Kiŋwaati ki fwii ki
Jɔɔŋ
Die nni i nə̀ kinduŋh
1
Fieŋ ffɨŋ kkə bieŋ fɨhŋ duŋ ki Die nni i nə̀ kinduŋh kkɨŋ ki mà duŋ həmɛɛ. Die ni duŋ nni kkə mà woo bieŋ bbɨŋ i màa i yɔ̄ɔ, ŋəŋ ə yi go bə díi ŋiaa, kkə chiini ye i duŋ lə, tuu ə yi go bə kwáŋ ŋiaa. 2 Kinduhŋ kɨhŋ duŋ kkɨŋ bə́ mà nyii be, kkə ŋəŋ ə ki go, hlə yee kkə yɔ̄ɔ ki ki, kkə dòntə bəŋ ki kinduŋh ki kə kaa kɨhŋ, kkɨŋ ki mà duŋ bə Tili, i hlə bwo nyii bə be. 3 Ə fimbini fie ffɨŋ kkə mà ŋəŋ baa wo, ə fi ffɨŋ kkə dòntə dəŋ bə bəŋ fo bə lə yee bə kə̄nə kimbumə bə be. Kimbumə kiaa kɨhŋ duŋ bə Tah ya maa bə Ŋiaani Jisho Kleto. 4 Kkə hlə yee kkə bīeŋ fɨhŋ fo kinjənjə kiaa lə yee ki dūŋ kkɨŋ ki yiila.Yee kkə dûŋ ə kinchaa kie mə
5 Ni lə hlɨŋ nni kkə mà wo bə wu, kkə hlə yee kkə yɔ̄ɔ bə bəŋ lə, Chu duŋ kinchaa, jɨbə duŋ nə ə wu mə kə dududu. 6 Nəni, ə kkə yɔɔ lə kkə dùhŋ mbuhuŋ bə wu, kwaalə kkə kaka yee kkə jāa chuu ə duŋ ə jɨbə mə, kəə kkə kaalə yo bu kaalənə, kkə duŋ nə bələ kichɛɛŋ kə. 7 Kwaalə, ə kkə lə jaa ə kinchaa mə ye i dùŋ lə ə kinchaa mə, kəə duŋ ə yee kkə dūŋ mbuhuŋ bə mbɛɛ bə mbɛɛ, ə ŋgɔŋ mə Ŋiaani Jisho yee mə wīi be kkə chàa ə yiwaha yaa mə yinhliŋ. 8 Ə kkə lə yɔɔ lə kkə kənə lə yiwaha kə, kəə kkə fìhi ə duŋ go ŋiaa, kichɛɛŋ hləŋkə ə be mə. 9 Kwaalə, ə kkə lə yɔɔ yíwaha yaa bə wu, ye i dùŋ lə ba mbɛɛ nnu i lèmi ə die yi bəŋ baa fə bieŋ yəəŋ, ə i laamə nə yíwaha yaa wii be, ə kkə chaa wɛɛŋ ə fwɔ waa mə wunhliŋ wwuŋ wi dùŋ we kə duŋ nə ba ntiiŋ. 10 Ə kkə lə yɔɔ lə, kkə kə fəə yiwaha kə, kəə kkə jə̀ wu lə i duŋ ŋwuŋ yo kaalənə, ə die yi nakə kənə dɔhɔ ə be mə kə.