1 Pita 1

Kiŋwaati ki fwii ki

Pita

Kiŋwaati kɨhŋ bieŋ mi Pita mbɛɛ faŋnə Jisho Kleto. Mbīeŋ bə bəne bbəŋ Chu shaa lə bə́ dùŋ biih bbəŋ bə́ hlaama gəŋ yee bə́ dūŋ ye nfúuntə lə ə wɛ́ɛ ŋə Pwɔntu, Galeshia, Kapadoshia, Ɛshia maa Bitinia mə. 2 Chu Tah ya mà shaa bəŋ ye i mà kələ lə ə kaani lə fi yá bwo duŋ. Fiana wi hlə bwɛɛ bəŋ chi chili fo bə yá bwo wo bə Jisho Kleto, ə bə́ shaali bəŋ bə ŋgɔŋ miih. Chu nyii tɔŋ liih linwaa bə bəŋ gbaaŋ, baa nə dəŋ bəŋ kindunshiiŋ.

Kkə kèe kwaa ə duŋ yaa fwi

3 Yee kindohi dûŋ bə Chu, nnu i dùŋ yo Chu i baa duŋ Che Baba ya Jisho Kleto. I bweela be bwee lifwɔ ye Jisho Kleto mà fulə ə kpe mə, ə fə hlɨŋ yiih yi kwonə gbaaŋ bə be. Fɨhŋ nini fəə yee kkə dūŋh fidiɛɛ kkə kèe kwaa ə duŋ fwi, 4 bəmbwo di bishələ bbɨŋ i kila yu bəŋ ə mbiŋ nnu buh mə. Bishələ bɨhŋ duŋ ə bi fwɔ kə, ləkə bee, ləkə kpe nche kə. 5 Chu fwòŋ bəŋ bə muŋga mwii bəŋgəŋ bwii ə kinfukwoo kkɨŋ i bwɛɛla chi lə ki yá nyiee bwɔɔ nnu dɨŋ. I fwòŋ i kàh ə tɔ́ŋ ŋŋəŋ bə yiila ŋie ə wu mə. 6 Ye bə kələlə nəni, yee bə wô njənjə. Kwaalə bə kənə dəŋ bəŋ'wo nlogo ə bwɔɔ bəŋ chɛɛ yu bimɔŋnə bbɨŋ bi bwò ə bəŋ mə ə jé mə chili chili. 7 Bi bwò bəmɔŋ ŋəŋ ləə tɔ́ŋ ŋŋəŋ bə yiila ŋie ə Chu mə lə ə ŋə yəəŋ lə. Bə́ bwò bə́ mɔ̀ŋ dəŋ maa chwaa ki kpo ki ge bə bwii, chwaa kɨhŋ duŋ fieŋ ffɨŋ duŋ ə fi bee. Ye fi duŋ lə nəni kəə duŋ ə bə́ mɔŋ dəŋ tɔŋ llɨŋ bə yiila le ə Chu mə, yulahalə tɔŋ lɨhŋ duŋ fieŋ ffɨŋ fi kàh chwaa ki kpo ki ge. Nəni, bwɔɔ nnu ə yá duŋ butuu bbuŋ Jisho Kleto yá nyii gbo wiih, ə yee bə́ dōhi bəŋ, bə́ fàŋ kiŋkohi kieeŋ, bə́ bwɔ̀kwe bə bəŋ. 8 Bə bie bə lēki Jisho Kleto bə kaani maa dəŋ kə hlaa lə ŋəŋ ə wu go kə, bə bie bə bēmi wu fidiɛɛ bə kaani kə hlaa lə ŋəŋ ə wu go kə. Bə hlə yee bə wō njənjə ŋkuntaŋ nnu duŋ ə mbɛɛ nakə yɔɔ lə kə, 9 yu bə bie bə kə̄lə lə ye bə yiilə tɔ́ŋ ə wu mə, fieŋ ffɨŋ fi yá bwo dɨŋ yá duŋ kinfukwoo ki bəfiana bieeŋ. 10 Bəne bə hlɨŋ Chu bbəŋ bə́ màa bə́ yɔ̄ɔ ki kinleki ki Chu kkɨŋ i mà duŋ bəmbwo nyii bə bəŋ, bə́ màa bə́ fwīilə bə́ jù bəŋkələ ki kinfukwoo kɨhŋ. 11 Fiana Kleto mà duŋ ə bə́ mə ye bə́ mà yɔɔlə lə Kleto yá yi wo ŋgə, bwɔɔ nnu dɨŋ, ə i kənə kiŋkuntaŋ. Bə́ hlə yee bə́ fwīilə bəŋkələ bwɔɔ nnu bieŋ bie yá duŋ, bə jé yyɨŋ bi yá jaa ə yí mə hlə bwo duŋ. 12 Chu hlə fə bə́ kələ lə bə́ mà kə yɔɔ lə bieŋ bɨhŋ ə duŋ ə bə́ go kə, lə bi mà duŋ yu bəŋ. Ə duŋ bi bbɨŋ bə mà wo ə biwu bi bəne bbəŋ bə́ màa bə́ dōntə hlɨŋ nwaa ki Kleto ni bə bəŋ bə muŋgeni mu Fiana Wɛɛŋ nnu Chu mà faŋ i bwo buh. Bɨhŋ lə bieŋ bbɨŋ maa dəŋ bənchinda bə Chu màa bə́ dē bəŋkələ.

