Cristoba chi ãbarã Éfeso puurud̶ebenarã baita b̶ʉbid̶a
2
1 »Chi Éfeso puurud̶ebena ijãabadaurã nubarii ángel baita kartad̶e naka b̶ʉse:»Chi jua biare 7 pusterrea uru b̶uuba maud̶e 7 lámpara nee waud̶a tãed̶e niiba naka jara b̶uu:
2 »Mʉʉba machiba wau panuu kuitaa b̶uu. Mʉ baita ãrea traja panuu maud̶e ãrea biꞌiwãe panuud̶e joma dauchia jãadua panuu kuitaa b̶uu. Machiba chi kachirua waubadaurãmaa ida kabid̶akau kuitaa b̶uu. Chi nuree machimaa wãd̶aped̶a maabae Jesucristoba bʉid̶arã abachid̶au.a Maamina machiba kauwa ichia panuud̶eeba kuitaasid̶au maarã chi seta nuree. 3 Machi mʉ kakua ãrea biꞌiwãe panuud̶e joma dauchia jãadua panuu maud̶e kĩrajaab̶ariwẽa mʉ baita biꞌia traja panuu. 4 Maamina mʉʉba nau miadaa unu b̶uu: chi kʉ̃ria machiba naed̶e uru panad̶a id̶i jãabae ãrea uru panuuwãe. 5 Maud̶eeba kĩrabásturu machiba naed̶e kʉ̃ria uru panad̶a.b Waya Dachi Akõremaa nésturu. Chi bia wáusturu naed̶e waubachid̶au kĩra. Dachi Akõremaa need̶awẽebʉrã, mʉʉba machi kastikad̶e wãi.c Maud̶e machi lámpara ãyaa b̶ui. 6 Maamina nau biꞌia wau panuu: chi Nicolaitasd̶e ijãabadaurãba kachirua waubadau machiba kʉ̃riad̶akau. Mʉa bid̶a kʉ̃riakau. 7 Chi kʉʉrʉ bara niiba ũrise chi Jauriba ãbarãmaa jara b̶uu. Chi kachirua waud̶ai poyaa ida b̶uped̶aad̶amaa chi nejõo bakuru chokae nibabiabariid̶ebena koi ida kabii. Mau bakuru Dachi Akõre drua biad̶e nub̶uu.
Cristoba ãbarã Esmirna puurud̶ebena baita b̶ʉbid̶a
8 »Chi Esmirna puurud̶ebena ijãabadaurã nubarii ángel baita kartad̶e naka b̶ʉse:
»Chi Nabena maud̶e Kaad̶ebena, chi biud̶a bad̶a waya chokae niiba naka jara b̶uu:
9 »Mʉʉba machiba wau panuu kuitaa b̶uu.d Ãrea biꞌiwãe panuu maud̶e chi nejarr barauwãe nuree kuitaa b̶uu. Maamina Dachi Akõred̶eeba machi ne bara nuree. Maka panumina machi Dachi Akõred̶eeba chi nejarr barau nuree kĩra nuree. Mʉʉba kuitaa b̶uu chi nuree judiorãba machi ʉ̃rʉbena miadaa berreabadau. Maarãba Dachi Akõred̶erãe abadamina Satanasd̶ebʉ.f 10 Chi machi kãꞌãabariwãed̶e biꞌiwãe panad̶ai ewari wapearã́sturu. ¡Ũrísturu! Chi jʉbawãe niiba machid̶ebena chi nuree jʉ̃a bʉikai ijãa panuu kuitaayua. Ewari 10 ãrea biꞌiwãe panad̶ai.g Maamina biuduud̶aa ijãa panásturu. Maud̶e mʉʉba machimaa boro jũra dearuud̶e ewaricha chokae nibabiai. 11 Chi kʉʉrʉ bara niiba ũrise Dachi Akõre Jauriba ãbarãmaa jara b̶uu. Chi kachirua waud̶ai poyaaped̶aad̶a ewaricha Dachi Akõred̶ebena awara nuread̶aabai.h
Cristoba ãbarã Pérgamo puurud̶ebena baita b̶ʉbid̶a
12 »Chi Pérgamo puurud̶ebena ijãabadaurã nubarii ángel baita kartad̶e naka b̶ʉse:
»Chi espada kid̶a muriacha peed̶ea era b̶uu iniiba naka jara b̶uu:
13 »Machiba wau panuu mʉʉba kuitaa b̶uu.i Maud̶e kuitaa b̶uu machi panabadaumare Satanás chi rey ãkaud̶e akʉ b̶uu.j Maamina machi wabid̶a mʉ baara nibabadau. Chi Satanasd̶erãba chi ãba Antipas beasid̶aud̶e mʉ kakua biawãra berreasiid̶eeba, machi mʉʉd̶e ijãad̶ai ida b̶ud̶aabasii. 14 Maamina mʉʉba nau miadaa unu b̶uu. Machid̶ebena chi nureeba Balaanba jaradead̶a ũri panuu. Balaanba Balacmaa jaradea b̶uasii israeld̶ebenarã kachiruad̶e saka b̶aebiai b̶uu. Mauba chi Dachi Akõre kĩra nuree juaba kaped̶aad̶amaa baa deabadau kiuru kobiabachii maud̶e dachi kakuaba barikiu kachirua waubiabachii. 15 Maud̶e machid̶ebena chi nureeba Nicolasba jaradead̶a ũri panuu. Mau jaradeabadau mʉʉba kʉ̃riakau.k 16 Maud̶eeba waya Dachi Akõremaa nésturu. Mau makad̶awẽebʉrã, kãꞌãabariwãed̶e mʉ machi kastikad̶e wãi. Maud̶e espada mʉ okarrd̶ebena neeruuba mau ẽbẽrarã ome chĩo b̶uai. 17 Chi kʉʉrʉ bara niiba ũrise chi Dachi Akõre Jauriba ãbarãmaa jara b̶uu. Chi kachirua waui poyaad̶amaa mʉʉba chi maná lmera b̶uad̶a deai komera maud̶e mokara torroa b̶uu sid̶a ab̶a deai. Mau mokara kaebe b̶uumaa trʉ̃ wid̶i b̶ʉ kub̶uu.m Ab̶au bid̶a mau trʉ̃ adua b̶uu. Chi adaurúburu mau trʉ̃ kuitaai.
