu, chi nau iujãad̶e duanuu, chi biuped̶aad̶a maud̶e mard̶e duanuu bid̶a naka kari panasid̶au:c
«Jomaurãba chi rey ãkaud̶e akʉ b̶uu maud̶e chi oeja kaebeu ewaricha biꞌia kʉ̃riad̶ai panuu.
Aude mechiu nii a jarad̶ai panuu, aude mipitaa nii a jarad̶ai panuu maud̶e bibuara b̶uu ichi juad̶e uru b̶uai a jarad̶ai panuu».
14 Maabae chi kimare chokae nureeba naka jarasid̶au: «Bibuara b̶uu maka b̶uai». Ara makʉd̶e chi 24 chõrarã õdarrd̶e kopaneed̶aped̶a chi ewaricha chokae nii biꞌia kʉ̃riasid̶au.d