Jisu Morattun Jiei Udilo
Mot 28:1 -15; Mak 16:1 -11;
Jhn 20:1 -18
24
Sebeden saptar polim dinnuot beinnie poittie, miliegune sidiesalanot gelak. Thara aro oinnio miliegune jugo-leionde tumbas telani nejeion. 2 Silluo, Gourottun lareie gori thara degilakkoi. 3 Sebeden thara bidire sominei Probu Jisur heyegan thara no degilakkoi. 4 Ar thara sieno sombonde bhabi sade, sawh, abada gori di jon jhimid-jhimid jolede habor ursie gori tharar hai thieilakki. 5 Miliegune dore mada nigurilak. Sebeden sei di jon manjie tharare holak, “Hittei mora manjior jagat jeda togor? 6 The iot nei, the jiei udinei jeiegoi. The Galili dejot thagke tomare hi hoie tomar monot tulo. 7 The hoie, ‘Munischioro Puobuore pabi manjior adot gojei die obo. Thara tare krosot dibag. Ar the tin dine jiei udibo.’ ” 8 Sebeden miliegunor tar hodagani idot udilo. 9 Sidiesalanottun thara phiri einei, sei beg hodagani egaro jon sisjiore ar oinnio beg manuschunore holakki. 10 Sisjiogunore hoiondoidie miliegun olakke Magdala adamo Meri, Joana, Jakobor mabuo Meri, ar oinnio miliegun. 11 Thara hodagani gop mone gorinei tharare bischiaso no gorilak. 12 Hintu Pitore udinei sidiesalanot daba-daba gelo. The niguri seineigoi, pado haborani ek huredi gori degilo. Hi ghodi gelo sieni bhabi-bhabi the ghorot gelogoi.Emmaus Adamor Podot
13 Ar sawh, sei dinnie tharattun di jon Emmaus adamot jadon. Sei adaman olode Jerusalemortun perai egaro kilomiter durot. 14 Beg ghodi jeiede hodagani thara hoi-hoi jadon. 15 Aro, huobula ar pujor gora-gori gorte, Jisu The nije thara hai lungineigoi thara loge jar. 16 Hintu tharar sogkun tare no sinon para gori die oie. 17 Jisu tharare holo, “Jade-jade tumi hi hoda huobula goror? A hittei tumi shuduo-mu oio?” 18 Sebeden Kliopa honde sibiei tare uttor dinei holo, “Ingillie Jerusalemot hi ghodi jeie sieni hobor no peie porbhajchie bana agoschie?” 19 Jisu tare holo, “Hi ghottiede?” Thara tare holak, “Nazareth hullie Jisur sombonde dei. Itchioro samne ar beg manjior samne hodai-battai ar hame horjai the olode ek jon hemoda-bola muni. 20 Rajguru-thagurune ar amar murubbigune tare Pilado adot gojei duondoi. The tare morei phelei bajei dinei, soinniogune tare krosot duon. 21 Ami asha gorseidie the Israel jadtuo mukti goribuo. Sieni ghodi jeiede edchie tin din olo. 22 Hintu amar dolottun hoiekkuo miliei amare amok goreion. Thara bennie pottie sidiesalanot jeion. 23 Hintu tar heyegan no degondoi. Thara einei amare holakkidie, thara sorgo-dud azil peiondoi ar sei sorgo-dudtune tharare hoionde the jeda oie. 24 Ar amattun hoiek jon sidiesalanot jeinei, miliegune hoionde doge-doge degkuondoi. Hintu thara tare no degondoi.”
25 Sebeden Jisu tharare holo, “Oh nadongsara manuschun! Munigune hoionde hodagani bischias gorte tomar diri jai. 26 Kristo sei dug-hostogani bhug gorinei tar mohimagan pana dorkar noi ni?” 27 The Mosir boiunottun dhori beg muniguno boiun song, Sastrot tar sombonde hi lega age the tharare ortho bhangi dilo. 28 Thara jadonde adamano hai lungineigoi the tharattun bes durot jebode dogkie gorilo 29 Ar thara tare rageibartei holak, “Dinnuo gelogoi, saj awr. Amar loge thak. Ar the tharar loge thebartei gelo.” 30 The tharar loge hade, pidiegan The adot loinei donniobad dilo. Ar the pidiegan hotta gori tharare dilo. 31 Sebeden tharar sogkun meli die oinei thara tare sinilak. ar the tharattun aw-dega oi gelo. 32 Thara di jone huobula gorilak, “Podot amarloi hoda hoiede lokke ar Sastro orthogan amare bhangi dette lokke amar bidirie agun angette dogkie oiede noi ni?”
33 Thara jogon-togon udi Jerusalemot phiri einei, egaro jon sisjio ar oinnio manuschun somot eksomare thubei agonde lagot pelakki. 34 Thara huobula gorton, “Probu jodepode gori jiei uttie. Ar the Simono sidu dega diegoi.” 35 Podot hi-hi oie thara di joneo tharare janeilakkoi. Probuie pidiegan hotta gorte tare sinnonde sieno holak.
Sisjioguno idu Jisu Dega Dilogi
Mak 16:12 -18; Jhn 20:19 -23
36 Thara sei hodagani huobula gorte, Jisu The nije tharar song moiddie thieinei tharare holo, “Tomar shanti ok.” 37 Thara bhud degkuon bili dore honggorong oion. 38 Sebeden Jisu tharare holo, “Hittei jagulug ola? Hittei tomar monanit shiongshama oi? 39 Mor adtanit ar mor thenganit sawh. Ibie mui. More dhori sawh. Mor era ar aar agede degotte dogkie bhudor era ar aar nei.” 40 Jisu sieni honar porendi, tharare tar adtani ar thengani degelo. 41 Adik hujhie thara ejosong bischias gori no parton. Ar thara amok oi agonde lokke, Jisu tharare holo, “Idu huno hebar jinij age ni?” 42 Thara tare ek doma sekkie mas ar ek hotta muba haat dilak. 43 Ar the sieni adot loinei, tharar mujungot helo.
44 Sebeden the tharare holo, “Mui tomar loge elungge lokke ei hodagani mui tomare hoiong. Mosir Niomanot, muniguno boiunot ar Gido boibuot mor sombonde lega agede beg hodagani puron oi pebo.”
45 Sebeden Sastro hodagani thara buji paron para, the tharar monani huli dilo. 46 Ar the tharare holo, “Sastroie ien hoi, Kristo dug-hosto pa poribo ar tin dine morattun jiei udibo. 47 Jerusalemortun dhori beg jado sidu tar nage pabottun mon phiriena ar pabottun mab panagan prosar gori pebak. 48 Ei hodagani shakkidie olade tumi. 49 Suno. Mor Babe jien dibar protiggia gorsie sien mui tomar idu dipadem. Hintu sorgottun tomar ugure hemoda no eje song tumi Jerusalem sohorot barsei thagkuo.”
Jisu Sorgot Udilogoi
Mak 16:19 -20; Apo 1:9 -11
50 Ar Jisu tharare Bethani adam song nejeilo. The tar adtani alok gorinei tharare asirbad dilo. 51 The tharare bor dede, tare tharattun pharok gora olo ar sorgot neja olo. 52 Thara Jisure tobona goranar porendi, baari hujhi gori thara Jerusalem sohorot phiri elak. 53 Mondirbuot Itchiorore donniobad dinei ar baini gori-gori thara somoi hadeilak. Amen.