Hiblu 11

Ki tɔŋ li yiinə ə Chu mə

Bən'yii tɔŋ ə Chu mə duŋ bəŋkee fwi ə fieŋ go ffɨŋ Chu kaachi mbɛɛ bə fi, i kə̀lə kinwaa lə i yá yi bwo kənə fi. Yee i kə̂lə dəŋ lə fi fie həmə maa ye i duŋ lə dəŋ kə ŋəŋ nə ba ə fi go kə. 2 Chu mà doha bəne bə fwii yulahalə bə́ mà yiila tɔŋ ə wu mə. 3 Ə fə tɔŋ llɨŋ kkə yii le ə Chu mə kkə hlə kələ kinwaa lə Chu mà fə mbiŋ nu ə duŋ kwaa bə die yi, nni i duŋ lə, bieŋ bbɨŋ kkə ŋə̀ŋ mà fu ə bieŋ bbɨŋ bə́ duŋ ə bi go kə ŋəŋ nə kə.

Ɛbɛl

4 Ə mà fə tɔŋ llɨŋ Ɛbɛl mà yii le ə Chu mə llɨŋ li mà fə i hlə nə ntofi nwaa kah Kɛŋ. Chu hlə jə wu lə i duŋ mbɛɛ ntiiŋ, hlə jə nnə liih bəmbemi lə i duŋ mbɛɛ ntiiŋ. Ɛbɛl mà kpee, kwaalə tɔŋ llɨŋ i mà yii le ə Chu mə fəə yee kkə wō ye i kaani i yɔ̄ɔ bə be bwo bwii daŋ.

Enɔk

5 Ə mà fə dəŋ tɔŋ li Enɔk llɨŋ i mà yii le ə Chu mə llɨŋ li mà fə Chu hlə jə gəŋ bə wu buh ŋkee ə duŋ kpe kaani kə tuu lə ə wu go. Bə́ mà duŋna duŋ duŋ chu ə wu go kə ŋəŋ nə kə, yulahalə Chu mà jəə wu buh. Chu mà chu jə Enɔk buh duŋ Kiŋwaati ki Chu yɔ̀ɔ lə, i màa i bā bənfə Chu wò njənjə. 6 Nəni ə mbɛɛ lə duŋ həmə nnu i kə yii lə tɔŋ ə Chu mə kə, kəə duŋ ə i nakə fəə lə Chu wo njənjə bə wu kə dududu, yulahalə ə mbɛɛ lə kiɛɛ lə yee i chə̄lə i bwò ə Chu go, kəə i yo bəmbemi lə Chu yo həmə, maa dəŋ lə i hlùŋ mbɛɛ mənhliŋ nnu i kìɛɛ ba wu.

Nuah

7 Ə mà fə dəŋ tɔŋ llɨŋ Nuah mà yii le ə Chu mə bwɔɔ nnu Chu mà keeh wu ki fieŋ ffɨŋ fi lə bwo duŋ i kaani ə fi go kə ŋəŋ nə kə. I wo bə Chu hlə fə kikpɔŋkɔ kiŋkuntaŋ kkɨŋ ki mà chɨnə kichəŋ kiih. Ye i mà yiilə tɔŋ nəni, i hlə nyii lə bəne bidi bie ə mbiŋ nu mə bbəŋ bə́ duŋ bəwaha ə Chu fwi. Ə bə wu nnu Chu mà nə dɔhɔ ki mbɛɛ ntiiŋ, nnu i ba bənnə bə mbɛɛ nnu i yiila tɔŋ liih ə wu mə.

Ablahaŋ bə Sheela

8 Ə mà fə dəŋ tɔŋ llɨŋ Ablahaŋ mà yii le ə Chu mə, i wo bə Chu bwɔɔ nnu Chu mà chee wu lə i she kitɨŋ kibə gəŋ ə kidi mə chili kkɨŋ i mà duŋ lə i kənə ye kitɨŋ kiih lə. Ye Ablahaŋ mà wolə nəni, i hlə ja kwaa yee i gə̄ŋ, i kə kələ dəŋ maa dɔhɔ kkɨŋ i yu gə̄ŋ kie kə. 9 Ə mà fə tɔŋ llɨŋ i mà yii le ə Chu mə i hlə gəŋ yee i dūŋh ə kitɨŋ kkɨŋ Chu mà kaachi wu bə ki ye nfuntə nnu i gaah gəŋ ə kitɨŋ ki bəne bədi mə. I mà duŋ həmə, i jàa i nɔ̀ŋ ə bichaŋ mə bəə Ayjik maa Jekɔb bbəŋ Chu mà kaachi bie bə́ bənhliŋ bə kitɨŋ kie lə ə yá bwo duŋ kibə. 10 I màa i nɔ̄ŋ ə bichaŋ mə nəni yulahalə i màa i kēe fwi bəmbwo lɛɛ ə kibalaki kkɨŋ ki kənə kichili kkɨŋ Chu mà bwɛɛ ye kibalaki kie ya bwo duŋ lə, hlə wɛɛ.

