Hiblu 10

Ntofi nnu Jisho mà fə mà jəə dɔhɔ ki bəntofi bənhliŋ

Bəŋkɨnə bbəŋ Chu mà nə Mushe duŋ kwaa ə duŋ nchinchii bieŋ binwaa bbɨŋ bi mà duŋ bəmbwo duŋ. Bi kə duŋ nə ba chɛɛŋ lə bieŋ bɨhŋ bwo duŋ kə. Bə́ hlə yee bə́ fə̄ bəntofi kigoŋ bə kigoŋ bə́ chù bəŋ, nnu bəntofi bie duŋ ə bə nakə fəə lə bəne bbəŋ bə́ chə̀lə bə́ bwò ə Chu go chaa gəŋ kpee həŋgbɔŋ kə. 2 Ə hə duŋ lə bəntofi bie fə lə yee bə́ chāa nəni, ə bə́ hə nakə baa lə yee bə́ fə̄ bəntofi bə́ chù bəŋ kə, yulahalə bəne bbəŋ bə́ bwɔ̀kwe bə Chu duŋ bə́ hə wiila yíwaha yibə cha mi, ə biwɛɛ hə nakə baa lə yee bi hlāah yíwaha yibə kə. 3 Kwaalə, bəntofi bbəŋ bə́ fə̀ bə kaka fə bəne yee bə́ hlē dəŋ yíwaha yibə kigoŋ bə kigoŋ. 4 Fi duŋ lə, yulahalə ŋgɔŋ mə bənaŋ^ª bə mə bí duŋ ə mə wii yíwaha yí mbɛɛ kə dududu. 5 Fiee fieŋ ffɨŋ fi mà fə lə bwɔɔ nnu Kleto mà bwo yaŋ kwe i yɔɔ bə Chu lə,

“Wə kənə lə ŋgɨŋ bə bəntofi bbəŋ bə́ fə̀ bə nyáŋ,

maa bə bieŋ bbɨŋ bə́ nə̀ bə wə.

Wə bwɛɛla ə duŋ gbo wi mbɛɛ ŋkee bə mi.

6 Nyáŋ yyɨŋ bə́ nə̀ bə́ tɔ̀ŋ bənfə bəntofi mu bə wə,

maa bieŋ bbɨŋ bə́ nə̀ bə́ fə̀ ntofi mu

bəŋ'wii yíwaha yí bəne kə fəə lə yee wə wō njənjə kə.

7 Nhlə n'yɔ̀ɔ lə,

‘Oo Chu, kee ŋəŋ, mbwoo bənfə fieŋ ffɨŋ wə kìɛɛ,

ye bə́ bieŋ lə kɨŋŋ ə kiŋwaati ko mə.’”

8 I hlaala yɔɔ bə Chu lə,

“Wə kənə lə ŋgɨŋ ləkə wo njənjə bə bəntofi

maa nnə́ ŋŋəŋ bə́ nə̀ bə wə bə nyáŋ yyɨŋ bə́ nə̀

bə́ tɔ̀ŋ bənfə bəntofi mu bə wə,

maa bieŋ bbɨŋ bə́ nə̀ bənfə bəntofi mu

bəŋ'wii yíwaha yí bəne.”

Bieŋ bɨhŋ duŋ bbɨŋ bə́ fə̀ bə́ bə̀lə kwaa ye bəŋkɨnə kìɛɛ lə. 9 Ye i yɔɔlə nəni, i hlə yiinə yɔɔ bə Chu lə,

“Kee ŋəŋ, mbwoo lə mbwo nfə fieŋ ffɨŋ wə hlè.”

I mà yɔɔ nəni, i hlə laa bəntofi bəko bənchi fwɔ. 10 Ye Jisho Kleto mà fələ fieŋ ffɨŋ Chu mà hle fie lə i fə, gbo wiih wwuŋ i mà nə we cha mi fi ka lə, fə kkə hlə yee kkə chāa.

