Probur Dinno
3
Oh mor agojorbuo, mui ien tore di lombor sidigan legongor. Tui idot tulos para tor sorol monan idot tuli dibartei mui duogan sidi legilung. 2 Agendi pobitro munigune hoi jeionde hodagani tore idot tuli dibartei mui sang. Ami tor apostoluno darai dede Probu ar mukti gorie uguman idot tulis.3 Ien akke hobor peis. Sejo dinnuot thatta gorie ebag. Thara tharar nijor lubbo ischie doge solibak. 4 Thara hobak, “The ebartei protiggia gorsie, hoi elode? Haron amar buro-burigun mori jeiondoidie siottun dhori sristi arambo oiede song beg jinijchani ekkui gori soler.” 5 Heis gori thara ien puri pelan: Purbe Itchioro hodai-hodai sorgogani sristi oie, ar Itchioro hodai-hodai pittimigan panittun ar panit sristi oie. 6 Sokkene sei paniganiloi paniban oinei songsaran nas oie. 7 Hintu tar sei hodagano darai the ikkie sorgogan ar pittimigan agundoi puri pheleibartei ekkuo dinottei rageie. Sei dinnuot be-dhormi manuschunore the bijier goribo ar tharare nas goribo.
8 Oh mor agojorun, ei hodagan puri no phellio. Probu iot ek din ek azar bojoro soman, ar ek azar bojor ek dino soman. 9 Hoiek jon manjie diri obo gori bhabonde dogkie gori, Probuie soittio dede ien diri no gore. The amattei dhorjio dori age. Huno jone nas no on para, hintu begkune tharar monani phiran para tartun mone hoi.
10 Hintu Probur dinnuo reidot sur ejonde dogkie gori ebo. Sei dinnuot dangor sobdo oinei sorgogani lugi jebogoi. Angie agune jinijchani phudei pheleibo. Pittimigan ar tar beg hamani agune hei pheleibo.
11 Itchiore beg jinijchani sengori nas goribo hinottei, tumi henjannie manus ona osit bhabi sawh. Pobitro sal-solon ar Itchiorore sorman gori tomar tha poribo. 12 Itchioro dinnuo ebartei tumi asha gori barsei thagode, sengori thago. Sei dinnuot agune sorgogani phudei pheleibo. Angie agune jinijchani golei pheleibo. 13 Hintu the soittio diede doge, nuo sorgogani ar ekkan nuo pittimi ami asha gori barsei agi. Sienit dharmig manuschun thebak.
14 Oh mor agojorun, tumi sieni birat asha gori barsei ago daw. Senottei, the tomare tar loge shantie thagke lak paigi para, dak hal neie ar duj neie gori lakpai para uijkare thago. 15 Amar agojor bhei, Paulaio Itchioro gyenandoi the tomare legkiede doge, Itchiore diri gori dhorjio dori agede sien the mukti goribar saidie mone gorsie. 16 Tar beg sidiganit sienir sombonde the legkie. Hoiekkani sidit, hoiekkani hoda bujode aghattie. No shigonde ar thik gori no thande manuschune Sastror oinnio hodagani benga-honga gori bujei duonde doge, Paula legkiede hodaganio benga-honga gori thara bujei duon. Sengori tharar nijor nostogan thara anon.
17 Oh mor agojorun, sei hodagani tumi honatto hobor po hinottei niom sara manuschune tomare hu-podedi no nejan para uijkare thago. Tumi judi hu podedi jo, salen tomar rokkie jaganottun tumi jhuri poriba. 18 Hintu amar Probu ar mukti gorie Jisu Kristor doyegan ar gyenan lab goro. Ikkiettun dhori umore-umor song mohimagan tar ok. Amen.
6 5