Yee bəne bə Chu châa ə fwɔ́ ŋəbə mə

13 Ye fi duŋ lə nəni, bə bwɛɛ chi bufe bweeŋ, kwaa bicha bieeŋ. Yee bə fwôŋ go ŋieeŋ, bə kèe kwaa fwi ntakə ə kinleki kkɨŋ ki yá bwo ə bəŋ go bwɔɔ nnu Jisho Kleto yá baa nyii gbo wiih. 14 Yee bə wô bə Chu ye bwɔni biih lə. Bə kə yee bə fə̂ bieŋ biwaha bə bə̀lə ye go ŋieeŋ kìɛɛ lə kə, ye bə màa bə hlaa fə̄lə bwɔɔ nnu bə mà kaani ə jɨbə mə. 15 Ye wu nnu i mà shaa yo bəŋ duŋ lə wɛɛŋ, yee bə dûŋ dəŋ wɛɛŋ ə fwɔ́ ŋieeŋ mə ŋənhliŋ, 16 ye fi duŋ bə́ bieŋna lə,

“Yee bə dûŋ wɛɛŋ yu ndùŋ wɛɛŋ.”

17 Ye bə chèelə lə Chu dùŋ Chwa weŋ, ə duŋ wu nnu i hlàah mbɛɛ mənhliŋ ə fwɔ wiih mə kə nyii lə kichili kə, kəə bə duŋ lə yee bə dūŋh kinduŋh kieeŋ bə lɔ̀ Chu bwɔɔ mənhliŋ ye bə duŋ lə yaŋ ə mbiŋ nu nte ye nfúuntə lə. 18 Bə kə kələ lə Chu mà yah bəŋ ə kinduŋh kinya kkɨŋ bəchwa bieeŋ mà koo kie bəŋ bə ki kə lə, i mà kə yaah bəŋ ə duŋ bə fieŋ ye kpo wwuŋ duŋ ə wi bee kə. 19 I mà yah ə duŋ bə ŋgɔŋ mə Kleto mməŋ mə dùŋ kə duŋ nə fieŋ finya kə, mməŋ mə dùŋ ye ŋwa nshɔŋ nnu i dùŋ ntofi, kə kənə fieŋ fidi fiwaha ə wu go kə. 20 Chu mà shaa wu mbiŋ kaani kə duŋ nə kə, nyii wu ə joo ŋə həŋgbɔŋ ŋəhŋ mə yu bəŋ. 21 Ə fə Kleto bə hlə bemi bə Chu nnu i mà fwoo yo wu ə kpe mə, nə wu kiŋkuntaŋ. Ye i fələ nəni, tɔ́ŋ ŋieeŋ bə munhlenə mweeŋ hlə yee mwi dūŋ ə duŋ bə chiee ə Chu mə. 22 Ye bə wòlə ba kichɛɛŋ, ki fə̀ bəfiana bieeŋ bə chàa fo bə lə yee bə kə̄nə kinleki bə bəmwaa bieeŋ ə duŋ bə kichɛɛŋ, yee bə lêki kwaa nəni bə tɔ́ŋ ŋieeŋ ŋənhliŋ. 23 Yee bə kə̂lə lə bə́ baala bwee bəŋ bwee lifwɔ kə. Wu nu i bwèe yo bəŋ kpèlə kə. Ə Chu kibɛɛ nnu duŋ ə i nakə kpee kə. I bwèe bəŋ ə duŋ bə die yi nni i nə̀ kinduŋh. Die yi ni lə ba həmə yee i dūŋ kə kaa. 24 Fi duŋ ye bə́ mà bieŋ lə ə Kiŋwaati ki Chu mə lə,

“Maa mbɛɛ ŋkee mənhliŋ dùŋ ye biyaa lə,

kinwaa kiih dùŋ dəŋ ye binchɔŋ bi biyaa lə.

Biyaa bwo bi kpe bəkəə, binchɔŋ bie dəŋ dɨlə,

25 kwaalə die Baba lə yee i dûŋ kwaa bwɔɔ mənhliŋ.”

Die ni lə hlɨŋ nwaa ki Kleto nni bə́ mà donta bə bəŋ.