11 Ə mà fə dəŋ tɔŋ llɨŋ Ablahaŋ mà yii ə Chu mə, i hlə kənə ŋiaŋ maa ye i mà dɨŋna lə kah Sheela, i dùŋ dəŋ nnu duŋ ə i nakə baa lə bwee kə. Fi mà kah nəni yulahalə Ablahaŋ mà bema lə Chu nnu i mà kaachi yo wu i lèmi ə die yi bəŋ.^ª 12 Fi hlə yee fi dūŋ lə mbɛɛ mwi ə duŋ Ablahaŋ nnu i mà duŋ i dɨŋna gbaaŋ, i chu duŋ ə kpe jə, ŋgɔlɔ ki mbɛɛ yá ja fu ə wu go ŋaŋ ye muntoola mu buh lə maa ye choo yi nɔ kpɛɛli yyɨŋ duŋ ə mbɛɛ nakə faa tɔ kə.

13 Bəne bəhŋ bənhliŋ mà duhŋna kə bənə fieŋ ffɨŋ Chu mà kaachi fie kə, bə́ jàa bə́ kpè bu kpenə bə́ yìi kwaa tɔŋ ə Chu mə. Bə́ mà ŋəŋna ə fi go fi kaani fi bwō je nyɛɛkə, tɨŋ jə bə kintɨŋ, yɔɔ bə́ kijə kibə lə, bə́ dùŋ bə́ kə̀lə kwaa lə bə́ duŋ bəbwonə bbəŋ bə́ kàh bu kahnə ə mbiŋ nu mə. 14 Ə bəne yee bə́ yɔ̄ɔ nəni, kəə fie fi nyīi ba gbaaŋ lə bie bə́ kaani bə́ kīɛɛ kitɨŋ kkɨŋ ki dùŋ kibə. 15 Ə màa duŋ lə yee bə́ baa bə́ hlē ki kitɨŋ kkɨŋ bə́ mà fu kie ə ki mə, ə bə́ màa bənə je chunə dɨŋ ə ki mə. 16 Kwaalə ye fi duŋ lə lə, nduŋ nnu bə́ màa bə́ kīɛɛ kitɨŋ kkɨŋ ki kah kimbini kie, kkɨŋ ki dùŋ kitɨŋ ki buh. Nəni gbo nakə bee lə dəŋ Chu bwɔɔ nnu bə́ chèe wu lə Chu bə́, yulahalə i bwɛɛla kibalaki chi bə bə́.

17 Ə màa tɔŋ llɨŋ Ablahaŋ mà yii le ə Chu mə llɨŋ li mà fə bwɔɔ nnu Chu mà mɔŋ wu, i bemi bənjə ŋiaani Ayjik fə ntofi Chu mu. Ə wu Ablahaŋ nnu Chu mà kaachi lə ŋgɔlɔ ki mbɛɛ yá yi fu ə wu mə. I bemi kwaa bənjə ŋiaani nnu ə ka kwaa wu, lə i fə ntofi mu. 18 Ŋiaani nu duŋ nnu Chu mà yɔɔ bə Ablahaŋ lə,

“Ə Ayjik mə nnu bwɔni bbəŋ bə́ yá chi yii lo yá fu.”

19 Ablahaŋ mà kəla lə ə mbɛɛ lə kpe dəŋ bu kpenə, kəə Chu duŋ ə i fə ə i chu ŋkee. Nəni ə je ji mə duŋ ə kkə jə lə Ayjik mà kpee Chu nə chuu wu bə Ablahaŋ i duŋ ŋkee.

Ayjik

20 Ə mà fə tɔŋ llɨŋ Ayjik mà yii le dəŋ ə Chu mə, i hlə chiŋ bwɔni biih ntɨŋ bə Jekɔb bəə Ɛshawo yɔɔ bə bə́ ki kinhləmə kkɨŋ ki yá bwo ə bə́ bəŋ.

Jekɔb

21 Ə mà fə dəŋ tɔŋ llɨŋ Jekɔb mà yii le ə Chu mə bwɔɔ nnu i mà chu duŋ bəŋkpe, i chiŋ bwɔni bə Joshɛ ntɨŋ nnu i mà duŋ yo ŋiaani. Ye i màa i chīŋ lə ntɨŋ nəni mà duŋ mə hə hlɨŋna ə tələ kiih go, hlə yee i nə̄ kiŋkohi bə Chu.

