Itchiorore Hujhi
Goreinei Thana
4
Bheilog, sejot ami tomare Probu iot ujuleir, ar uschoni tuli dir, jene tumi Probu Jisu Kristo iot din din begottun bes bari jo para. Tumi amattun peiode sieniloi hingori sola poribo, ar Itchior hingori hujhi gore amattun tumi peiode doge ami tomare hujoli gorir. 2 Haron tumi hobor po Probu Jisur darai ami tomare hi ugum diei. 3 Ien Itchioro ischie jei tumi nokbhaj obartei shanda hamattun durot thago. 4 Tomar prottiek jone tar nijor heyegan hingori pobitro ar sorman gori domon gore hobor pa poribo. 5 Itchior hobor no peie Be-jadtuno dogkie sintie lubbot thana noi. 6 Huno jone tar bheibuore ei sombonde sujuk loinei tare no thogadok. Ami akke dhori tomare uij diei ar hoiei, jei sienit begkanit hena ugureiebuo olode Probu. 7 Haron Itchiore amare aw-poriskar obartei no dage, hintu pobitro obartei dagkie. 8 Senottei, je ien no goje the manus no goje, hintu amare tar Pobitro Apta dede Itchiorbuore no goje.9 Bheilogkun hospanar sombonde, ami tomare legibar dorkar nei. Haron ek jone oinnio jonore hos pebartei Itchiore tomare sigeie. 10 Makidonia rejjiot agonde beg bheilogkunore tumi jodepode gori hos po. Bheilog, hintu aro bes gori hos pebartei ami tomare ujuleir. 11 Ami tomare sigeidie doge tumi shanto sil gori thebartei, nijor haman mon dibartei, ar nijor adtoi ham goribartei ami tomare ugum dir, 12 jene, barendi agonde sigunor pokke tumi gome-dalei solo, ar tomar hitchu pora no obo.
Probuie Ejer
13 Bheilog hintu ghum jeionde sigunor sombonde tumi aw-gyen obartei mui no sang. Anole, asha neidie sigunor dogkie tomar monot dug obo. 14 Haron ami bischias gori jei Jisu morinei aro jiei uttie. Senottei, Jisur iot ghum jeionde sigunoreo Itchiore tar loge anibo. 15 Senottei, Probur hodar darai ami ien tomare hor. Probuie ebode lokkene, bagi thebakke sigun, ami jigun baji thebong, ar ghum jeionde sigun somot akke ami jebong. 16 Haron Probuie the nije sorgottun lami ebode lokkene joi jogar poribo. Moha sorgo-dudtuoi ro saribo, ar Itchioro begolluo bajibo. Sebeden Kristo iot moragune akke jiei udibag. 17 Sei porendi, ami baji thebongge sigune, Probuie amare tharar somare megsagot gori tulibogoi. Sedogkie gori, ami Probur loge umore-umor thebonggoi. 18 Senottei, ei hodaganiloi shantona diedi gorsio.