Chi jaradea ua b̶uabadaurã juad̶e panásturu
13
1 Dachi jomaurã chi nau iujãad̶ebena jaradea ua b̶uabadaurã juad̶e panad̶ai panuu Dachi Akõreba maarã b̶usiid̶eeba. Ab̶a bid̶a wãꞌãe Dachi Akõreba b̶ud̶awãe. 2 Maud̶eeba chi nau iujãad̶ebena jaradea ua b̶uabadaurã kʉ̃riawẽa b̶uuba Dachi Akõreba b̶ud̶a kʉ̃riawẽa b̶uu. Chi maka kʉ̃riawẽa nuree ãchi jaradea ua b̶uabariiba nebʉra kastikakuai. 3 Biawãra chi jipa wau nureerãba ãchi karrba kastikai wapead̶akau, maumaarã chi kachirua waubadaurãba maarã wapeabadau. Maud̶eeba machi karrarã wapeawẽa panad̶ai kʉ̃ria panuubʉrã, biꞌia wáusturu ãchiba biꞌia unud̶amera. 4 Biawãra machi jaradea ua b̶uabadaurã Dachi Akõreba ichi baita bari trajabadaurã kĩra b̶usii machi aid̶ad̶amera. Maamina machiba kachirua wauduubʉrã, maarã wapeásturu biawãra ãrea kastikad̶ai panuud̶eeba.a Ãchi Dachi Akõre baita bari trajabadaurã kĩra nuree kachirua wau nuree kastikad̶ai baita. 5 Maud̶eeba machi nau iujãad̶ebena jaradea ua b̶uabadaurã juad̶e nuread̶ai panuu kastikabiarãad̶amera. Mau awara ãchi juad̶e nuread̶ai panuu, kuitaa panuud̶eeba maka waud̶ai jipa b̶uu. 6 Maud̶eeba machiba chi karrarãmaa deabadau nejarra dead̶ai panuu, ãchi Dachi Akõre baita bari trajabadaurã kĩra panuud̶eeba, maud̶e maka waubadaud̶eeba.7 Jomaurãmaa deásturu machiba ãchicha dead̶ai panuu kĩra. Machi jaradea ua b̶uabadaurãmaa chi nejarra dead̶ai panuu deásturu. Machiba wapeadee panad̶ai panuu wapeadee panásturu. Machiba chi biꞌia jarad̶ai panuurãmaa biꞌia jarásturu.
8 Machiba chi dead̶ai panuu uru panuubʉrã, waya dead̶awẽa panarã́sturu. Ab̶aburu chiya kʉ̃ria panásturu. Chi waabenarã kʉ̃ria b̶uuba joma Moisesba b̶ʉd̶a wau b̶uu. 9 Mau Moisesba b̶ʉd̶ad̶e jara b̶uu: «Junebena miakãid̶a ome kãi b̶eerã́se, mia bearã́se, nechiruarã́se, ab̶auba uru b̶uu kʉ̃riarã́se». Mau bed̶ea maud̶e joma mau Moisesba b̶ʉd̶ad̶e jara b̶uu sid̶a nau kʉ̃risia ab̶ad̶e joma jara b̶uu: «Waabenarã kʉ̃riáse ara bichi kʉ̃ria b̶uu kĩra». 10 Chi kʉ̃ria uru b̶uuba waabenarã kachirua waukau. Waabenarã kʉ̃ria b̶uud̶e joma Moisesba b̶ʉd̶a wau b̶uu.
11 Joma mau wau panásturu kuitaa panuud̶eeba nau ewari saka b̶uu. Ʉ̃rʉmásturu. Waa kãi duanarã́sturu. Dachi nau iujãa kachiruad̶ebena karibai aude ara kaita b̶uu dachiba naed̶e ijãaped̶aad̶a audeara. 12 Nau ewari kachirua wãꞌãemaa b̶uu ẽsabud̶ebena ewarimaa b̶uu kĩra. Maud̶eeba dachiba kachirua ida b̶ud̶aped̶a biꞌia waud̶ai panuu. Maka kachiruad̶ebena joma nu panad̶ai kokoroaba ichi ʉ̃rʉ chaarea b̶uu jʉ̃barii ãyadaa jʉ̃ b̶uu kĩra. 13 Dachi kĩra jipa nibad̶ai panuu ãyadaa nibabadau kĩra. Kĩrajʉʉ waubadau ewarid̶e biu nibad̶aabai panuu, kĩra nejasia wau nibad̶aabai panuu, oa kachirua berrea panad̶aabai panuu, maud̶e ab̶auba uru b̶uu ʉ̃rʉbena kachirua kʉ̃risiad̶aabai panuu. 14 Maumaarã Dachi Mechiu Jesucristo nibad̶a kĩra nibásturu. Nau kakuaba kachirua wau kʉ̃ria b̶uu waud̶ai kʉ̃risiarã́sturu.