Joma Israeld̶ebena imiped̶aad̶a biawãra israeld̶ebenarãwãe
9
1 Mʉ Cristod̶ed̶eeba biawãra jaraaruu. Setawãema. Dachi Akõre Jauriba mʉ sõd̶e nau bed̶ea biawãra arakʉd̶e kuitaabi b̶uu. 2-3 Nau jaraaruu: mʉ ẽbẽrarã judiorã kakua ewaricha ãrea kĩra nomaa b̶uabarii, ãchi Dachi Akõre ome biꞌiwãe panuud̶eeba. Mʉ Cristod̶ebena awara b̶eei kʉ̃riai, mʉ ãbarã aid̶ai baita, 4 chi israeld̶ebenarã. Dachi Akõreba naed̶e ãchi jʉrʉ adausii ichi warrarã nuread̶amera. Ichi kĩrawãrea ted̶echoa maarãmaa unubisii. Ãchi nabẽraed̶ebenarã ome bed̶ea deasii. Moisesba b̶ʉd̶a maarãmaa deasii. Ãchimaa kuitaabisii ichi de mechiud̶e kãare waud̶ai panuu maud̶e joma ichiba deai jarad̶a ãchi baita b̶uasii. 5 Ãchi nabẽraed̶ebenarã chi mechiurã nureasii. Ãchid̶ebena Cristo ẽbẽra kakuad̶e chi naweba adausii. Mau jomaurã Akõrebʉ. Ichimáburu dachiba ewaricha biꞌia berread̶ai panuu. Biꞌia b̶uu maka b̶uai.6 Mʉʉba jarawẽa b̶uu Dachi Akõreba chi Israeld̶ebenarã baita waui ad̶a wauwẽa b̶uu. Maumaarã mʉʉba jara b̶uu joma Israeld̶ebena imiped̶aad̶a Dachi Akõre daad̶e biawãra israeld̶ebenarãwãe. 7 Maud̶e joma Abrahamd̶ebena imiped̶aad̶a Dachi Akõre daad̶e Abraham warrarãwãe. Dachi Akõreba Abrahammaa naka jarasii: «Bichi warr Isaacd̶eeba bichi ãichekerã ãrea imid̶ai». 8 Mau bed̶eaba dachimaa kuitaabii b̶uu joma Abrahamd̶ebena chi naweba adauped̶aad̶a Dachi Akõre warrarãwãe. Maumaarã chi warrarã Dachi Akõreba deai jarad̶a, biawãra Abraham warrarãbʉ. 9 Dachi Akõreba Abrahammaa deai jarad̶a bed̶ea nau: «Año ab̶aud̶e mʉ waya neei. Maud̶e Saraba warr uru b̶uai».
10-12 Mau awara Dachi Akõreba kuitaabisii chi ichiba jʉrʉ adaui kʉ̃ria b̶uu jʉrʉ adaubarii. Maud̶e kuitaabisii ab̶a bid̶a jʉrʉ adaukau ãchiba wau panuu biꞌia unu b̶uud̶eeba maumaarã jʉrʉ adaubarii ichiba iusiid̶eeba. Naka kuitaabisii: Rebecaba mikisu adausii. Chi akõre dachi nabẽraed̶ebena Isaac basii. Maamina mau warrarã chi naweba adaui naed̶e maud̶e ne ab̶a bid̶a biꞌia maebʉrã kachirua waud̶ai naed̶e Dachi Akõreba Rebecamaa jarasii: «Chi nabena chi kaad̶ebena juad̶e b̶uai». 13 Maud̶eeba Dachi Akõre bed̶ead̶e naka b̶ʉ kub̶uu: «Mʉʉba Jacob kʉ̃riasii, maamina Esaú kĩramaasii».
14 ¿Mau ʉ̃rʉbena saka kʉ̃risia panuma? ¿Dachi Akõreba jipa waukau kʉ̃risia panuka? ¡Makawãema! 15 Dachi Akõreba Moisesmaa naka jarasii:
«Mʉʉba chi kĩra chuburia kʉ̃ria b̶uu ẽbẽra kĩra chuburiai maud̶e chi mʉʉba kʉ̃riad̶eeba kariba kʉ̃ria b̶uu ẽbẽra kʉ̃riad̶eeba karibai».a
16 Biawãra chi ẽbẽra Dachi Akõreba jʉrʉ adau b̶uu jʉrʉ adaukau, mau ẽbẽraba wau b̶uu biꞌia unu b̶uud̶eeba, maebʉrã chi ẽbẽraba maka kʉ̃ria b̶uud̶eeba. Maumaarã chi ichiba kĩra chuburiai kʉ̃ria b̶uu ẽbẽra, mau jʉrʉ adaubarii. 17 Ichi bed̶ead̶e, ichiba faraonmaa jarad̶a naka b̶ʉ kub̶uu:
«Mʉʉba bichi chi rey mechiu b̶usii mʉ poyaa unubiai baita. Maka mʉ joma nau iujãad̶e trʉ̃ poa b̶uai».
