1 Jɔɔŋ 5

Mbɛɛ nnu i kɨ̀ŋ mbiŋ nu duŋ nnu i bema Jisho

Mbɛɛ mənhliŋ nnu i bèmi lə Jisho lə Nchuu Fwoo nnu Chu mà kaachi yo duŋ mbwee Chu, mbɛɛ mənhliŋ nnu i lèki mbɛɛ, duŋ ə yee i lēki dəŋ mbwee mbɛɛ yo. 2 Fieŋ ffɨŋ fi fə̀ kkə hlə yee kkə kə̄lə lə kkə lèki bwɔni bə Chu lə bwɔɔ nnu kkə lèki Chu kkə wò bəŋkɨnə biih. 3 Yee bə kə̂lə lə bənleki Chu duŋ bəŋ'wo bəŋkɨnə biih, bəŋkɨnə biih duŋ nə ntiɛ kə, 4 yulahalə mbɛɛ mənhliŋ nnu i dùŋ mbwee Chu, duŋ nnu i kɨ̀ŋ mbiŋ nu bu kɨŋnə. Kkə kɨ̀ŋ mbiŋ nu bə kimbemi kiaa. 5 Mbɛɛ nnu i kɨ̀ŋ mbiŋ nu lə nwɛhɛŋ lə? Ə nnu i bèmi yo lə Jisho dùŋ Ŋwa Nchu.

Bieŋ bbɨŋ bi lèmi ə kidɨŋ ki nhlaah Jisho mə

6 Jisho Kleto mà bwo ə mbiŋ nu mə, i kah ə ŋgwiŋ mə bə ə ŋgɔŋ mə. I mà kə kaah kwaa ə duŋ ə ŋgwiŋ mə kə. I mà kah ə ŋgwiŋ mə bə ə ŋgɔŋ mə. Fiana Wɛɛŋ lèmi ə kidɨŋ ki nhlaa nu bəŋ yulahalə Fiana yɔ̀ɔ kichɛɛŋ. 7 Bieŋ bie həmə bitɔh bbɨŋ bi lèmi ə kidɨŋ ki nhlaa nu mə. 8 Bieŋ bɨhŋ duŋ Fiana Wɛɛŋ, ŋgwiŋ bə ŋgɔŋ. Bieŋ bi bitɔh bɨhŋ binhliŋ duŋ ə fieŋ bəŋ fimwi.^ª 9 Kkə bwo kkə bèmi fieŋ ffɨŋ mbɛɛ ŋkee yɔ̀ɔ bə be. Kwaalə, fieŋ ffɨŋ Chu yɔ̀ɔ dili kah fi mbɛɛ ŋkee. Yee bə kə̂lə lə fɨhŋ lə fieŋ ffɨŋ Chu yɔ̀ɔ bə be, i lèmi ə kidɨŋ ki nhlaa Ŋiaani bəŋ. 10 Mbɛɛ nnu i bèmi bə Ŋwa Nchu, i kə̀nə fieŋ ffɨŋ Chu mà yɔɔ fɨhŋ ə wu go. Mbɛɛ nnu i dùŋ kə bèmi bə Chu fə̀ Chu duŋ mbɛɛ yo kaalənə, yulahalə i kə bemi fieŋ ffɨŋ Chu yɔ̀ɔ bə be ki Ŋiaani kə. 11 Yo ni duŋ lə Chu nəə be kinduŋh ki kə kaa, kinduŋh kɨhŋ fù ə Ŋiaani mə. 12 Mbɛɛ nnu i kə̀nə Ŋwa Nchu ə wu mə, i yo bə kinduŋh kie, mbɛɛ nnu i dùŋ kə kənə Ŋwa Nchu ə wu mə, mə lə bə kinduŋh kie kə.

Bəne bbəŋ bə́ kəna kinduŋh ki kə kaa

13 Mbīeŋ bieŋ bɨhŋ bə bəŋ bbəŋ bə́ bema bie bə Ŋwa Nchu, fo bə lə kələ lə bə kəna kinduŋh ki kə kaa. 14 Kkə duŋ nə bə nɨŋ bəmbaŋ gəŋ ə Chu fwi noŋ fieŋ bə wu kə, yulahalə bwɔɔ nnu kkə nòŋ fieŋ, kkə nòŋ kkə bə̀lə ye i kìɛɛ lə, i wò fieŋ ffɨŋ kkə yɔ̀ɔ fie. 15 Ə kkə kələ lə i yu wō fieŋ ffɨŋ kkə yɔ̀ɔ bwɔɔ nnu kkə nòŋ maa ə duŋ filaha bə wu, ə kkə hlə kələ dəŋ lə kkə kəna fieŋ ffɨŋ kkə nòŋ fie bə wu.

16 Ə mbɛɛ ju lə ŋəŋ ye maani fə yiwaha yyɨŋ yi duŋ ə yi fə ə i kpe bu kpenə, i nòŋ lə Chu nə wu kinduŋh. Fɨhŋ duŋ bə mbɛɛ nnu yiwaha yiih kə duŋ nə yyɨŋ yi duŋ ə yi fə ə i kpe kə. Yiwaha yidi ye həmə yyɨŋ yi duŋ ə yi fə ə mbɛɛ kpe bu kpenə. Ŋkə yɔɔ lə lə mbɛɛ chee Chu bə yimbini ye kə. 17 Fwɔ wiwaha winhliŋ lə yiwaha, kwaalə yiwaha yidi ye həmə yyɨŋ yi duŋ kə fəə lə mbɛɛ kpe bu kpenə kə.

18 Kkə kələ lə mbɛɛ nnu i dùŋ mbwee Chu duŋ ə i baa yee i fə̂ yíwaha kə, yulahalə wu nnu i dùŋ yo Mbwee Chu fwòŋ wu, ə mbɛɛ yiwaha yo nakə baa lə tuu ə wu go kə. 19 Kkə kələ dəŋ lə kkə dùŋ bəne bə Chu, bəne bənhliŋ bbəŋ bə́ dùŋ bə mbiŋ nu duŋ ə kwáŋ ŋə muŋga mu mbɛɛ yiwaha yo mə.

20 Kkə kələ lə Ŋwa Nchu bwoo wɛ bufe bwaa bəŋkələ wu Chu kichɛɛŋ yo. Kkə dùŋ ə wu nnu i dùŋ yo kichɛɛŋ ye kkə dùŋ lə ə Ŋiaani Jisho Kleto mə. Ə wu nnu i dùŋ Chu kichɛɛŋ, ə duŋ wu kinduŋh ki kə kaa.

21 Bwɔni bəŋŋ, yee bə jə̂ bwɔɔ bə bəcheh bənya bie.