1 Jɔɔŋ 2

Jisho lə gbɛmi wwuŋ wi làamə yíwaha yaa

Bwɔni bəŋŋ, mbīeŋ fieŋ fɨhŋ bə bəŋ fo bə lə nakə jaa fə yiwaha. Kwaalə, ə mbɛɛ ju lə ja fə yiwaha, kkə kənə mbɛɛ nnu mə lə kwi kwáŋ bə Tah ya ə be bəŋ, mbɛɛ nu lə Jisho Kleto nnu i dùŋ yo mbɛɛ ntiiŋ. 2 Ə wu gbɛmi wi laamə nə yíwaha yaa, gbɛmi wuhŋ kə duŋ nə yu yíwaha yaa kwaa kə, wi duŋ dəŋ yu bəne bənhliŋ bə yaŋ ə mbiŋ nu nte.

3 Ə yee kkə wō bəŋkɨnə bə Chu, ə fɨhŋ hlə yee fi nyīee kə naamə lə kkə kələ wu. 4 Mbɛɛ nnu i yɔ̀ɔ lə i kə̀lə Chu, kwaalə i kə chiee bəŋkɨnə biih kə, duŋ ŋwuŋ kaalənə yo, kichɛɛŋ lə wu mə kə. 5 Kwaalə, mbɛɛ nnu i chì die yi, ə mbini yo nnu i dùŋ mbɛɛ nnu i lèki Chu gəŋ kpee həŋgbɔŋ bə kichɛɛŋ. Fieŋ ffɨŋ duŋ ə fi nyiee kə naamə ə kkə hlə kələ lə kkə dùhŋ ə kimbumə mə bə Chu, duŋ fɨhŋ: 6 Ə mbɛɛ yɔɔ lə i dùhŋ bwɔɔ mənhliŋ ə Chu mə, kəə i dùŋ lə yee i jâa kwaa yəəŋ ə je nni Kleto màa i jāa ye ə yi mə.

Ŋkɨnə fwɔ

7 Bəmbweŋ bəŋŋ bə tɔ́ŋ, ŋkɨnə nnu mbīeŋ nu bə bəŋ lə ŋkɨnə fwɔ kə. Ə ŋkɨnə ko nnu bə mà kənə chɔɔ jə həmɛɛ. Ŋkɨnə ko nu lə hlɨŋ nni bə woo. 8 Kwaalə ŋkɨnə nnu n'yu mbīeŋ nu bə bəŋ ə ŋkɨnə fwɔ dəŋ. Kichɛɛŋ ki ŋkɨnə nu yu nyīee ə Kleto go maa dəŋ ə bəŋ go. Ŋkɨnə yo nyìi lə ə fwɔ yulahalə jɨbə kie ki kāh ki gə̄ŋ, kinchaa ki kichɛɛŋ chɔɔla bəntə. 9 Ə mbɛɛ lə yɔɔ lə, i dùŋ ə kinchaa mə, i baa i kə̀nə tɔŋ liyi bə maani, kəə i yu kaani ə jɨbə mə. 10 Mbɛɛ nnu i lèki maani duŋ ə kinchaa mə bwɔɔ mənhliŋ, ə fieŋ nakə duŋ nə ə wu go ffɨŋ duŋ ə yee fi fə̄ i jàa i dàka kə. 11 Kwaalə, mbɛɛ nnu i kə̀nə tɔŋ liyi bə maani yo ə jɨbə mə, i jàa ə ki mə i kə kə̀lə dɔhɔ kkɨŋ i gə̀ŋ kie kə, yulahalə jɨbə kie fəə i baŋna díi.

12 Bwɔni bəŋŋ, mbīeŋ bə bəŋ yulahalə bə́ laama nə ba yíwaha yeeŋ yu Kleto. 13 Bətah, mbīeŋ bə bəŋ yulahalə bə kəla wu nnu i mà duŋ yo həmɛɛ. Hlɔ́ŋ yiniɛ, mbīeŋ bə bəŋ yulahalə bə kɨŋna mbɛɛ waha yo. Bwɔni bəŋŋ, mbīeŋ bə bəŋ yulahalə bə kəla Tah ya. 14 Bətah, mbīeŋ bə bəŋ yulahalə bə kəla wu nnu i mà duŋ yo həmɛɛ. Hlɔ́ŋ yí bwɔni, mbīeŋ bə bəŋ yulahalə bə duŋ bəntaabə, die Chu ye ə bəŋ mə bwɔɔ mənhliŋ, bə kɨŋna mbɛɛ waha yo.

