Bajãad̶ebenarãba Dachi Akõre ãrea kʉ̃riaped̶aad̶a
4
1 Mau maad̶akare Dachi Akõreba mʉʉmaa unubisii poraa ab̶a bajãad̶e ewa nub̶uu. Ara maud̶e chi naed̶e mimi kachu chaaruu kĩra ũri b̶uad̶aba jarasii: «Nama ʉtʉ uruse. Mʉʉba unubii chi jãad̶akare makai b̶uu ewari».2 Ara makʉd̶e Dachi Akõre Jauri mʉʉd̶e need̶aba chi rey ãkau bajãad̶e unubisii. Mau ʉ̃rʉ ab̶a akʉ b̶uasii. 3 Chi mau ãkaud̶e akʉ b̶uu ted̶echoasii mokara jaspe maud̶e coralina ted̶echoabadau kĩra. Mau ãkau ad̶u iuma jũra b̶uasii. Chi iuma mokara esmeralda kĩra ted̶echoa b̶uasii. 4 Maud̶e 24 rey ãkau panuu chi rey ãkau ad̶u jũra panasii. Mau ʉ̃rʉ 24 chõrarã mechiu akʉ duanasii. Ãchi paru torroa b̶uasii. Maud̶e boro jũra nee waud̶a jʉ̃ panasii. 5 Ara maud̶e chi rey ãkau bajãad̶e b̶uud̶ebena bã puri chebi b̶uasii, ʉrʉrʉa b̶uasii, maud̶e bã ãrea to b̶uasii. Mau rey ãkau daad̶e 7 lámpara koa topanasii. Mau lámpara chi 7 jauri Dachi Akõred̶ebʉ. 6 Mau rey ãkau kĩraare mar biirio kĩra dod̶aa nub̶uasii.
Mau rey ãkau jua biare, jua sordoare, kaad̶e, maud̶e kĩraare kimare chokae nuree panasii. Maarã dau ãrea uru panasii, pechud̶e maud̶e akarrare. 7 Ab̶a imama kĩra nibasii. Ab̶a paka kĩra nibasii. Ab̶a ẽbẽra kĩedarr kĩra nibasii. Maud̶e ab̶a nejõo ũub̶ari nii kĩra nibasii. 8 Maarã chokae nuree ab̶aab̶aa ikia 6 uru nureasii. Ãchi kakuad̶e dau ãrea bara nureasii. Maud̶e ãchi ikia ekare bid̶a dau ãrea basii. Ãyadaa, maud̶e ẽsabud̶e maarãba ida b̶ud̶ayuwãe nau jarabachid̶au:
«Ãrea biꞌia nii, ãrea biꞌia nii, ãrea biꞌia nii Dachi Mechiu, Dachi Akõre, chi Joma Poyaabarii.
Mau chi nibad̶abʉ, chi niibʉ maud̶e chi neei baita b̶uubʉ».
9-10 Chi Dachi Akõre ewaricha chokae nii ichi rey ãkaud̶e akʉ b̶uu. Ara maud̶e chi chokae nureeba jara panuu ichi mipitaa nii, ichimaa biꞌia jara panuu, maud̶e ichíturu kid̶ibai a panuu. Mau jaraaduucha chi 24 mechiu chõrarã Dachi Akõre ewaricha chokae nii daad̶e õdarrd̶e kopaneed̶aped̶a ãrea kʉ̃riabadau. Ãchi boro jũra jʉ̃badau chi rey ãkau jãkaa duanud̶aped̶a naka jarabadau:
11 Dachi Mechiu, Dachi Akõrebʉ, bichi biꞌia nii jomaurãba jarad̶amera bichi mipitaa nii, bichi wapead̶amera, maud̶e joma poyaabarii.
Biꞌia b̶uu jomaurãba mau jarad̶ai, bichiba ne joma wausiid̶eeba.
Biawãra bichiba kʉ̃riasiid̶eeba, ne joma wausii maud̶e joma bichid̶eeba nuree.