Hiblu 12

Chu lɛ̀hiŋ bwɔni bbəŋ bə́ dùŋ biih

Ye kkə duŋ lə lə kintu ki bəne kkɨŋ ki mà yiila tɔ́ŋ ə Chu mə kaala be kunə bwo taa gbaaaŋ yee bə nyīi be ye duŋ ə mbɛɛ yii tɔŋ ə Chu mə, kkə fu dəŋ ə kindili kinhliŋ kwe kkɨŋ ki kə̀ə be, bə yíwaha yyɨŋ yí duŋ chəkə bənbini be, hlə kwaa biwɛɛ yee kkə lə̄lə lili llɨŋ Chu chiee ə be fwi. 2 Bwɔɔ nnu kkə lə̀lə, yee kkə bɛ̂ŋ díi ŋiaa ə duŋ ə Jisho go. Ə wu nnu i mà wɛ je ya bən'yii tɔŋ ə Chu mə, ə duŋ wu nnu i fə̀ tɔŋ llɨŋ kkə yìi le ə Chu mə yee li wūnə gəŋ kpee həŋgbɔŋ. I mà kwaala tɔŋ bemi bəŋkpe ə kiŋgwa go. I mà kə baa lə kee gbo wi beenə wi dɨŋ mbini ye kpe kə, yulahalə i màa i kēe fwi ə duŋ ə kinjənjə kkɨŋ ki dùŋ kie wu fwi. Fidiɛɛ i yo nnu i shiila ə kwaŋ wi diee wi kabala Chu bəŋ. 3 Yee bə hlê ki mbini yo mbɛɛ nnu i mà tɨŋ jə dɨŋ mbini yo ŋgə nnu bəne bəwaha màa bə́ nə̄ yo wu, fo fimbini fie lə nakə fəə lə yee tɔ́ŋ ŋīeeŋ dūŋ wɛɛɛ bwo fɨŋ ə je kə. 4 Ntɨmə nnu bə tɨ̀mə yo bə yiwaha duŋ bə kə tɨmə gəŋ bwii ye duŋ ə kiŋwuuni ki mbɛɛ nɔŋ kwe kə. 5 Nhle lə bə kə laamə ba keehnə kkɨŋ Chu nə̀ bə bəŋ ye bwɔni biih lə. I yu yɔ̄ɔ lə,

“Ŋiaa, bwɔɔ nnu Baba lɛ̀hiŋ wə, wə kə yee wə jə̂ kwe kə.

Ə mə chɔɔ bə wə ki fieŋ, gbo kə kpee wə kə.

6 Yee wə kə̂lə lə Baba lɛ̀hiŋ ə duŋ mbɛɛ nnu i lèki,

i kwùŋ ə duŋ ŋiaŋ mənhliŋ nnu i jə̀ lə ə wi.”

7 Nəni yee bə kwâa tɔ́ŋ bə bəŋgə bbəŋ bə ŋə̀ŋ ə bə́ go, bə kə̀lə lə Chu lɛ̀hiŋ bəŋ bu lɛhiŋnə ye bwɔni biih lə. Ŋiaŋ ju yo həmə nnu tili duŋ ə i nakə lɛhiŋ wu lə? 8 Ə Chu lə tukwaŋ ə bəŋ go lə nlɛhiŋ hləŋ ye i bwò lə i lɛ̀hiŋ bwɔni biih bənhliŋ, kəə bə kə duŋ nə ba bwɔni biih kə, kəə bə duŋ bwɔni bə bukpɛ. 9 Kkə kənə dəŋ bətah biaa bə yaŋ kwe bbəŋ bə́ màa bə́ bā bənlɛhiŋ be kkə bwɔ̀kwe bə bə́. Ə duŋ lə kkə màa kkə bwɔ̄kwe bə bə́ nəni, kəə duŋ ə kkə nakə nəə go ŋiaa bə Che bəfiana biaa kah nəni, bwo kənə kinduŋh ki kə kaa lə?