Joshɛ

22 Ə màa tɔŋ llɨŋ Joshɛ mà yii le ə Chu mə llɨŋ li mà fə bwɔɔ nnu i mà duŋ ba bəŋkpe, i hlə yee i nə̄ tɨmə ki kpe yi, i nyīi lə bəne Bəishlael yá yi she fu ə kitɨŋ ki Ijip mə. I hlə yɔɔ lə bwɔɔ nnu bə́ yáa bə́ fū həmə, bə́ jə bikuu biih.

Che Mushe bə mah Mushe

23 Ə màa tɔŋ llɨŋ che Mushe bə mah Mushe mà yii le ə Chu mə llɨŋ li mà fə bə́ hlə nələ Mushe ə kii bəŋ tɔh lə bə́ kə jii lə wu bwɔɔ nnu bə́ mà bwee wu. Bə́ màa bə́ nə̄lə wu nəni yulahalə bə́ mà ŋəŋna lə i mà duŋ chuŋ ŋiaŋ gbaaŋ. Bə́ nakə lɔɔ bəmbwuŋ ŋkɨnə nnu Ŋkɨŋ mà fwoo yo kə.

Mushe

24 Ə màa tɔŋ llɨŋ Mushe mà yii le dəŋ ə Chu mə bwɔɔ nnu i màa i kō llɨŋ li mà fə i nɨhŋ lə bə́ kə yee bə́ chêe wu lə mbwee ŋwa Fɛlɔ kpɛ kə. 25 I mà shaa ŋkwo wi lə mə lə yee i wô ŋgə bə bəne bbəŋ bə́ dùŋ bə Chu, kahiŋ bəŋ'wo njənjə bə bieŋ biwaha bbɨŋ bi dùŋ kwaa ə bwɔɔ bəŋ chɛɛ. 26 I mà jəə lə ə bə́ lə nə wu giaali yulahalə i duŋ mbɛɛ Nchuu Fwoo nnu Chu mà kaachi yo, kəə fimbini fie kənə mbɨŋ kah bəŋkənə bieŋ bi Ijip binhliŋ. I mà jə nəni yulahalə i màa i kēe ə duŋ bikoonə bbɨŋ bi yá bwo ə wu go. 27 Ə mà fə tɔŋ llɨŋ i mà yii le ə Chu mə, i hlə ja ə Ijip nakə lɔɔ biwɛɛ binlo bi Ŋkɨŋ bə fieŋ ffɨŋ duŋ ə i fə bə wu kə. I mà kwaala tɔŋ ja yee i gə̄ŋ yulahalə i màa i kēe ŋkwo wi ə duŋ fwi ə waalə i yu ŋə̄ŋ ə Chu go nnu bə́ dùŋ ə wu go kə ŋəŋ nə bə díi kə. 28 Ə màa dəŋ tɔŋ llɨŋ i mà yii le ə Chu mə llɨŋ li mà fə i chi Chɔnɔ ki Ŋkabəŋ, i fə bə́ jə ŋgɔŋ kəŋ ə fwíih go, fo Nchinda Kpe nnu i màa i jīi yo bwɔni bəniɛ bə fwii ə kichəŋ mə, bwɔɔ nnu mə bwo bwii ə fwiih ŋə bəne Bəishlael go, ə yee i jīŋ kah bu kahnə.

Bəne bə Ishlael

29 Ə mà fə dəŋ tɔŋ llɨŋ bəne Bəishlael mà yii le ə Chu mə llɨŋ li mà fə bə́ gəŋ le Nɔ dəŋ ye bə́ jaa lə ə shishɔ yi ŋɨmənə bəŋ. Bwɔɔ nnu bəne bə Ijip mà bwo bwii dəŋ ə nɔ yo tɨŋ yee bə́ jū bənle dəŋ nəni, i bɛɛni gəŋ bə bə́ bənhliŋ. 30 Ə màa dəŋ tɔŋ llɨŋ bəne bie mà yii le ə Chu mə llɨŋ li mà fə lə bə́ gəŋ bwii ə Jeliku jaa fiili kibalaki kie, bwɔɔ nnu bə́ mà fiili nəni gəŋ bwii joo fumanyaaŋ, bimbwɔɔ bi kibalaki kie bulə binhliŋ.