Cristoba ãbarã Tiatira puurud̶ebena baita b̶ʉbid̶a
18 »Chi Tiatira puurud̶ebena ijãabadaurã nubarii ángel baita kartad̶e naka b̶ʉse:
»Dachi Akõre Warr dau tʉbʉ aokooruu kĩra b̶uu, maud̶e jʉ̃rʉ bronce tʉbʉd̶e kub̶ud̶akare urua kub̶uu kĩra b̶uu. Ichiba naka jara b̶uu:
19 »Machiba wau panuu mʉʉba kuitaa b̶uu. Machi kʉ̃riabadau, mʉʉd̶e ijãabadau, mʉ baita waubadau, maud̶e dauchia jãadua panabadau kuitaa b̶uu. Maud̶e kuitaa b̶uu machiba naed̶e wau panad̶a audeara bibuara wau panuu. 20 Maamina mʉʉba nau miadaa unu b̶uu: Machiba wẽra Jezabel abadauba chi setaa jaradea b̶uu ida kabi panuu.n Ara mauba Dachi Akõre baita berreabarii abarii. Maamina chi mauba jaradea b̶uud̶eeba mʉ baita bari trajabadaurã setaa kũrua b̶uu kĩra dachi kakuaba barikiu kachirua wau panad̶amera maud̶e kiuru Dachi Akõre kĩra nuree kaped̶aad̶amaa baa deabadau kod̶amera. 21 Mʉʉba esed̶au b̶uasii jãuba chi kakuaba barikiu kachirua wau b̶uu ida b̶uped̶a Dachi Akõremaa neemera. Maamina mau kachirua ida b̶ui kʉ̃riabasii. 22 Maud̶eeba mʉʉba jãu wẽra chi kakua pira baraa kʉd̶ad̶e b̶ari b̶ui. Maud̶e joma chi jãu ome kachirua waubadaurãba ara mau wẽra kĩra kachirua wau panuu ida b̶ud̶awẽebʉrã biꞌiwãe panabiai. 23 Mʉʉba chi warrarã kinibiai. Maka joma ãbarãba kuitaad̶ai mʉʉba jomaurã kʉ̃risia kuitaa nii maud̶e chi sõd̶eeba wau kʉ̃ria panuu. Mʉʉba machiba wauped̶aad̶a kĩra kastikai. 24 Maamina chi nuree machid̶ebena Tiatirad̶ebenarãba jãu wẽraba jaradea b̶uu ũrid̶awẽa panuu. Mau awara machiba chi “Satanasba mera ua b̶uu” abadau jʉrʉd̶awẽa panuu kuitaad̶ai baita. Mʉʉba june maucha waubiawẽe, 25 bari dauchia jãadua panuud̶e, mʉʉd̶e ijãa panad̶ai mʉ neeruud̶aa. 26-27 Chi kachirua waud̶ai poyaaped̶aad̶arã maud̶e chi mʉʉba kʉ̃ria b̶uu ewaricha wauped̶aad̶arã, mʉʉba puuru jomad̶e chi karrarã b̶ui mʉ chachaba mʉ jomaurã karr b̶usii kĩra. Maud̶e kĩra chuburiad̶awẽa joma nau iujãad̶ebenamaa ichid̶e ijãabia b̶uai.o Maarãba jomaurã poyaa panad̶ai kuuru ãribarii kĩra. 28 Mʉʉba maarãmaa chi ewarimaabena pusterrea deai.p 29 Chi kʉʉrʉ bara niiba ũrise Dachi Akõre Jauriba ãbarãmaa jara b̶uu.