Cristoba ãbarã Sardis puurud̶ebena baita b̶ʉbid̶a
3
1 »Chi Sardis puurud̶ebena ijãabadaurã nubarii ángel baita kartad̶e naka b̶ʉse:»Chi Dachi Akõre daad̶e 7 jauri uru b̶uubaa maud̶e 7 pusterrea uru b̶uuba naka jara b̶uu:
»Machiba wau panuu mʉʉba kuitaa b̶uu. Ẽbẽrarãba jara panuu machiba Dachi Akõre ãrea ijãa panuud̶eeba chokae nuree. Maamina biawãra ara machiba Dachi Akõred̶e ijãad̶awẽa panuud̶eeba chi biud̶arãbʉ. 2 ¡Kauwa ichiásturu! Mʉʉba unu b̶uu machiba wau panuu Dachi Akõre daad̶e jipawãe b̶uu. Maud̶e chi naed̶e biꞌia wau panad̶a machiba beraa ida b̶uumaa panuu. Maamina mau waya mau biꞌia wáusturu. 3 Chi biawãra bed̶ea machiba ũriped̶aad̶a kĩrabásturu. Mau ãrea ijã́sturu. Kachirua ida b̶ud̶aped̶a Dachi Akõremaa waya nésturu. Machi kauwa nibabadauwãebʉrã mʉ kãꞌãabariwãed̶e neei machi kastikai baita nechiru kãꞌãabariwãed̶e neebarii kĩra. 4 Maamina machi Sardisd̶ebena b̶aꞌãra barau chi kachiruad̶e panabadauwãe, machi paru jayoaswãe panuu kĩra. Machi mʉ baara ãbua nibad̶ai baita biꞌia panuud̶eeba, paru torroa jʉ̃ʉduud̶e mʉ baara nibad̶ai. 5 Chi kachirua waud̶ai poyaaped̶aad̶arãba ara mau kĩra paru torroa jʉ̃d̶ai. Ãchi trʉ̃ chi ewaricha chokae duanabarii kartad̶e b̶ʉ kub̶uud̶eeba mʉʉba mau jareebai. Maumaarã mʉ Chacha daad̶e maud̶e chi angelerã daad̶e ãchi mʉʉd̶erã ai. 6 Chi kʉʉrʉ bara niiba ũrise Dachi Akõre Jauriba ãbarãmaa jara b̶uu.
Cristoba ãbarã Filadelfia puurud̶ebena baita b̶ʉbid̶a
7 »Chi Filadelfia puurud̶ebena ijãabadaurã nubarii ángel baita kartad̶e naka b̶ʉse:
»Mau chi Ara Dachi Akõre Báitaburu Nii, Chi Biawãra Bed̶ea Ab̶a B̶uu, chi David puuru mechiu niibʉ.b Chi ichiba ewabarii ab̶au bid̶a poyaa jʉ̃abai. Ichiba jʉ̃aruu ab̶au bid̶a poyaa ewaabai. 8 Naka jara b̶uu:
»Machiba wau panuu mʉʉba kuitaa b̶uu. ¡Ũrísturu! Mʉʉba poraa ab̶a machi daad̶e ewasii. Mau ab̶au bid̶a poyaa jʉ̃abai. Machi meserãa ãreawãe nuremina, mʉ bed̶ea ãrea ijãabadau. Mʉ istu b̶ud̶awẽa panuu. 9 ¡Ũrísturu! Machi jʉ̃rʉ kaita mʉʉba Satanasd̶e ẽbẽrarã õdarrd̶e kopaneebiai.c Maarãba Dachi Akõred̶erã abadamina, makawãema.d Maarã chi seta nuree. Mʉʉba maarãmaa kuitaabiai mʉʉba machi kʉ̃ria ua b̶uu. 10 Machiba joma chi mʉ kakua biꞌiwãe duanuu dauchia jãadua panuu mʉʉba jarad̶a kĩra. Maud̶eeba chi joma nau iujãad̶ebena biꞌiwãe panad̶ai ewari neeruud̶e, mʉʉba machi nu ua b̶uai. Mau ewarid̶e joma chi nau iujãad̶e duanuu biꞌiwãe panabiai sakad̶ai kuitaayua. 11 Mʉ kãꞌãabariwãed̶e neei. Maud̶eeba machiba id̶ibae ijãabadau kĩra dauchia jãadua panásturu. Maka ab̶au bid̶a machi boro jũra jʉ̃barii ẽe adaud̶aabai. 12 Chi kachirua poyaaped̶aad̶a mʉ Dachi Akõre de wãto kĩra b̶ui. Maka mau ded̶ebena wãd̶aabai. Ãchi daub̶ʉʉrʉd̶e mʉ Chacha trʉ̃ b̶ʉi ichid̶irã kuitaabiayua. Maud̶e ãchi daub̶ʉʉrʉd̶e mʉ Chacha puuru trʉ̃ b̶ʉi mau puurud̶ebenarã kuitaabiayua. Mau Jerusalén Wid̶i abadau puuru bajãad̶ebena mʉ Chacha b̶uud̶ebena neei. Maud̶e ãchi daub̶ʉʉrʉd̶e mʉ trʉ̃ wid̶i b̶ʉi mʉʉd̶erã kuitaabiai baita. 13 Chi kʉʉrʉ bara niiba ũrise Dachi Akõre Jauriba ãbarãmaa jara b̶uu.
