Hiblu 13

Keehnə ki həŋgbɔŋ

Yee bə lêki go ŋieeŋ bə gə̀ŋ fwi fwi ye bwɔni bə kpɛ lə. 2 Bə kə yee bə tûkwaŋ bəntɨŋ jə nfúuntə ə bəŋ kwuŋ kə. Yee bə kə̂lə lə bəne bədi tɨ̀ŋ jə nəni, bə́ tɨ̀ŋ jə ə duŋ bənchinda bə Chu kə kələ kə. 3 Yee bə hlê bəne bbəŋ bə́ dùŋ ə chəŋ munfwa mə, ə bu ye bə bie lə bəbə bənhliŋ mu chəŋ munfwa ye mə. Yee bə hlê dəŋ bəne bbəŋ bə́ chwà fwɔ bə bə́, ye ə duŋ lə lə bə bie bə fɨ̄mə bə bə́.

4 Yee mbɛɛ mənhliŋ nə̂ kiŋkohi bə biah. Mbɛɛ kə bihi kintaŋ ki biah kə. Yee bə kə̂lə lə Chu yá yi hlaah bəne bənhliŋ bbəŋ bə́ kə̀nə fwɔ wi kiwaali, maa bbəŋ bə́ shè biah bə́ fù bweenə.

5 Bə kə yii lə bufe bweeŋ ə kpo mə ə kinduŋh kieeŋ mə kə. Yee mbɛɛ wô njənjə bə fieŋ ffɨŋ i kə̀nə, yulahalə Chu mà yɔɔla lə,

“Duŋ ə n'yá ntukwaŋ ə wə go kə dududu,

dududu duŋ ə n'yá nlɛɛ tələ wə kə.”

6 Fɨhŋ hlə fə yee kkə yɔ̄ɔ kə naamə ye mbɛɛ ju mà yɔɔlə lə,

“Baba duŋ nchɨnə ŋgwəŋ.

Duŋ ə n'yee nlɔ̂ fieŋ kə.

Ə laha ffɨŋ duŋ ə mbɛɛ fə bə mi lə?”

7 Yee bə hlê bəne bbəŋ bə́ mà duŋ bəŋkafwi bbəŋ bə́ mà hlaa dontə die Chu bə bəŋ. Bə hle ye bə́ mà duŋ kinduŋh kibə gəŋ kpee həŋgbɔŋ, hlə yee bə bə̄lə jé yyɨŋ bə́ mà yii yé tɔ́ŋ ə Chu mə. 8 Jisho Kleto gaanə lə kə dududu. Ye i ma duŋ lə fogbu, ə lə dəŋ ye i duŋ daŋ, ə dəŋ lə ye mə lə yee i dūŋ bwɔɔ mənhliŋ.

9 Bə kə tookwaŋ lə bəne bwo bə dɨŋ bilaanənə bidi bbɨŋ mbɛɛ dùŋ kə kələ dɔhɔ kkɨŋ bi fù bwo lɛɛnti bəŋ mu kə. Fi nwaa lə yee tɔ́ŋ ŋiaa tâ yu kinchɨnə ki Chu bə be, kahiŋ bənduŋ yu bəŋkɨnə ki bidinə. Bəŋkɨnə bəhŋ chɨ̀nə lə maa bəne bbəŋ bə́ bə̀lə bə́ kə. 10 Kkə kənə taŋ li ntofi, bəche ntofi bbəŋ bə́ nɨ̀ŋ ə kikɔ ki Chu ki yaŋ kwe mə kənə lə muŋgeni bəndi fieŋ ffɨŋ fi fù ə taŋ lɨhŋ mə kə dududu. 11 Yee bə kə̂lə lə bə́ ba bənjə nyáŋ yyɨŋ kwoo ki bəche ntofi fəə ntofi bə ŋgɔŋ məyi ə Dɔhɔ kkɨŋ ki chàa kie ba Wɛɛŋ mə yu yíwaha yí bəne, fu bə yí ə kibalaki kie mə tɔŋ fii. 12 Jisho mà kpe dəŋ ə kibalaki bweenə fo mə lə wii yíwaha yí bəne bə ŋgɔŋ miih. 13 Nəni kkə fu bələ dəŋ wu mə bweenə bwo kənə dəŋ bəntɔnɔ bbəŋ i mà kənə bie. 14 Kkə kələ lə kibalaki kkɨŋ kkə dùŋ kɨhŋ ə ki mə fidiɛɛ duŋ ə kkə yá ba həmə yee kkə dūŋ bwɔɔ mənhliŋ kə. Kkə kèe fwi ə duŋ ə kibalaki kkɨŋ ki kaani kie ki bwō bu bwonə. 15 Nəni kkə gbe ə Jisho dɨŋ yee kkə fə̂ ntofi kindohi bə Chu bwɔɔ mənhliŋ ə duŋ fieŋ ffɨŋ fi fù ə be jə́ fi yɔ̀ɔ ki yii liih. 16 Bə kə yee bə lâamə nə bənfə bieŋ binwaa maa bəŋga bieŋ bieeŋ bbɨŋ bə kə̀nə bə bəne bədi kə. Ə yee bə fə̂ nəni, kəə ə ntofi nnu i nwaa bə Chu.

