Hiblu 9

Je bwɔnə kwe fwɔ bə ko

Fi duŋ lə, tɨmə ki fwii mà kənə bəŋkɨnə bbəŋ bə́ nyīi jé yyɨŋ bəne chèe Chu ə yí mə, baa kənə dəŋ dɔhɔ kkɨŋ bə́ bwɛɛla lə ə jwaŋ wi yaŋ kwe. 2 Bə́ mà bwɛɛla kikɔ bə kindu kaalə wɛɛ fwe, wɛɛ wi fwii we mənte mà duŋ bə́ chèe lə Dɔhɔ Kiwɛɛŋ. Kɨhŋ nini duŋ ə màa dɔhɔ ki fieŋ ffɨŋ bə́ màa bə́ chì mɔɔ bəŋ, maa kidaŋ kkɨŋ bə́ màa bə́ bwō bə́ chì kibele kkɨŋ bə́ shaala chi lə ə ki Chu. 3 Wɛɛ wwuŋ wi bələ we mənte duŋ bə́ chèe lə Dɔhɔ Kiwɛɛŋ ba Gbaaŋ. Dɔhɔ kɨhŋ mà duŋ ə kindu kidi dɨŋ kkɨŋ bə́ mà hlɨhaŋ kaalə kikɔ kie kintekinte. 4 Dɔhɔ kɨhŋ duŋ ə dɔhɔ kkɨŋ taŋ li kijooni mà duŋ, ə duŋ bə bwɛɛla taŋ le bə chwaa kige ki kpo. Ŋkɔlɔ tɨmə nnu Chu mà nə bə bəne mà duŋ dəŋ həmə, ə duŋ bə baala gbo we winhliŋ bə chwaa kige ki kpo. Ə ŋkɔlɔ nu mə nchwa mana mà duŋ dəŋ mənte, nnu bə́ bwɛɛla dəŋ bə chwaa kige ki kpo. Tələ ki Ɛlɔŋ kkɨŋ bibiaa mà mɛŋ ə ki go mà duŋ dəŋ ə ŋkɔlɔ yo mə. Ŋəŋgiini ŋə tə́ ŋŋəŋ bə́ mà bieŋ bəŋkɨnə bə tɨmə duŋ dəŋ ə ŋkɔlɔ nu mə. 5 Ə ŋkɔlɔ nu bəŋ duŋ bə́ tɨŋna chi bieŋ bidi bbɨŋ bi dùŋ ye bənchinda bə Chu bə wɛɛŋ lə, bi gbɔɔŋka go ŋəbi ə kabala Chu kinlaamə nə yíwaha bəŋ. Bieŋ bɨhŋ duŋ ə yee kkə yɔ̄ɔ, kkə lɛ̀ɛ ə bi mə fidiɛɛ gbaaŋ kə.

6 Ye bə́ mà bwɛɛlə bieŋ bɨhŋ ə je ni mə nəni, bəche ntofi hlə yee bə́ gə̄ŋ bə́ lɛ̀ɛ ə wɛɛ wi fwi we mə joo ŋənhliŋ bə́ fə̀ nimi libə mu. 7 Kwaalə, mbɛɛ nnu i màa i bā bənlɛɛ yo mə wɛɛ winte we mə, i fə̀ ntofi maa kwaa che kwoo ki bəche ntofi. I màa i bā kwaa bənlɛɛ mu cha mi ə kigoŋ go. I màa i dūŋ kə lɛɛ lə mu fo mə hə kaani kə jəə ŋgɔŋ mə nyaŋ mməŋ mə lə tofi kwoo kiih mu, maa bə yíwaha yí bəne yyɨŋ bə́ fə̀ kə kələ kə. 8 Nəni, ni lə je nni Fiana Wɛɛŋ nyìi bəne lə ə je nni mbɛɛ duŋ lə i lɛɛ gəŋ ə Dɔhɔ Kiwɛɛŋ ba Gbaaŋ mə mà kə wɛɛmə ba gbo kə, ye kikɔ ki Chu ki fwii kie màa ki kaani lə ki lēmi həmə. 9 Bieŋ bɨhŋ binhliŋ lə kinyii ki bieŋ bbɨŋ bi dùŋ ə bwɔɔ nnu bəhŋ fidiɛɛ. Fɨhŋ nyìi lə bieŋ bbɨŋ bə́ màa bə́ nə̄ bə Chu maa bəntofi bbəŋ bə́ fə̀ bə Chu duŋ ə bi fə ə tɔ́ŋ ŋə bəne ŋŋəŋ bə́ chèe Chu duŋ ə yee ŋə chāa gəŋ kpee həŋgbɔŋ kə. 10 Bieŋ bie kənə kwaa fieŋ fi fənə ə duŋ bə bidinə maa biŋwinə maa bə jé yyɨŋ bəne wìi go ŋəbə mu lə yee bə́ dūŋ wɛɛŋ ə Chu fwi. Bɨhŋ lə bieŋ bbɨŋ bi tuu kwaa ə duŋ ə nyaŋ go, bbɨŋ bə́ mà duŋ lə yee bə́ fə̄ hləŋ hləŋ gəŋ bwii bwɔɔ nnu kiŋgaanə yá bwo.