11 Che ntofi mənhliŋ ba bəŋgəŋ lemi ə dɔhɔ kiih ki nimi mə ju ju i fə̀ bəntofi, i tùunə i chù bəŋ, ə duŋ bəntofi bie duŋ ə bə nakə fwoo lə yíwaha yí bəne kə. 12 Kwaalə Kleto mà fə ntofi wi kwaa cha mi, i bu wunə bənjə no bə yíwaha yí bəne bwɔɔ mənhliŋ. Ye i fələ nəni, i hlə shii ə kwaŋ wi diee wi Chu mə. 13 I yo həmə chɔɔ jə ə bwɔɔ yo bəŋ, i yu kē gəŋ bwii bwɔɔ nnu Chu yá nɔhiŋ bəne biih bbəŋ bə́ dùŋ kə diee njənə bə wu ye kinu ki wuh ŋiih lə ə i diɛŋ wuh ŋiih ə bə́ bəŋ. 14 Ntofi wi nu mwi fəə bəne bbəŋ i fə̀ lə bə́ duŋ wɛɛŋ, hlə yee bə́ dūŋ wɛɛŋ ə Chu dí gəŋ kpee həŋgbɔŋ bwɔɔ mənhliŋ. 15 Fiana Wɛɛŋ yɔ̀ɔ dəŋ bə be i fwɔ̀ŋ kah bə fieŋ fɨhŋ. I mà hlaa yɔɔ lə,

16 “Baba Chu yu yɔ̄ɔ lə, kɨhŋ lə tɨmə kkɨŋ

nlə nnə bə bə́

joo ŋie hə kaah:

Nlə nchi bəŋkɨnə bəŋŋ ə tɔ́ŋ ŋəbə mə,

ə mbieŋ ə munhlenə mubə mə.”

17 Ye i yɔɔlə nəni, i baa yiinə lə,

“Duŋ ə mbaa n'yee nhlē yíwaha yibə

ləkə fwɔ wibə wiwaha kə”

18 Fi hlə yee fi dūŋ lə, ə bə́ laamə nə yíwaha yí bəne, kəə kinhle ki bieŋ bbɨŋ bi dùŋ lə bə́ nə yee bə́ fə̄ bəntofi mu bəŋ'wii yíwaha yí bəne kaani kə.

Yee kkə chə̂lə kkə bwò baha baha ə Chu go

19 Bəŋgwoŋ, fi hlə yee fi dūŋ lə ŋgɔŋ mə Jisho wɛɛ dəŋ je nni duŋ ə kkə lɛɛ nlɔ hləŋ fidiɛɛ, gəŋ ə Dɔhɔ Kiwɛɛŋ ba Gbaaŋ mə. 20 Duŋ ə kkə kah ə je fwɔ nni i nə̀ ye kinduŋh nni Jisho mà wɛ yu be. I mà wɛ je ni bə mbili wi, fi hlə yee fi dūŋ lə i jəə no bə kindu kkɨŋ bə́ mà hlɨŋkə kie kəə dɔhɔ kie mu. 21 Kkə kənə che ntofi ŋkuntaŋ nnu i kə̀nə muŋga ə chəŋ Chu bəŋ. 22 Ye bieŋ bɨhŋ duŋ lə nəni, kkə hlə yee kkə chə̄lə kkə bwō ə Chu go bə tɔŋ mwe, ə duŋ kkə yiila tɔŋ ə wu mə linhliŋ naamə hləŋ dududu. Yee kkə chə̂lə, yulahalə bə́ shaala tɔŋ ŋiaa bə ŋgɔŋ mə Kleto yee ŋə chāa, kə hlaa lə be ə fieŋ go kə. Kkə hlə yee kkə dūŋh dəŋ bə́ wiila go ŋiaa bə ŋgwiŋ mənchaa. 23 Yee kkə lêmi ntakə gbaaŋ ə fieŋ ffɨŋ kkə kèe fwi ə fi go, ffɨŋ kkə ba bən'yɔɔ bə bəne ki fi. Kkə kə yee kkə nyɛ̂nyɛ kə. Yulahalə wu nnu i kaachi yo be lèmi ə die yi bəŋ. 24 Yee kkə kîɛɛ dəŋ je bəntahi gbo wi mbɛɛ bə mbɛɛ bənleki maa bənfə bieŋ binwaa. 25 Kkə kə too kwáŋ bəmbwo ə kimbumə mə ye bəne bədi gbee lə bənfə. Yee kkə tâhi go ŋiaa ə ntahi mə, gbɛntɛlɛ, ye kkə ŋəŋ lə lə butuu bu bwonə bu Baba ya bwe chəkə chəkə.