17 Yee bə wô bə bəne bbəŋ bə́ dùŋ bəŋkafwi bieeŋ, bə fə̀ ye bə́ yɔɔlə bə bəŋ, yulahalə bə́ fwòŋ bəfiana bieeŋ ye bəne bbəŋ bə́ kə̀lə lə bə́ tɨŋ ŋkɛ bə go ŋəbə bə Chu ki nimi libə. Yee bə fə̂ nəni fo bə́ lə yee bə́ fə̂ ními ŋəbə bə kintɨŋ, ə kə duŋ nə juu juu kə. Ə yee bə́ fə̂, bə́ jùuli ə njuuli mə, ə fimbini fie nakə yee fi chɨ̄nə bəŋ kə.

18 Yee bə chêe Chu bə be. Kkə kəla bə kichɛɛŋ lə biwɛɛ biaa hlaalə be ə fieŋ fidi go kə, yulahalə kkə ba bəŋkiɛɛ lə kkə fə fieŋ finhliŋ bə kiŋkohi. 19 Nnoŋ gbaaŋ lə yee bə chêe Chu, fo nlə ŋkee bənfiimə bwo ə bəŋ go.

Chu cheenə bə cheemənə

20 Chu nnu i dùŋ Chu kindunshiiŋ nnu i mà fwoo Jisho Baba ya nnu i dùŋ yo Nfwoŋ Shɔ́ŋ ŋkuntaŋ ə kpe mə. I mà fwoo i kah ə muŋgeni mu ŋgɔŋ mə tɨmə ki kə kaa mə. 21 Ŋkɔ̄nɔ lə i nə bəŋ bieŋ binwaa binhliŋ, fo bə lə yee bə fə̂ fieŋ finhliŋ ffɨŋ i kìɛɛ. Nnōŋ dəŋ lə yee i nɨ̂ŋ fieŋ finhliŋ ə be mə kah ə Jisho Kleto mə ffɨŋ i ŋə̀ŋ lə fi nwaala wu. Yee kkə nə̂ kiŋkuntaŋ bə Jisho Kleto nu bwɔɔ mənhliŋ kə kaa. Yee fi Dûŋ lə.

22 Bəŋgwoŋ, nnōŋ lə bə kwaa biwɛɛ wo die keehnə nni mbīeŋ ni bə bəŋ. Fieŋ ffɨŋ mbieŋna fɨhŋ duŋ kwaa ŋkwookə. 23 Ŋkiɛɛ lə bə kələ lə bə́ fwoola ŋgwoŋ ya Timɔti ə chəŋ munfwa mə. Ə mə kee bəmbwo, ə bee wu jaa gbu mwe bwo ŋəŋ bəŋ. 24 Bə chee nə mi bəŋkafwi bieeŋ bənhliŋ maa bəne bbəŋ bə́ dùŋ bə Chu bənhliŋ. Bəŋgwoŋ biaa bə Itali faŋna dəŋ bəŋ cheenə. 25 Kinleki ki Chu yee ki dûŋ bə bəŋ bənhliŋ. Yee fi Dûŋ lə.