10 Bətah biaa mà lɛhaŋ be kwaa ə bwɔɔ bəŋ chɛɛ ye bə́ mà ŋəŋ lə lə fi fie yəəŋ bə bə́. Kwaalə Chu lɛ̀hiŋ be ə yinwaa yaa mə lə yee kkə dûŋ wɛɛŋ ye i dùŋ lə wɛɛŋ. 11 Bwɔɔ nnu bə́ kwùŋ mbɛɛ bənlɛhiŋ wu, i wo nlokə ə bwɔɔ yo bəŋ, i kə woo njənjə kə dududu. Bwɔɔ nnu ə bwo duŋ bwɔɔ nnu dɨŋ, fimbini fie bwo bə kindunshiiŋ maa fwɔ wintiiŋ bə mbini yo mbɛɛ nnu bə́ kèeh yo ə je ni mə.

12 Nəni, yee bə fə̂ kwáŋ ŋieeŋ ŋŋəŋ ŋə biaŋna ŋie ŋə chu ntata kə, fə dəŋ lə núh ŋieeŋ ŋŋəŋ ŋə nə̀nə ŋie ŋə chu ntata kə. 13 Bə fə jé yyɨŋ yí duŋ ntiiŋ yu wuh ŋieeŋ, fo wuh ŋŋəŋ ŋə nə̀nə ŋie lə nakə kaanə lɔɔlə fu kə, ə ŋə tata ə ntata mə.

Keehnə ki wonə Chu gbaaŋ

14 Yee bə jû gbaaŋ bənduŋ ə kindunshiiŋ mə bə bəne bənhliŋ, baa ju dəŋ gbaaŋ benduhŋ ə kinduŋh ki wɛɛŋ mə. Ə mbɛɛ lə nakə duŋ nə ə kinduŋh ki wɛɛŋ mə, kəə duŋ ə i ŋəŋ ə Baba go kə. 15 Yee bə jə̂ bwɔɔ bəŋəŋ lə mbɛɛ ju kə bwoo jɨnə bəŋkənə kinchɨnə ki Chu, yee bə kêe dəŋ lə ŋgɔ waha ju kə fwoo ə bəŋ mə nnu mə lə bwo bə bəŋgə yihi bəne mu kiŋaaŋkə kə. 16 Yee bə jə̂ bwɔɔ dəŋ lə mbɛɛ ju ə bəŋ mə kə kənə fwɔ wi nyɛninə wi kiwaali kə. Mbɛɛ kə nɨhŋ nə diɛɛnə ki Chu ye Ɛshawo mà taalə kinhləmə kiih kkɨŋ i mà duŋ lə i kənə ye ŋiaŋ cha lə yu kindi cha mi kwaa kə. 17 Bə kə kələ lə ə fimbini fie dɨŋ, i mà jaa bwo baa yee i kīɛɛ bəŋkənə kinhləmə kɨhŋ ə tili kwáŋ, tili nɨhŋ bu nɨhŋnə lə? Je gaanənə mà baala duŋ kə maa ye i màa i kīɛɛ lə kinhləmə kie bə ndəŋ dí nəni.

18 Yee bə kə̂lə lə dɔhɔ kkɨŋ bə lèmi kie fidiɛɛ kə duŋ nə ye dɔhɔ ki yaŋ kwe kkɨŋ bəne Bəishlael mà lemi kie həmə kkɨŋ duŋ ə mbɛɛ tuu ə ki go. Bə́ màa bə́ lēmi həmə,^ª bwii bīŋ lululu, kibweenə kəəla ki yī nəni tiii, kifwuŋ kàh dəŋ nəni kukuku. 19 Bə́ màa bə́ wō dəŋ ye kiŋgbu dē, die ji yɔ̄ɔ. Bieŋ bbɨŋ die ye màa i yɔ̄ɔ lɔ̄hiŋ bə́, yee bə́ kɔ̄nɔ lə die ye kə baa lə yɔɔ bə bə́ kə. 20 Bə́ màa bə́ kɔ̄nɔ nəni yulahalə fieŋ ffɨŋ die ye màa i yɔ̄ɔ fie mà kaah muŋga mubə. Die ye màa i yɔ̄ɔ i kɨ̀nə bə́ lə,

“Fieŋ kə baha ə kɔnɔ kɨhŋ go kə.

Ə duŋ maa nyaŋ, ə bə́ tɨŋ jii yi bə tə́.”

