1 Jɔɔŋ 3

Kkə duŋ bwɔni bə Chu

Bə chiini ŋəŋ dɨŋ kinleki kiŋkuntaŋ kkɨŋ Tah ya nyiila kie bə be, bwo fə lə yee bə́ chēe be lə bwɔni bə Chu! Ə duŋ chɛɛŋ lə kkə duŋ bwɔni bə Chu. Fieŋ ffɨŋ bəne bbəŋ bə́ dùŋ ə mbiŋ nu mə duŋ kə kələ be duŋ yulahalə bə́ mà kə kələ dəŋ wu kə. 2 Bəmbweŋ bəŋŋ bə tɔŋ, fidiɛɛ kkə bie bwɔni bə Chu, kwaalə kkə kə kələ ba ye kkə yá duŋ lə kə. Fieŋ ffɨŋ kkə kə̀lə duŋ kwaa lə bwɔɔ nnu Kleto yá fu bwo, ə kkə yá duŋ ye wu lə, yulahalə kkə yá yi ŋəŋ ə wu go ye i duŋ lə. 3 Fi hlə yee fi dūŋ lə, mbɛɛ mənhliŋ nnu i kèe fwi ə wu go nəni i kənə bəŋ'wii gbo wiih bwɔɔ mənhliŋ yee i châa ye i chàa lə.

4 Mbɛɛ mənhliŋ nnu i fə̀ yiwaha bwùŋ ə duŋ ŋkɨnə Chu, yulahalə yiwaha duŋ ə duŋ ŋkɨnə nnu mbɛɛ bwuŋna. 5 Bə kələ lə Kleto mà bwo bənjə no bə yíwaha yí bəne, wu Kleto kənə lə yiwaha kə. 6 Mbɛɛ nnu i dùŋ ə Kleto mə, baalə fə yíwaha kə. Mbɛɛ nnu i bà bənfə yíwaha i mà kə ŋəŋ nə ə wu go kə ləkə kələ wu. 7 Bwɔni bəŋŋ, mbɛɛ kə fihi bəŋ kə. Mbɛɛ nnu i fə̀ fieŋ fintiiŋ i dùŋ ba mbɛɛ ntiiŋ dəŋ yəəŋ ye Kleto dùŋ lə mbɛɛ ntiiŋ. 8 Mbɛɛ nnu mə lə ba yee i fə̂ yíwaha lə mbɛɛ hlaata, yulahalə hlaata nu màa i fə̄ yíwaha chɔɔ jə həmɛɛ. Fieŋ ffɨŋ Ŋwa Nchu mà bwo fie mà duŋ lə i bwo ləhə laa ními ŋə hlaata. 9 Mbɛɛ nnu i dùŋ mbwee Chu fə lə yiwaha kə, yu fieŋ finhliŋ ffɨŋ Chu duŋ ə fi mə duŋ ə wu mə bwɔɔ mənhliŋ, duŋ ə yee i baa i fə̀ yiwaha kə, yulahalə i dùŋ mbwee Chu. 10 Fieŋ ffɨŋ duŋ ə fi fə ə yee kkə kə̄lə bəne bbəŋ bə́ dùŋ bwɔni bə Chu bə bbəŋ bə́ dùŋ bə hlaata duŋ fɨhŋ: Mbɛɛ mənhliŋ nnu i dùŋ kə fəə bieŋ ntiiŋ ləkə nnu i dùŋ kə leki maani, i duŋ nə ŋwa Nchu kə.

Yee kkə lêki

11 Hlɨŋ nni bə mà wo ye jə həmɛɛ duŋ ba ni lə, yee kkə lêki mbɛɛ mənhliŋ. 12 Kkə kə duŋ nə ye Kɛŋ lə kə. I mà duŋ ŋwa Hlaata mbɛɛ yiwaha yo, i hlə ja jii maani. I mà jii wu yulaha lə? I mà jii wu yu fwɔ wiih mà duŋ wiwaha, wi maani duŋ ntiiŋ. 13 Bəŋgwoŋ, gəə kə yee ki ŋɨ̂ŋ bəŋ lə bəne bbəŋ bə́ dùŋ bie bə mbiŋ nu bie bə́ kə̄nə tɔŋ ŋənyi bə bəŋ kə. 14 Kkə kələ lə kkə fwoo ə kpe mə lɛɛ ə duŋ ə kinduŋh mə, yu kkə lèki bəŋgwoŋ biaa. Mbɛɛ nnu i dùŋ maa kə leki maani i yu kaani ə kpe mə. 15 Maa mbɛɛ nwɛhɛŋ nnu i kə̀nə tɔŋ liyi bə maani, kəə mbɛɛ yo duŋ mbɛɛ nnu i jìi bəne. Bə kələ lə mbɛɛ nnu i jìi bəne kənə lə kinduŋh ki kə kaa ə wu go kə. 16 Fieŋ ffɨŋ fi nyìi be kinleki kkɨŋ ki dùŋ kinleki duŋ fɨhŋ ffɨŋ Kleto mà fə: I mà nəə kinduŋh kiih bəŋkpe yu be. Kkə duŋ dəŋ lə kkə nə kiaa kinduŋh yu bəŋgwoŋ biaa. 17 Ə mbɛɛ lə kənə bieŋ yaŋ ə mbiŋ nte, i ŋə̀ŋ ye maani jɨ̀nə, ə mə nakə wɛɛ kwáŋ ŋiih buwɛnə bə wu, kəə kinleki ki Chu dùŋ ə mbini yo mbɛɛ mə ləhəŋ lə? 18 Bwɔni bəŋŋ, kkə kə yee kkə lêki kwaa bə kijə ləkə bə biyɔɔnə kwaa kə. Yee kkə lêki bə kichɛɛŋ, kkə nyìi ə fwɔ go.

19 Ə fieŋ ffɨŋ fi lə fə ə kkə hlə kələ lə kkə dùŋ bəne bbəŋ bə́ dùŋ bə kichɛɛŋ, ə fi baa fə lə yee kkə dīɛɛ tɔ́ŋ ŋiaa ə Chu fwi, 20 maa ə duŋ bwɔɔ nwɛhɛŋ nnu tɔ́ŋ ŋiaa hlaah be. Kkə kələ lə Chu ko kah tɔ́ŋ ŋiaa, i kə̀lə fieŋ finhliŋ. 21 Bəmbweŋ bəŋŋ bə tɔŋ, ə duŋ lə tɔ́ŋ ŋiaa hlaah lə be, ə kkə nakə kənə nɨŋ ji ə Chu fwi kə. 22 Ə kkə noŋ maa ə duŋ laha bə wu, ə i nə be yulahalə kkə wò bəŋkɨnə biih, kkə fə̀ bieŋ bbɨŋ gbo lə yee wi nūaa wu. 23 Bəŋkɨnə biih bəhŋ nini lə, yee kkə yîi tɔ́ŋ ə Ŋiaani Jisho Kleto mə, yee kkə lêki go ŋiaa mbɛɛ bə mbɛɛ dəŋ ye Kleto yɔ̀ɔ lə bə be. 24 Bəne bənhliŋ bbəŋ bə́ wò bəŋkɨnə bə Chu dùŋ ə wu mə bwɔɔ mənhliŋ, i dùŋ dəŋ ə bə́ mə. Fieŋ ffɨŋ fi fə lə yee kkə kə̄lə lə i dùŋ ə be mə bwɔɔ mənhliŋ lə Fiana wi nnu i nəə be.