26 Yee kkə kə̂lə lə, ə kkə lə baa ja chu yee kkə fə̄ yíwaha, kkə fə̀ kkə kə̀lə, ə duŋ kkə mà tɨŋna jə je kichɛɛŋ, yee kkə kə̂lə lə ntofi ju hləŋ həmə nnu duŋ ə bə́ baa fə yu yíwaha yaa. 27 Ə mbɛɛ lə fə nəni, yee i kê bənɨŋ ə duŋ nhlaah Chu maa bwii wiwaha wwuŋ wi yá nyaa bu nyaanə bəne bbəŋ bə́ dùŋ kə diee njənə bə Chu. 28 Mbɛɛ bwo ə mə gbe ŋkɨnə Mushe, ə bəne lə lemi bəfwe ləkə bətɔh bemi lə bə́ ŋəŋna fieŋ ffɨŋ i fəə, nhlaa hlə kwo mbɛɛ yo, bə́ hlə jii wu bu jiinə, ŋkwo hlɨŋ hləŋ bə wu. 29 Ə fi duŋ nəni, kəə bə hle lə mbɛɛ nnu i jə̀ Ŋwa Nchu kwe, i jə̀ dəŋ ŋgɔŋ mə tɨmə kkɨŋ Chu mà nə bəŋ'wii wu mu lə yee i chāa wɛɛŋ lə ə fieŋ finya, i tò dəŋ Fiana Wɛɛŋ nnu i bwò bə kinchɨnə ki Chu yu bəne, duŋ dɨŋ ŋgə nnu mbini yo mbɛɛ yá kənə yá duŋ ləhəŋ lə? 30 Wi yo ŋgə yá yi kwo nɨŋ yulahalə kkə bie kkə kə̄lə mbɛɛ nnu i mà yɔɔ yo lə,

“Ə mi nnu n'yá chuu fie,

ə mi nnu n'yá nnə bikoonə bibə.”

I baala yɔɔ lə,

“Ə mi Baba nnu n'yá nhlaah bəne bəŋŋ.”

31 Ə fieŋ fiŋkwo nɨŋ gbaaŋ bə mbɛɛ bəŋgbe ə kwáŋ ŋə Chu mə nnu i kə̀nə yo kinduŋh.

32 Yee bə ŋôo joo ŋənfwii ŋŋəŋ bə́ mà fə bə chaa ki fieŋ fi Chu. Bə mà kwaala tɔ́ŋ bə jù bə bəŋgə bbəŋ bə́ màa bə́ bwō ə bəŋ go. 33 Ə bwɔɔ ju bəŋ duŋ bəne ba bənto bəŋ bə́ fə̀ bə bəŋ ə ŋwiŋ nte. Bwɔɔ ju, bə màa bə būmə ə kintu mə bə bəne bbəŋ bə́ màa bə́ nə̄ bə́ ŋgə ə jé yé mə. 34 Bə màa bə bà bəŋkwo hlɨŋ bə bəne bbəŋ bə́ dùŋ ə chəŋ munfwa mə, bə chɨ̀nə bə́. Bə́ màa bə́ bā bənfaa bieŋ bieeŋ, bə tùkwaŋ ə bi go yee bə wō ə duŋ njənjə, yulahalə bə bie bə kə̄lə lə bə lə kənə bieŋ bidi bbɨŋ bi kàh bimbini bie, ə duŋ bbɨŋ bi yá ba yee bi dūŋ həmə bwɔɔ mənhliŋ. 35 Nəni, bə kə tookwaŋ ə fieŋ ffɨŋ bə lèmi fie ə fi bəŋ kə naamə kə, yulahalə ə fieŋ ffɨŋ fi kə̀nə bikoonə biŋkuntaŋ. 36 Fieŋ fishaŋ bə bəŋ duŋ lə bə kwaa tɔŋ fo bə lə yee bə fə̂ ə duŋ fieŋ ffɨŋ Chu kìɛɛ, ə bə hlə kənə fieŋ ffɨŋ i kaala chi be mu. 37 Bə́ bieŋna lə,

“Ə she kwaa chɛɛ ə mbɛɛ nnu i yu bwō yo bwii bwo.

Mə lə kɛhiŋ bwɔɔ kə.

38 Mbɛɛ ŋgwəŋ ntiiŋ yá kənə kinduŋh

yu tɔŋ llɨŋ i yiila ə mi mə.

Kwaalə ə mə lə lɔ tu gbu,

ə tɔŋ lɨŋŋ duŋ kə nwaa lə bə wu kə.”

39 Kkə duŋ nə ŋkwo ya ye bbəŋ bə́ kpà bie wuh dɨŋ, bbəŋ bə́ lə la kə. Kkə duŋ ə duŋ bəne bbəŋ bə́ yiila tɔŋ ə Chu mə, bbəŋ fiana bə́ yá fukwoo.