1 Jɔɔŋ 4

Mbɛɛ nnu i kə̀nə Fiana Chu bə nnu i dùŋ kə kənə

Bəmbweŋ bəŋŋ bə tɔ́ŋ, bə kə bemi bə mbɛɛ mənhliŋ nnu i yɔ̀ɔ lə fieŋ ffɨŋ i yɔ̀ɔ fu ə Fiana Chu mə. Bə mɔŋ fiana yo bəŋəŋ ləə ə Chu lə. N'yɔ̄ɔ nəni yulahalə bəne bbəŋ bə́ kàalə yo lə bə́ dùŋ bəne bə hlɨŋ Chu fwoo gəŋ ə mbiŋ nu mə kiŋaaŋkə. 2 Fieŋ ffɨŋ fi dùŋ ə fi fə ə bə kələ Fiana Chu ə mbɛɛ go lə fɨhŋ: Mbɛɛ mənhliŋ nnu i yɔ̀ɔ bə kijə kiih lə Jisho Kleto mà bwoo yaŋ mbiŋ nu nte ye mbɛɛ ŋkee lə, ə mbini yo mbɛɛ nnu i kə̀nə Fiana Chu. 3 Mbɛɛ mənhliŋ nnu i kə yɔɔ lə nəni ki Jisho ə nnu i kə̀nə fiana nnu i dùŋ kə duŋ nə Chu kə. Mbini yo fiana lə mbɛɛ nnu i kə̀nə yo tɔŋ liyi bə Kleto, nnu bə mà wo yo ba lə i yá yi bwo, fidiɛɛ i bwoo dəŋ yaŋ mbiŋ nu nte. 4 Bwɔni bəŋŋ, bə dùŋ bəne bə Chu, bə kɨŋna dəŋ bəne bə mu bie. Bə kɨ̀ŋ bə́ yulahalə Fiana nnu i dùŋ yo ə bəŋ mə kah nnu i duŋ yo yaŋ ə mbiŋ nte. 5 Bie bəne dùŋ bə mbiŋ nu. Nəni bieŋ bbɨŋ bə́ yɔ̀ɔ dùŋ bi mbiŋ nu, bəne bbəŋ bə́ dùŋ bə mbiŋ nu wò bə bə́. 6 Kkə dùŋ ŋkwo ya bəne bə Chu. Mbɛɛ mənhliŋ nnu i kə̀lə Chu i wò bə be, bə nnu i dùŋ yo kə duŋ nə mbɛɛ Chu wò lə ŋkwo wi bə be kə. Fiee fieŋ ffɨŋ fi fə fie kkə hlə kələ fiana nnu i dùŋ yo kichɛɛŋ bə yo kaalənə.

Chu dùŋ Chu kinleki

7 Bəmbwəŋ bəŋŋ bə tɔŋ, yee kkə lêki, yulahalə kinleki lə fieŋ fi Chu. Mbɛɛ nnu i lèki mbɛɛ ju, i dùŋ mbwee Chu, i kələ Chu. 8 Mbɛɛ nnu i dùŋ kə leki mbɛɛ ju kələ lə Chu kə. Fi dùŋ lə yulahalə Chu duŋ Chu kinleki. 9 Ni lə je nni Chu nyìi kinleki kiih ə be go bə yi: I mà faŋna Ŋiaani, ə duŋ kwaa wu ə mbiŋ nu mə fo kkə kənə kinduŋh kkɨŋ ki bwò ə wu kwáŋ. 10 Kinleki kkɨŋ ki dùŋ kinleki duŋ kɨhŋ nini lə. Ə be bbəŋ kkə mà leki Chu kə, ə Chu nnu i mà leki be. I faŋ Ŋiaani lə i bwo fə gbɛmi ə yíwaha yaa bəŋ.

11 Bəmbweŋ bəŋŋ bə tɔ́ŋ, ye Chu mà leki lə be ə je ni mə nəni, kəə kkə duŋ dəŋ lə yee kkə lêki go ŋiaa. 12 Mbɛɛ hləŋ həmə nnu i hlaala ŋəŋ ə Chu go. Ə yee kkə lêki go ŋiaa, ə Chu yee i dūŋ ə be bəŋ bwɔɔ mənhliŋ, ə kinleki kiih yee ki dūŋ ə be mə gəŋ kpee həŋgbɔŋ.

13 Kkə kələ lə kkə dùŋ ə wu mə bwɔɔ mənhliŋ, i dùŋ ə be mə, yulahalə i nəə be Fiana nnu i dùŋ wi. 14 Kkə mà ŋəŋna hlə yee kkə yɔ̄ɔ bə bəne lə Tah mà faŋna Ŋiaani lə i bwo duŋ Nchuu Fwoo mbiŋ nu. 15 Maa nyəhə nnu i yɔ̀ɔ bə kijə kiih lə Jisho lə Ŋwa Nchu, kəə Chu yo ə mbɛɛ yo mə bwɔɔ mənhliŋ, i dùhŋ dəŋ ə Chu mə. 16 Ye fi duŋ lə nəni, kkə kəla hlə bemi kinleki kkɨŋ Chu kə̀nə bə be.

Chu dùŋ Chu kinleki, mbɛɛ nnu i dùŋ ə kinleki mə bwɔɔ mənhliŋ, i dùhŋ ə Chu mə, Chu dùhŋ dəŋ ə wu mə bwɔɔ mənhliŋ. 17 Fieŋ ffɨŋ fi nyìi lə kinleki kie ə be mə gəŋ kpee həŋgbɔŋ duŋ fɨhŋ nini lə, kkə duŋ nə bə nɨŋ ki butuu bu nhlaah nu həŋgbɔŋ kə. Kkə lə bə nɨŋ kə yulahalə kkə dùhŋ ə mbiŋ nu mə ye Kleto lə. 18 Nɨŋ dùŋ nə ə kinleki mə kə. Kinleki kkɨŋ ki yiila gəŋ kpee həŋgbɔŋ fwoo nɨŋ bu fwoonə, yulahalə nɨŋ kənə lə fieŋ bənfə ə duŋ bə ŋgə nnu i duŋ ə bə́ nə bə mbɛɛ kə. Mbɛɛ nnu i kə̀nə nɨŋ, kə fiili ə kinleki mə gəŋ kpee həŋgbɔŋ kə. 19 Kkə lèki yulahalə ə màa Chu nnu i mà hlaa leki be. 20 Ə mbɛɛ yɔɔ lə i lèki Chu, kwaalə i baa i kə̀nə tɔŋ liyi bə maani, kəə i duŋ mbɛɛ yo kaalənə, yulahalə ə mbɛɛ lə duŋ lə i lèki lə maani nnu i ŋə̀ŋ ə wu go kə, ə yee i dūŋ kə lèki Chu nnu i dùŋ yo ə wu go kə ŋəŋ nə kə. 21 Ŋkɨnə nnu kkə mà kənə yo ə wu mə duŋ nu lə, mbɛɛ nnu i lèki Chu kənə dəŋ lə yee i lêki maani.