1 Pita 2

Ki Tə li kinduŋh bə kitɨŋ ki wɛɛŋ

Fi hlə yee fi dūŋ lə, bə tukwaŋ ə tɔ́ŋ ŋəŋ'waha go ŋənhliŋ, bə tukwaŋ dəŋ ə fihinə go kinhliŋ maa yo kaalənə go, bə tukwaŋ ə bimi bi luhuŋnə go maa bə biyɔɔnə biwaha binhliŋ ki bəne. 2 Yee bə kə̂nə ba hlɔɔ biŋ ŋə wɛɛŋ, ə duŋ ŋə fiana yəəŋ ye muŋiaa muŋ'wɛ bwòlə mu kə̀nə hlɔɔ bəmwaŋ biŋ ŋŋəŋ ŋə dùŋ wɛɛŋ ŋə fiana fo go ŋieeŋ lə yee ŋə fə̄ bə kò bəmbwo kənə kinfukwoo. 3 Yee bə fə̂ nəni ye bə mɔŋna lə ŋəŋ lə Baba duŋ nwaa. 4 Yee bə bwô ə Kleto go nnu i dùŋ yo Tə llɨŋ li kə̀nə kinduŋh, llɨŋ bəne mà nɨhŋna le lə li nwaalə kə, kwaalə Chu shaa ŋkwo wi lə ə lintachuŋ bə wu. 5 Bəŋ dəŋ duŋ ye tə́ ŋŋəŋ ŋə kə̀nə kinduŋh, ŋŋəŋ Chu wɛ̀ɛ chəŋ ə fiana mə bə ŋə, fo bə lə yee bə dūŋ kintu ki bəche ntofi biih bə wɛɛŋ, bə fə̀ bəntofi bə bəfiana bə wu bbəŋ i lèki kah ə Jisho Kleto mə. 6 Fi duŋ ə Kiŋwaati ki Chu mə lə,

“Bə kee ŋəŋ, n'yu nchī tə ə kibalaki ki Jayɔŋ^ª mə,

ə duŋ tə li hə nchi chəŋ.

Ə tə llɨŋ nshaala, li tachuŋ gbaaŋ.

Tə lɨhŋ duŋ, ə mbɛɛ lə yii kwoo ə li mə, ə i yá de gbo kə.”

7 Bə bəŋ bbəŋ bə bèmi bie bə wu, tə lɨhŋ duŋ lintachuŋ bə bəŋ. Kwaalə bə bəne bbəŋ bə́ kə yii lə bie tɔŋ ə wu mə kə, fi duŋ bə bə́ ye bə́ bieŋ lə ə Kiŋwaati ki Chu mə lə,

“Tə llɨŋ bəne bə wɛɛnə mà nɨhŋ le,

bwoo chu tə llɨŋ duŋ ə bə́ wɛɛ nchi chəŋ mu.”

8 Fi baa duŋ bə́ bieŋna lə,

“Tə lɨhŋ lə yee li fə̄ bəne dàka ə li go.

Ə duŋ libwaa llɨŋ li lə yee li fə̄ bəne gbè.”

Bə́ dàka yulahalə bə́ nɨhŋna bəmbemi die Chu, ə duŋ ye Chu mà bwɛɛlə lə fi yá bwo duŋ. 9 Kwaalə, bə duŋ ŋkwo weŋ ŋkaani nnu Chu shaala. Bə dùŋ kintu ki bəche ntofi bbəŋ bə nɨ̀ŋ yu Ŋkɨŋ. Bə dùŋ kitɨŋ ki wɛɛŋ, bə dùŋ bəne bbəŋ Chu fəə lə ə biih, lə yee bə yɔ̄ɔ bieŋ binwaa bbɨŋ i fə̀. Ə wu nnu i diila bəŋ, lə bə fu ə jɨbə mə lɛɛ ə kinchaa kiih kiŋkuntaŋ mə. 10 Ə mà duŋ bwɔɔ nnu fwii bə kə duŋ nə bəne, fidiɛɛ bə bie ba bəne bə Chu. Bə mà kə tɨŋ nə jə hlɨŋ yi kwonə yi Chu kə, fidiɛɛ bə tɨŋna jə hlɨŋ yi kwonə yi Chu yɨhŋ.

Yee bəne bə Chu nyîi fwɔ winwaa ə bəne mə bənhliŋ

11 Bəmbweŋ bəŋŋ bə tɔ́ŋ, ye bə duŋ lə nfúuntə yyɨŋ yí nìmi ə nimi mə ə mbiŋ nu mə, nhlə n'yee ŋkwī bəŋ kwáŋ lə bə kə yee bə fə̂ ə duŋ bieŋ biwaha bbɨŋ nyaŋ nni go yeŋ kìɛɛ kə, yulahalə bieŋ bimbini bie jù bə bəfiana bieeŋ. 12 Yee bə nyîi fwɔ winwaa ə bəne mə bbəŋ bə́ dùŋ Chu kə kələ kə, fo maa ə duŋ lə bie bə́ chāa bieŋ ə bəŋ go lə bə duŋ bəne bəwaha, ə yee bə́ ŋə̄ŋ fwɔ weeŋ winwaa, ə yáa ə dūŋ bwɔɔ nnu Chu yá bwo, ə bə́ yáa bə́ nə̄ wu kiŋkohi.