11 Kwaalə ye Kleto nnu i duŋ yo che kwoo ki bəche ntofi mà bwo lə, ə duŋ wu nnu i mà bwo bə bieŋ binwaa, i hlə lɛɛ ə kikɔ kie mə ə duŋ wu kikɔ kiŋkuntaŋ kkɨŋ ki chàa gəŋ bwii həŋgbɔŋ. Kimbini kie kə duŋ nə wɛɛ bəne kə. Fi duŋ lə, kikɔ kie kə duŋ nə ki yaŋ ə mbiŋ nu nte kə. 12 Dɔhɔ kkɨŋ i mà lɛɛ kie ə maa Dɔhɔ Kiwɛɛŋ ba Gbaaŋ. I mà lɛɛ mu cha mi fi ka lə nəni. I mà kə lɛɛ lə mu bə ŋgɔŋ mə bí ləkə bə mə bwɔni bə bənaŋ kə. I mà lɛɛ ə duŋ bə ŋgɔŋ miih. Ye i mà fələ nəni, fɨhŋ hlə yah bəne ə yíwaha yibə mə, nyah nu duŋ nnu mə ba kə kaa kə. 13 Bwɔɔ nnu mbɛɛ duŋ bə kida go bə́ jə ŋgɔŋ mə bí bə mə bwɔni bə bənaŋ, bə bu li chɔɔ ki naŋ kkɨŋ bə́ tɔŋna ki fiee, shaali ə mbɛɛ yo go, i chu wɛɛŋ. 14 Ə fi duŋ nəni, kəə duŋ ə ŋgɔŋ mə Kleto nakə fəə fieŋ ffɨŋ fi kàh fimbini fie kə lə? I nə gbo wiih wwuŋ wi dùŋ gbenə hləŋ bə Chu kah ə Fiana nnu i dùŋ kə kaa mə. I mà fə nəni, i hlə wii tɔ́ŋ ŋiaa ə bieŋ mə bbɨŋ bi bwò bə kpe, fo kkə lə yee kkə lēmi bə Chu nnu i kə̀nə yo kinduŋh. 15 Ə yu fɨhŋ fieŋ ffɨŋ Kleto duŋ fie mbɛɛ nnu i lèmi fwi ə tɨmə kifwɔ kɨhŋ hənte bə Chu bə mbɛɛ ŋkee. I lèmi nəni fo bəne bbəŋ Chu cheela lə ə biih yá bwo kənə dɔhɔ kinjənjə ki kə kaa mə kkɨŋ Chu kaachi bə́ mu. Bə́ yá kənə ki yulahalə mbɛɛ kpee, kpe yi ni yaah bə́ ə ŋgə nnu i mà duŋ yo bəmbwo yu yíwaha yibə yyɨŋ bə́ màa bə́ bā ye bənfə fwii ə tɨmə kiko mə. 16 Kkə kələ lə, ə mbɛɛ bwo ə mə yɔɔ nə tɨmə, mbɛɛ bələ lə tɨmə kie i kaani kə ŋəŋ nə lə mbɛɛ yo kpee kə. 17 Fi duŋ lə, yulahalə tɨmə kənə lə ba muŋgeni ə mbɛɛ bəŋ i kaani kə kpee kə. Bə́ bə̀lə lə tɨmə ə duŋ mbɛɛ nnu i nə yo ki kaani kə kpee kə. 18 Ə fieŋ ffɨŋ tɨmə ki fwii mà duŋ ə i nakə lemi kə kahiŋ lə bə́ nyieŋna nyaŋ ŋgɔŋ fwoo ə yi go. 19 Ə mà duŋ bwɔɔ nnu Mushe mà chee fieŋ finhliŋ ffɨŋ fi mà duŋ ə Kiŋwaati ki Bəŋkɨnə mə bə bəne bənhliŋ, i hlə jə nyaŋ tiɛɛ ki hishop nni bə́ bina lu ŋə shɔŋ bə́ kəŋna ki geenə. Ye i jələ nəni i hlə nuu ə ŋgɔŋ mə bwɔni bə bənaŋ, bə mə bí mə, maa ŋgwiŋ, shaali ə Kiŋwaati ki Bəŋkɨnə kie go, hlə shaali dəŋ ə bəne bənhliŋ go. 20 Bwɔɔ nnu i màa i shāali i yɔɔ lə, “Ŋgɔŋ məhŋ lə tɨmə kkɨŋ Chu mà nə bə bəŋ, i yɔ̄ɔ lə, yee bə lêmi ə ki bəŋ.” 21 I mà shaala dəŋ ŋgɔŋ mie ə kikɔ ki Chu kie go maa ə bieŋ bbɨŋ bi dùŋ ə kikɔ kie mə bbɨŋ bə́ chèe Chu bə bi. 22 Fi duŋ ba chɛɛŋ lə bieŋ kiŋaaŋkə màa bi hlaa dūŋ ye ŋkɨnə nyìilə lə bə́ kənə bənfə kwaa ə duŋ bə ŋgɔŋ ə bi hlə yee bi dūŋ wɛɛŋ. Ə mà duŋ ə bə́ laamə nə yíwaha yí mbɛɛ bə́ kaani kə nyieŋ nə fieŋ lə ŋgɔŋ fu ə fi go kə.