18 Mauba kuitaabia b̶uu Dachi Akõreba ab̶a bid̶a kĩra chuburiai kʉ̃ria b̶uubʉrã maka waubarii maud̶e ab̶a bid̶a sõ chaarea b̶eebii kʉ̃ria b̶uubʉrã makabibarii.
19 Mau bed̶ea ʉ̃rʉbena ab̶auba naka jarai: «Dachi Akõreba maka waubariid̶eeba ¿sakãe dachi nebʉra bara panuu a b̶uma? ¿Ichiba dachi b̶ud̶a kĩra panuuwãeka?» 20 Maamina ¿chi maka berrea b̶uuba ¿Dachi Akõremaa maka berreai b̶uka? ¿Chokoba chi kabariimaa naka jarai b̶uka: «Bichiba ¿sakãe mʉ jãka kasma?» 21 ¿Chi choko kabariiba wau kʉ̃ria b̶uu kĩra wauiwãe b̶uka? ¿Choko kĩrajʉʉ bara b̶uabarii ewari baitabena maud̶e barikia ewari baitabena sid̶a arab̶au ioroba kai b̶uwẽka?
22 Ara mau kĩra Dachi Akõreba wau kʉ̃riad̶a naka wausii. Ẽbẽrarãba kachirua wau panuu baita Dachi Akõreba ichi kĩrubarii unubia b̶uud̶eeba maud̶e ichi poyaad̶eeba kastikaped̶a tʉbʉ aokod̶e jiratai basii. Maamina chi ãchiba kachirua wau panuu joma dauchia jãadua b̶uasii. 23 Maka dauchia jãadua b̶uasii ichi biꞌia b̶uu mechiud̶ebena ichiba kĩra chuburia b̶uu ẽbẽrarãmaa kuitaabiai baita. Ãchi ichiba naed̶e jʉrʉ adausii ichi biꞌia b̶uud̶ebena uru panad̶amera. 24 Dachi mau ẽbẽrarãd̶ebenabʉ. Dachi Akõreba dachi joma iusii. Chi nuree judiorãbʉ maamina chi nuree judiowãerãbʉ, 25 Dachi Akõreba jarad̶a Oseas kartad̶e naka b̶ʉ kub̶uu kĩra:
«Chi mʉ puurud̶ebenarãwãe bad̶a mʉ puurud̶ebenarã ai. Chi mʉʉba kʉ̃riawẽa b̶uad̶a puuru, mʉʉba kʉ̃ria b̶uu puuru ai».
26 Maud̶e naka b̶ʉ kub̶uu:
«Mʉʉba jarasii machi mʉ ẽbẽrarãwãe.
Maka jarad̶amare, mʉʉba machi mʉ warrarã ai».
27-28 Maud̶e Isaiasba israeld̶ebenarã ʉ̃rʉbena naka jarasii:
«Israeld̶ebenarã ãrea panuu mar ibu kĩra. Maamina ãchi ãreawãe karibad̶ai Dachi Mechiuba nau iujãad̶e nuree isa joma kastikakuaid̶eeba».
29 Maud̶e mau naed̶e Isaiasba naka jarasii:
«Dachi Mechiu joma poyaa b̶uuba dachi israeld̶ebenarã chi nuree imiped̶aad̶arã ida chokae panabid̶awãe basirã, Sodomad̶ebenarã maud̶e Gomorrad̶ebenarã kĩra panad̶ai basii».
Judiorãba Cristod̶e ijãad̶awẽa panuu ʉ̃rʉbena
30 ¿Mauba kãare jara b̶uma? Judiowãerãba jʉrʉd̶aka basii chi Dachi Akõre puurud̶ebena jipa nureerã baara panad̶ai baita. Maamina maka paneesid̶au, Cristod̶e ijãasid̶aud̶eeba. 31 Maumaarã israeld̶ebenarãba Dachi Akõre puuru jipa b̶uu bad̶ai jʉrʉ panasii, chi ley waubachid̶aud̶eeba. Maamina poyaa maka waud̶aabasii. 32 ¿Sakãe makaabasma? Makaabasii Cristod̶e ijãad̶ai audeara ãchiba wau panuud̶eeba ichi daad̶e jipa nuread̶ai baita jʉrʉ panasiid̶eeba.b Biawãra ãchiba Cristod̶e ijãad̶aabasii moomaa drʉʉduu kĩra. 33 Dachi Akõre bed̶ead̶e mau ʉ̃rʉbena naka b̶ʉ kub̶uu:
«Ũrísturu. Mʉʉba Sión puurud̶e de waui baitabena mo b̶uuruu.c
Mau moomaa drʉd̶aped̶a b̶aed̶ai. Maamina chi ichid̶e ijãa b̶uuba bari ijãa b̶uabai».d