21 Chɛɛŋ, bieŋ bbɨŋ bə́ màa bə́ ŋə̄ŋ həmə màa biŋwi gbo gbaaŋ. Mushe kibɛɛ yɔɔ lə, “Nɨŋ ŋkuntaŋ fəə gbo jaa yee wi nə̄nə mi bu nənə nə.”

22 Bə duŋ ŋkwo weŋ nnu bə lèmi ə Kɔnɔ ki Jayɔŋ go, ə kibalaki ki Chu kkɨŋ ki kə̀nə kinduŋh, ki baa duŋ Jelushalɛŋ nnu buh. Ə duŋ həmə nnu kintu ki bənchinda bə Chu bə kiŋaŋ bbəŋ duŋ ə bə́ nakə faa tɔ duŋ bə́ tɨ̀ŋ ə kimbumə mə. 23 Bə bwoo ə kintu ki bəne bə Chu mə bbəŋ bə́ dùŋ bwɔni biih bə fwii fwii, ə duŋ i bieŋna yíi ŋəbə ə kiŋwaati kiih ki buh mə. Bə bwoo ə Chu fwi nnu i kaalə bənhlaa bə bəne bənhliŋ. Bə bwoo dəŋ ə bəfiana bə bəne bbəŋ bə́ mà duŋ ntiiŋ, bbəŋ Chu fəə bə́ lə yee bə́ chāa gəŋ kpee həŋgbɔŋ. 24 Bə bwoo dəŋ Jisho fwi nnu i lèmi yo fwi ə tɨmə kifwɔ kɨhŋ hənte bə Chu bə bəne, baa bwo dəŋ ə ŋgɔŋ mə Jisho fwi mməŋ bə́ mà shaala ə be go. Ŋgɔŋ məhŋ yɔ̀ɔ fieŋ ffɨŋ fi nùaa kah fi ŋgɔŋ mə Ɛbɛl.

25 Yee bə jə̂ bwɔɔ lə bə kə nɨhŋ nə bəmbemi bə mbɛɛ nnu i yɔ̀ɔ bə bəŋ kə. Bə hlè lə ə bəne Bəishlael mà kə fwoo kwoo ə ŋgə nnu i mà bwo yo ə bə́ go yulahalə bə́ mà nɨhŋna bəmbemi mbɛɛ nnu Chu mà shaa yo lə mə lə yee i yɔ̄ɔ bə bə́ yaŋ kwe, kah ə wu mə, kəə je ye həmə bə be bəmbaa fukwoo yaŋ kwe ə kkə nɨhŋ bəmbemi bə mbɛɛ nnu i yu yɔ̀ɔ yo bə be i duŋ buh lə? 26 Ə mà duŋ ə bwɔɔ yo bəŋ, i mà yɔɔla shishɔ nənə. Fidiɛɛ duŋ i kaala chi lə,

“Bwɔɔ nnu n'yá mbaa n'yee nnɛ̄hiŋ,

ə yá nənə kwaa shishɔ kə.

Buuli yá yi nənə dəŋ.”

27 Biyɔɔnə bɨhŋ lə, “Bwɔɔ nnu n'yá mbaa n'yee nnɛ̄hiŋ,” nyìi lə Chu yá yi jə no bə bieŋ binhliŋ bbɨŋ i mà fə bbɨŋ duŋ ə bə́ nɛhiŋ, fo ə yá she kwaa bieŋ bbɨŋ duŋ ə bə́ nakə nɛhiŋ kə. 28 Fi hlə yee fi dūŋ lə, yee kkə nə̂ kimbaafɛɛ bə Chu lə muŋkɨŋ mu Chu mmuŋ kkə tɨ̀ŋ jə mwe duŋ mmuŋ duŋ ə bə́ nakə nɛhiŋ mwi kə. Nəni yee kkə bwɔ̂kwe bə Chu ə je nni i bema ye mə, kkə nə̀ kiŋkohi bə wu, kkə lɔ̀ wu. 29 Yee kkə nə̂ nəni yulahalə,

“Chu ya duŋ ye bwii wwuŋ duŋ ə wi fii fieŋ bu fiinə.”