13 Yu Baba, bə nə go ŋieeŋ bə mbɛɛ mənhliŋ nnu bə́ chiee lə yee i hlāah bəne. Bə nə go ŋieeŋ maa ə duŋ bə Ŋkɨŋ nnu Luŋ nnu i dùŋ Ŋkɨŋ ŋkuntaŋ, 14 ləkə maa bə bəne bbəŋ bə́ chìee lə yee bə́ hlāah bidi bi mbiŋ, bə chì bəne bbəŋ bə́ fə̀ bieŋ biwaha ə ŋgə mə, bə dòhi bbəŋ bə́ fə̀ bieŋ bintiiŋ. 15 Chu kiɛɛ lə yee bə fə̂ bieŋ bintiiŋ, fo bə lə yee bə bāŋ biwu bi bəne bənfili bbəŋ bə́ yɔ̀ɔ bieŋ bbɨŋ bə́ dùŋ kə kələ kə. 16 Yee bə dûhŋ ye bəne bbəŋ fieŋ duŋ kə kwaa lə bə́, kwaalə bə kə jəə fimbini fie fieŋ chi hə bushi yee bə fə̄ yíwaha kə. Yee bə dûhŋ ye bənfwa bə Chu lə. 17 Yee bə bwɔ̂kwe bə bəne bənhliŋ, bə lèki bəmwaa bieeŋ bə kimbemi bənhliŋ, bə lɔ̀ Chu, bə bwɔ̀kwe bə Ŋkɨŋ kiŋkuntaŋ nnu Luŋ.

Yee bəne bə Chu jə̂ kinfɛhiŋ gbo ə ŋgə Kleto go

18 Bəŋ bəne bbəŋ bə nɨ̀ŋ bə bəne bədi, yee bə nə̂ go ŋieeŋ bə bəne bbəŋ bə dùŋ ə bə́ kwe, bə bwɔ̀kwe bə bə́ gbaaŋ. Bə kə yee bə nə̂ go ŋieeŋ kwaa ə duŋ bə bbəŋ bə́ dùŋ shiiiŋ bə́ fwòŋ bəŋ kə. Yee bə nə̂ dəŋ bə bbəŋ bə́ dùŋ ŋaŋaŋa bə bəŋ. 19 N'yɔ̄ɔ nəni yulahalə Chu ba bəŋ'wo njənjə bə mbɛɛ nnu bə́ fɨ̀hɨŋ wu, i wò nlogo ə duŋ i kə gbee fieŋ kə, kwaalə i kwàa tɔŋ yulahalə i yiila bufe ə Chu mə. 20 Ə yee bə́ kwūŋ bəŋ ə duŋ lə bə biha fieŋ fidi, bə kwàa kwaa tɔŋ, ə bikoonə bi mu yee bi dūŋ laha lə? Kwaalə, ə yee bə wō ŋgə ə duŋ yu fieŋ finwaa ffɨŋ bə fəə, bə kwàa tɔŋ, ə Chu yee i wō njənjə bə bəŋ. 21 Ə dɔhɔ kieeŋ bəŋ'wo ŋgə nəni, yu Kleto mà woo dəŋ ŋgə yu bəŋ, i nyii bəŋ kinfɛhiŋ gbo lə bə bələ wuh ŋiih. 22 I mà kə hlaa lə fə yiwaha kə dududu, díe fie mà kə hlaa lə fu ə wu jə kə. 23 Bwɔɔ nnu bə́ màa bə́ tō wu, i nakə chuu lə bə bəntɔnɔ kə. Bwɔɔ nnu bə́ màa bə́ fɨ̀hɨŋ wu, i nakə biaanə bənnə bə́ ŋgə kə, kwaalə i nə fieŋ finhliŋ ə Chu kwáŋ nnu i kə̀lə yo bənhlaah bənhlaa yəəŋ. 24 Wu kibɛɛ mà too yíwaha yaa ə wu fi ə kiŋgwa go. I mà fə nəni, fo kkə lə kpe ga gbo be bee yiwaha ə yee kkə dūŋh ə kinduŋh kintiiŋ mə. Bibiaa biih bbɨŋ i mà kənə bie fəə bə ŋwuna. 25 Bə màa bə hlaa jaŋkə ye shɔ́ŋ lə, kwaalə fidiɛɛ bə fiima bwo ə Mbɛɛ nnu i Fwòŋ i Kèe dəŋ bəfiana bieeŋ.