Lahab

31 Ə mà fə tɔŋ llɨŋ Lahab nnu i mà duŋ kpɛ kiwaali mà yii dəŋ ə Chu mə, i fukwoo nakə kpee ə kintu ki bəne bəbə bə kitɨŋ bbəŋ bə́ màa bə́ tā bie bikuu bə Chu. I mà kə kpee yulahalə bəne Bəishlael mà faŋna bəne lə bə́ bwo jaa chiini kitɨŋ kie, kpɛ yo tɨŋ jə bə́ ə wu chəŋ.

Gidiɔŋ, Balak, Shanshiŋ, Jefta, Daafi bə Shaŋwel maa bəne bə hlɨŋ Chu bədi

32 Ə fi duŋ lə n'yee nfā bəne bbəŋ bə́ mà yiila tɔŋ ə Chu mə, ə nfa nəni gəŋ bwii fəhəŋ lə? Bwɔɔ kə duŋ nə mu nnu duŋ ə nchɔɔ bənachɛ ki bieŋ bi bəne ye Gidiɔŋ, Balak, Shanshiŋ, Jefta ləkə Daafi bə Shaŋwel maa bəne bə hlɨŋ Chu bədi kə. 33 Bəne bəhŋ bənhliŋ duŋ bbəŋ bə́ mà yiila tɔ́ŋ ə Chu mə. Bədi hlə kah bitɨŋ ə ntɨmə mə, bədi hlaah muŋkɨŋ ə jé yinwaa mə, bədi kənə bieŋ bbɨŋ Chu mà kaachi bə́ mu, bədi kənə muŋga mu mbaŋnə biwu bi bətuntunu fo bə́ lə nakə bwini di bə́ kə. 34 Bədi mà kənə muŋga mu nyɨhɨnə bwii wwuŋ wi dò gbaaŋ. Bədi kənə muŋga munfunə ə kwáŋ ŋə bəne bbəŋ bə́ màa bə́ kīɛɛ bəŋgba bə́ bə bihlo bi ntɨmə. Bədi bbəŋ bə́ màa bə́ nyīee lə bə́ duŋ fɛɛɛ hlə no chu chuu bəŋga. Bədi mà choo bəne bə ntɨmə bəntaabə, bədi mà kohaŋ bəne bə ntɨmə bə bitɨŋ bidi bə́ lɔ bu lɔnə. 35 Bədi mà duŋ bəkwɛɛ bbəŋ bə́ mà yiila dəŋ tɔ́ŋ ə Chu mə. Chu fə bəne bəbə bədi bbəŋ bə́ mà kpee baa fiimə chu həmə yee bə́ dūŋ bə bə́. Bədi bəne duŋ bbəŋ bə́ mà kwo fɨhɨŋ bə́, bə́ nakə baa lə hle dəŋ lə bə́ tukwaŋ ə bə́ go kə, yulahalə bə́ mà ŋəŋna lə ə bə́ lə kpe, ə bə́ hlə fiimə fu ə kpe mə kənə kinduŋh kinwaa kah kɨhŋ nini. 36 Bədi duŋ bbəŋ bə́ màa bə́ fē bə bə́, bə́ hlòo bə́ bə muntələ gbo chɛɛmə bə́, bə́ fwàŋ bədi bə fíaŋ, bə́ fwàŋ ə chəŋ munfwa mə. 37 Bədi duŋ bbəŋ bə́ tɨ̀ŋ bə́ tə́ bə́ kpè bu kpenə, baa shwaŋ bədi bə bihlo bbɨŋ bə́ shwàŋ bite mu bə́ fù wɛ́ɛ fwe fwe, gba bədi bə bəmbieelə ə ntɨmə mə bə́ kpè. Bədi màa bə́ jāa bə́ lèe ə duŋ bwá ŋə shɔ́ŋ bə ŋə bí. Bə́ mà duŋ bəne bənjɨnənə, bəne nyɔkɔ bə bə́ baa fɨhɨŋ bə́. 38 Bə́ màa bə́ jāa bə́ nɔ̀ŋ ə nji maa ə bikɔni go bə ə məntiɛ mə maa ə bibwɔɔ mə. Ə bəne bbəŋ mbiŋ nu mà kə wunə nnu duŋ ə bə́ duhŋ ə wu mə kə.

39 Bəne bəhŋ nəni bənhliŋ mà yiila tɔŋ ə Chu mə, Chu dohi bə́ gbaaŋ. Kwaalə mbɛɛ ju ə bə́ mə mà kə bənə fieŋ ffɨŋ Chu mà kaachi kə. 40 Bə́ mà kə kənə yulahalə Chu mà kənə ŋkaachi nwaa gbaaŋ bə be kah bə́, fo ə yá bwo duŋ bwɔɔ nnu bə́ yá buhuŋ be bee bə́, ə bə́ hlə wunə dəŋ ə Chu fwi gəŋ kpee həŋgbɔŋ.