Ntofi nnu Jisho mà fə kwaa cha mi i wìi yíwaha yí bəne

23 Fi mà duŋ ba kinwaakə gbaaŋ lə bə́ wii bieŋ bbɨŋ bi bù bi buh ə je ni mə. Kwaalə, bə́ wii bbɨŋ bi dùŋ bie ba bi buh ə duŋ bə bəntofi bbəŋ bə kàh bəhŋ. 24 Fi duŋ lə, Kleto mà lɛɛla ə jwaŋ wi Chu mə ə duŋ kə duŋ nə ŋ'wɛɛ kwaŋ wi mbɛɛ ŋkee kə, wwuŋ wi chɔɔ bu jwaŋ wi Chu chɛɛŋ chɛɛŋ. I mà lɛɛ ə duŋ buh kibɛɛ. Ə duŋ həmə nnu i dùŋ ə Chu fwi fidiɛɛ yu bikuu biaa. 25 I duŋ nə həmə nəni lə yee i baa i fə̄ ntofi bə kwoo kiih bə Chu ə cha bəŋ cha bəŋ ye che kwoo ki bəche ntofi màa bə́ bā lə bənlɛɛ ə Dɔhɔ Kiwɛɛŋ mə Gbaaŋ ə kigoŋ go kigoŋ go, bənfə ntofi bə ŋgɔŋ mməŋ mə duŋ kə duŋ nə miih. 26 Ə fɨhŋ màa duŋ fieŋ fi mbɨŋ, ə Kleto mà nakə woo ŋgə baa wo, chɔɔ jə ye bə́ mà fə mbiŋ kə. Kwaalə, ye fi duŋ, duŋ lə i bwoo kwa mwe fi ka lə nəni. I bwoo bwɔɔ nnu mbiŋ yu kā bənjə gbo kiih fə ntofi mu, kpe lə i wii yíwaha. 27 Ə dəŋ yəəŋ ye fi duŋ lə lə, mbɛɛ kənə bəŋkpe cha mi, ə fimbini fie dɨŋ, hlə duŋ nhlaa nnu bə́ lə yee bə́ hlāah wu, 28 ə duŋ dəŋ yəəŋ ye Kleto mà nə lə gbo kiih kpe ə bəne bəŋ cha mi tu yíwaha yí bəne kiŋaaŋkə. I yá fiimə bwo ə chá bəŋ fie ə kə baa lə duŋ bənfə fieŋ bə yíwaha kə. Mə lə bwo fidiɛɛ bənfwoo bəne bbəŋ bə́ kè wu ntakə.