15 Nhlə n'yee ŋkēeh bəŋ lə, bə kə yee bə lêki mbiŋ nu ləkə bieŋ bi mbiŋ nu kə. Ə mbɛɛ yee i lēki mbiŋ nu, ə i nakə yee i lēki Tah ya kə. 16 Yee bə kə̂lə lə bieŋ binhliŋ ə mbiŋ nu mə bbɨŋ nyaŋ ni go kə̀nə ŋgɨŋ ə bi go, bə bbɨŋ díi kèe ŋə lèki, maa bbɨŋ bəne wè ə bi bəŋ ə kinduŋh kɨhŋ mə, ə kə duŋ nə bbɨŋ bi fù ə Tah go. Ə bi mbiŋ nu. 17 Mbiŋ nu yá kah, ə bieŋ bi mbiŋ nu bbɨŋ bəne yìi ŋgɨŋ ə bi go yá kah dəŋ. Kwaalə, mbɛɛ nnu i fə̀ ə duŋ fieŋ ffɨŋ Chu kìɛɛ lə ba həmə bwɔɔ mənhliŋ.

Bəne bbəŋ bə́ kə̀nə tɔ́ŋ ŋənyi bə Kleto

18 Bwɔni bəŋŋ, bwɔɔ nu lə bwɔɔ nnu həŋgbɔŋ. Ye bə mà wolə lə mbɛɛ nnu i kə̀nə yo tɔŋ liyi bə Kleto yá yi bwo, fidiɛɛ duŋ lə bəne bbəŋ bə́ kə̀nə tɔ́ŋ ŋənyi bə Kleto bwoo kiŋaaŋkə. Fiee fieŋ ffɨŋ fi fə fie kkə hlə kələ lə bwɔɔ nu lə bwɔɔ nnu həŋgbɔŋ. 19 Bəne bəhŋ mà fu ə be mə, kwaalə, bə́ mà kə duŋ nə bəne biaa kə. Ə bə́ màa duŋ bəne biaa, ə bə́ màa ba yee bə́ dūŋ bə be. Nəni bə́ hlə fu fo fi lə nyiee ba wɛɛŋ lə mbɛɛ ju ə bə́ mə duŋ nə ya kə. 20 Bə duŋ ŋkwo weŋ Wu nnu i dùŋ yo Wɛɛŋ i lɔɔla^ª bəŋ, yee bəŋ bənhliŋ kə̀lə kichɛɛŋ. 21 Mbīeŋ nə bə bəŋ yulahalə bə naamə lə kichɛɛŋ kə. Mbīeŋ yulahalə bə kə̀lə kichɛɛŋ, bə kə̀lə dəŋ lə yo kaalənə duŋ ə i fu ə kichɛɛŋ mə kə. 22 Mbɛɛ nnu i kàalə yo lə nwɛhɛŋ lə? Ə nnu i nɨ̀hŋ yo lə Jisho duŋ nə Nchuu Fwoo nnu Chu mà kaachi kə. Mbɛɛ nnu i nɨ̀hŋ yo Tah Chu bə Ŋiaani ə wu mbɛɛ nnu i kə̀nə yo tɔŋ liyi bə Kleto. 23 Mbɛɛ nnu i nɨ̀hŋ Ŋiaŋ kənə lə kimbumə bə Che Ŋiaŋ yo kə. Mbɛɛ nnu i yɔ̀ɔ bə kijə kiih lə i bèmi bə Ŋiaŋ, ə wu nnu i kə̀nə dəŋ kimbumə bə Che Ŋiaŋ. 24 Bə chi fieŋ ffɨŋ bə mà wo fie həmɛɛ yee fi dûŋ bə bəŋ bwɔɔ mənhliŋ. Ə bə chi fieŋ ffɨŋ bə mà wo fie həmɛɛ yee fi dûŋ bə bəŋ bwɔɔ mənhliŋ, ə yee bə dûŋ bwɔɔ mənhliŋ bə Ŋiaŋ maa bə Tili. 25 Fieŋ ffɨŋ Kleto kaachi be mu lə kinduŋh ki kə kaa.

26 Mbīeŋ bieŋ bɨhŋ bə bəŋ ə duŋ ki bəne bbəŋ bə́ kìɛɛ lə yee bə́ fīhi bəŋ. 27 Kwaalə nlɔɔ nnu bə mà kənə yo ə Kleto go duŋ bə bəŋ bwɔɔ mənhliŋ, bə baalə kiɛɛ mbɛɛ ju nnu i duŋ lə i baa laanə bəŋ kə. Ye nlɔɔ wi nu làanə lə ba bəŋ ki bieŋ binhliŋ, nlɔɔ nu duŋ kichɛɛŋ, i kaalə lə yo kə, yee bə dûŋ bwɔɔ mənhliŋ ə Kleto mə dəŋ yəəŋ ye nlɔɔ nu làanə lə bəŋ.

28 Fidiɛɛ bwɔni bəŋŋ, bə ba dəŋ yee bə dûŋ bə wu bwɔɔ mənhliŋ fo bwɔɔ nnu i yá fu bwo, ə kkə kənə tɔ́ŋ ŋə ŋəŋnə ə wu go, kahiŋ lə yee kkə nīmi bu niminə bə giaali. 29 Ə bə kələ ba lə i duŋ mbɛɛ nnu i fə̀ bieŋ ntiiŋ, kəə bə kələ dəŋ lə mbɛɛ mənhliŋ nnu i fə̀ fieŋ fintiiŋ duŋ ə duŋ mbwee wi.