Cristoba ãbarã Laodicea puurud̶ebena baita b̶ʉbid̶a
14 »Chi Laodicea puurud̶ebena ijãabadaurã nubarii ángel baita kartad̶e naka b̶ʉse:
»Biawãra Bed̶ea trʉ̃ jarabadauba Dachi Akõred̶ebena biawãra joma arakʉd̶e jarabarii.e Ichid̶eeba Dachi Akõreba ne joma wausii.f Ichiba naka jara b̶uu:
15 »Machiba wau panuu mʉʉba kuitaa b̶uu. Mʉ ida b̶ud̶awẽa panuu maamina sõd̶eeba mʉ baara nid̶auwãe. Maka machi bania kũrasãa kĩra nureewãe maud̶e bania wãsia kĩra. Sõd̶eeba biawãra ichi baara wãd̶awẽebʉrã, mʉʉmaarã bibuara b̶uu mʉ baara akawa nibad̶aabai b̶uu. 16 Maamina machi bania wãsia kĩra nuree; mʉ ida b̶ud̶akamina, biawãra sõd̶eeba nibad̶akau. Maud̶eeba mʉʉba machi ida b̶ui, mʉ okarrd̶ebena bania jʉ̃ʉrʉa id̶uuruu kĩra. 17 Machiba chi nejarr barau nuree a panuu, ne joma uru panuu a duanuu, maud̶e ne ab̶a bid̶a wãꞌãe nistad̶ai baita a duanuu. Maamina adua panuu machi miichuburi duanuu, kachirua duanuu, ne ab̶a bid̶a uru panuuwãe, dau pãriu duanuu maud̶e ãkad̶aa duanuu. 18 Maud̶eeba mʉʉba machimaa naka kʉ̃risia dearuu: Nee tʉbʉchiad̶e dorrb̶arid̶a nedósturu mʉʉd̶ebena. Maka machi biawãra barau nuread̶ai. Maud̶e mʉʉd̶ebena paru torr nedósturu jʉ̃d̶ai baita. Maka nejasiad̶aabai machi ãkad̶aa panasiid̶eeba. Maud̶e mʉʉd̶ebena daud̶e taabadau nedósturu, mauba taad̶aped̶a biꞌia ichiad̶amera. 19 Chi ẽbẽrarã mʉʉba kʉ̃riakua b̶uu kastikakuabarii maud̶e bed̶ea bia ũribiabarii mʉ bed̶ea ijãad̶amera. Maud̶eeba waya mʉʉmaa nésturu biawãra mʉ baara sõd̶eeba nibad̶amera. 20 ¡Ũrísturu! Mʉ poraad̶e b̶uma. Awareeba iu b̶uma machiba mʉ deed̶aa ida neebid̶amera. Barikiuba mʉ mimi ũriped̶a chi poraa ewaaruubʉrã, mʉ ed̶a wãped̶a mau baara koi. 21 Mʉʉba chi kachirua waui poyaasiid̶eeba Dachi Akõre baara ichi rey ãkaud̶e akʉ b̶eesii. Ara mau kĩra chi kachirua waui poyaaped̶aad̶a mʉ baara mʉ rey ãkaud̶e akʉ b̶eebiai. 22 Chi kʉʉrʉ bara niiba ũrise Dachi Akõre Jauriba ãbarãmaa jara b̶uu».