Jisho duŋ che kwoo ki bəche ntofi bə tɨmə kifwɔ
8
Kwoo ki fieŋ ffɨŋ kkə yɔ̀ɔ fɨhŋ ki fi duŋ lə, kkə kə̀nə che kwoo ki bəche ntofi ə duŋ mbɛɛ nnu i shiila ə kwaŋ wi diee wi kabala Chu Kiŋkuntaŋ nnu buh bəŋ. 2 I duŋ mbɛɛ nimi ə dɔhɔ kkɨŋ Chu duŋ, i nɨ̀ŋ ə jwaŋ wwuŋ wi dùŋ chɛɛŋ chɛɛŋ kikɔ ki wu Chu ə kə duŋ nə nfə bəne kə. Ə wu Baba Chu nnu i fəə jwaŋ we. 3 Che kwoo ki bəche ntofi mənhliŋ duŋ nnu Chu ba bənshaa chi wu lə yee i nə̄ nnə́ i fə̀ dəŋ bəntofi bə Chu. Nəni, fi duŋ yəəŋ bə che ntofi nu bəŋkənə dəŋ fieŋ ffɨŋ duŋ ə i nə bə Chu. 4 Ə mə hə duŋ yaŋ kwe, ə yee i dūŋ che ntofi kə, yu bəche ntofi bie ba dəŋ həmə bbəŋ bə́ nə̀ nnə́ bələ ye ŋkɨnə Mushe kìɛɛ lə. 5 Nimi llɨŋ bə́ nɨ̀ŋ yaŋ kwe duŋ kwaa ye mbu bənchiinchi ə jwaŋ wi Chu nnu buh mə. Fiee fieŋ ffɨŋ bwɔɔ nnu Mushe mà duŋ bənfə kikɔ ki Chu yaŋ kwe, Chu keeh wu yɔɔ lə,“Ŋəŋ lə wə lɛhaŋ fieŋ finhliŋ yee fi dūŋ dəŋ yəəŋ
ye ffɨŋ mmà nnyii fie wə ə kɔnɔ go.”
6 Kwaalə Jisho duŋ nnu bə́ nəə nimi bə wu llɨŋ li ko kah li bəche ntofi bə fwii bie, dəŋ yəəŋ ye tɨmə kkɨŋ i lèmi kie fwi ə bə Chu bə mbɛɛ ŋkee hənte ko li dəŋ kah kiko kie. Ki kàh yulahalə ki bə̀lə ə duŋ bəŋkaachi bbəŋ bə́ kàh bə fwii fwii bie. 7 Ə duŋ lə tɨmə ki fwii kie mà kə kənə gbenə, ə kinhle ki kidi hə baa yee ki dūŋ kə. 8 Chu mà ŋəŋna lə gbenə kie həmə bə bəne, i hlə yɔɔ lə,
“Mi Baba n'yu n'yɔ̄ɔ lə butuu bwe bu bwō
bbuŋ n'yá nnə tɨmə kifwɔ
bee kichəŋ ki Ishlael maa bə chəŋ Juda.
9 Tɨmə kɨhŋ kə duŋ nə ye kkɨŋ mmà nnə kie
bee bəche tili bəbə
butuu bbuŋ mmà ŋkənə bə́ ə kwáŋ go,
njə fu bə bə́ ə kitɨŋ ki Ijip mə.
Tɨmə kie duŋ kkɨŋ bə́ mà kə baa yee bə́ lēmi ba ə ki bəŋ kə.
Nəni, nhlə mbwuŋ kinhlaŋ bə bə́. Ə mi Baba nnu yɔ̀ɔ fɨhŋ.
10 Mi Baba mbaa n'yɔ̄ɔ lə, bwɔɔ yu bwō nnu nlə nnə tɨmə,
bə kichəŋ ki Ishlael.
Ki yá duŋ lə, nlə nchi bəŋkɨnə bəŋŋ
ə munhlenə mubə mə,
ə mbieŋ ə tɔ́ŋ ŋəbə mə.
N'yáa ndūŋ Chu bə́, ə yee bə́ dūŋ bəne bəŋŋ.
11 Mbɛɛ yá baalə yee i lâanə ŋwuŋ kitɨŋ wi bu laanənə kə
ləkə maani yɔ̀ɔ lə yee i kə̄lə Baba Chu kə,
yu mbɛɛ mənhliŋ yáa i kə̄lə mi
chɔɔ jə ə mbɛɛ tənə go gəŋ bwii ə bəŋkuntaŋ go.
12 N'yá ŋkwo hlɨŋ bə bə́,
ə nlaamə bieŋ bibə biwaha.
Ə mbaa n'yee nhlē yíwaha yibə kə.”
13 Ye Chu mà yɔɔlə lə tɨmə kifwɔ yá duŋ, kəə i ŋəŋna lə ki fwii kie choo fieŋ fiko. Ə fieŋ lə duŋ lə fie fi dɨ̄ŋ ləkə fie fi chū fiko, kəə fi shee chɛɛ ə fi la ə bəne dí.