Apocalipsis
Jesucristoba Juanmaa unubid̶a
Nau kartad̶e Juanba naa b̶ʉd̶a
1
1 Mʉ Jesucristo baita bari trajabarii Juanbʉ. Nau kartad̶e b̶ʉ b̶uu Jesucristoba bajãad̶ebena mʉʉmaa unubid̶a. Mau Dachi Akõreba Jesucristomaa unubisii ichid̶e ijãa nureerãmaa unubiamera kãꞌãabariwãed̶e kãare sãai b̶uu.a Jesucristoba ángel mʉʉmaa bʉisii mau unubimera. 2 Joma mʉʉba unud̶a biawãra jara b̶uu. Mʉʉba jara b̶uu nau bed̶ea Dachi Akõred̶ebena nee b̶uu maud̶e Jesucristoba biawãra unubisii. 3 Chi mau Dachi Akõre baita berreabarii bed̶ea ãbarã daad̶e ed̶a jaraaruu ãrea biꞌia b̶uai. Maud̶e chi nau bed̶ea ũrid̶aped̶a wau nuree ãrea biꞌia nuread̶ai, kãꞌãabariwãed̶e makaid̶eeba.Ãbarã Asia druad̶ebena baita Juanba b̶ʉd̶a
4 Mʉ Juanbʉ. Nau karta b̶ʉmaa b̶uu ãbarã Asia druad̶e siete puurud̶ebenarã baita. Mʉʉba kʉ̃ria b̶uu Dachi Akõreba ichi sõbiad̶eeba machi aid̶a b̶uai maud̶e jirukaraayuwãe b̶uabiai. Mau chi nibad̶abʉ, chi niibʉ maud̶e chi neei baita b̶uubʉ. Maud̶e mʉʉba kʉ̃ria b̶uu Dachi Akõre rey ãkau bia b̶uu daad̶e 7 jauri panuuba maka wau panad̶ai.b 5 Maud̶e kʉ̃ria b̶uu Jesucristo bid̶a maka wau b̶uai. Ichiba Dachi Akõre ʉ̃rʉbena biawãra jarabarii. Biu b̶uad̶a naa chokae jiradusii, joma nau iujãad̶ebena chi reyrã audeara chi mechiu nii b̶uai baita. Mauba dachi kʉ̃ria b̶uu maud̶e ichi oad̶eeba kachiruad̶ebena karibasii. 6 Dachi b̶usii Dachi Akõreba ichi juad̶e paare nuread̶amera. Maka ichi Bajãad̶ebena Akõreba kʉ̃ria b̶uu wau panad̶ai. Maumaa biꞌia berread̶ai panuu. Biꞌia b̶uu mau ewaricha jomaurã Mechiu b̶uai. Biawãra biꞌia b̶uu maka b̶uai.c
7 Ichiásturu. Cristo jʉ̃rʉarad̶e neei. Maud̶e jomaurãba unud̶ai. Ichi suped̶aad̶a bid̶a unud̶ai.
Ichi unuuduud̶e joma nau iujãad̶ebena jẽad̶ai. Biawãra maka b̶uai.
8 Dachi Mechiuba jarasii: «Mʉ chi Joma Poyaabarii Dachi Akõrebʉ, chi Alfabʉ maud̶e chi Omegabʉ.d Mauba jara b̶uu mʉ chi nabenabʉ maud̶e chi kaad̶ebenabʉ. Mʉ chi nibad̶abʉ, chi niibʉ maud̶e chi neei baita b̶uubʉ».
Juanba Cristo unud̶a
9 Mʉ machi ãba Juanbʉ. Dachi Jesucristo ome panuud̶eeba mʉ machi ome Dachi Akõre juad̶ebenarãbʉ, machi ome ãrea biꞌiwãe b̶uu, maud̶e machi ome joma dauchia jãadua b̶uu.
Dachi Akõre bed̶ea jaradea b̶uu kakua maud̶e Jesús ʉ̃rʉbena biawãra a b̶uu kakua mʉ Patmos islad̶e b̶usid̶au. 10 Dachi Mechiu ewarid̶e mʉ Dachi Akõre Jaurid̶eeba b̶uasii.e Maud̶e mʉ kaad̶eeba ab̶a mimi jĩwa berrea b̶uu ũrisii. Ichi bed̶ea kachu jĩwabarii kĩra ũrisii. 11 Mauba jarasii: «Bichiba unuuruu kartad̶e b̶ʉped̶a ãbarã siete puuru b̶eed̶e duanuurãmaa urubʉise: Efesod̶aa, Esmirnad̶aa, Pergamod̶aa, Tiatirad̶aa, Sardisd̶aa, Filadelfiad̶aa maud̶e Laodicead̶aa».f
12 Maud̶e mʉʉba waya ichiasii kai berrea b̶uu kuitaa. Ichiasiid̶e siete ʉ̃d̶aa koabarii nee waud̶a unusii. 13 Mau siete ʉ̃d̶aa koabarii ẽsa, chi Ẽbẽra Ba B̶uad̶a kĩra nii unusii.g Paru jʉ̃rʉd̶eed̶e deseroa jʉ̃ b̶uasii. Ichi pechud̶e nee waud̶a paraa jʉ̃ b̶uasii. 14 Ichi bud̶a meraa torroa b̶uasii oeja kara kĩra maebʉrã nieve kĩra. Ichi dau tʉbʉ aokooruu kĩra b̶uasii. 15 Ichi jʉ̃rʉ bronce tʉbʉd̶e kub̶ud̶akare urua kub̶uu kĩra b̶uasii. Ichi bed̶ea do ãrea cheeruu kĩra jĩwa b̶uasii. 16 Ichi jua biare pusterrea siete uru b̶uasii. Ichi okarrd̶ebena espada kid̶a muriacha peed̶ea era b̶uu neesii. Ichi kĩedarr ʉmada ted̶echoa kĩra b̶uasii.
17 Ichi unusiid̶e ichi jʉ̃rʉ kaita peraba jeed̶a b̶ari b̶eesii. Maamina ichi jua bia mʉ ʉ̃rʉ kub̶uped̶a jarasii: «Perarã́se. Mʉ chi nabenabʉ maud̶e kaad̶ebenabʉ. 18 Mʉ chi Chokae Nima. Mʉ biud̶amina ichiáse chokae nii, maud̶e ewaricha chokae nibai. Mʉa chi biud̶arã poyaa chokae jiradubiai b̶uu.h 19 Bichiba unu b̶uu karta ab̶ad̶e b̶ʉse. Id̶ibae makamaa b̶uu ʉ̃rʉbena maud̶e chi kaad̶ebena ewarid̶e makai ʉ̃rʉbena b̶ʉse. 20 Mʉʉba unubiiruu chi 7 pusterrearã bichiba mʉ jua biare uru b̶uu unud̶a kãare jara b̶uu maud̶e kãare jara b̶uu lámpararã nee waud̶a. Mau 7 lámpararã jara b̶uu chi angelerã. Mau 7 panuuba ãbarã 7 puurud̶e duanuu nubadaurãbʉ. Ãchi ab̶aab̶aa chi ãbarã puurucha nubadau. Chi 7 lámpararã jara b̶uu chi 7 puurud̶ebena ãbarã.