Filipenses
Karta Pabloba b̶ʉd̶a ãbarã Filipos puurud̶ebenarã baita
Año 61 Pablo Roma puurud̶e jʉ̃a b̶uasiid̶e, nau karta b̶ʉsii. (Hechos 28:16-31, Filipenses 1:13).
Hechos 16:6-40 b̶ʉ kub̶uu Pablo naa Filipos puurud̶aa wãd̶a ʉ̃rʉbena. Mau puuru kaita panuud̶e Pabloba chi nuree wẽrarã unuped̶a Jesucristo ʉ̃rʉbena jaradeasii. Wẽra Lidia abadauba naa ijãasii. Ichi ded̶e Pablo maud̶e ichi ome nibad̶a paneesid̶au. Ãbarã ara mau ded̶e araa ãbua imibachid̶au.
Pablo jʉ̃a b̶uasiid̶e ãbarã Filipos puurud̶ebenarãba ichi baita chi nejarra urubʉisid̶au. Ãchiba deaped̶aad̶a ãba Epafroditoba adoesii. Pabloba nau karta b̶ʉsii ãchimaa ãchíturu kid̶ibad̶ai ai baita. Naa Dachi Akõremaa biꞌia berreasii (1:1-11). Mawãare ãchimaa nebʉrʉsii ichi saka b̶uu ʉ̃rʉbena. Pabloba kʉ̃risia b̶uasii kãꞌãabariwãed̶e jʉ̃a b̶uud̶ebena wãyaa wãi (1:12-26). Mawãare b̶ʉsii Cristo kĩra nibad̶amera (1:27—2:18). Mawãare b̶ʉsii Epafrodito isa waya bʉii ʉ̃rʉbena maud̶e Timoteo jaradead̶e bʉii ʉ̃rʉbena (2:19-30). Mawãare b̶ʉsii chi biꞌiwãe jaradeabadaurã ʉ̃rʉbena kauwa panad̶amera (3:1—4:1). Pabloba kaad̶eare b̶ʉd̶a 4:2-23 b̶ʉ kub̶uu.