Hiblu 7

Ki che ntofi Mɛlkishidɛk

Mɛlkishidɛk nu mà duŋ Ŋkɨŋ nnu Shalɛŋ, i duŋ dəŋ che ntofi Chu nnu i dùŋ Kwoo ki Bieŋ Binhliŋ. Lə ə bwo duŋ ə bwɔɔ ju bəŋ, Ablahaŋ la ntɨmə jii bəŋkɨŋ^ª bədi. Mɛlkishidɛk hlə bənə bə wu ə duŋ i kwələ, i hlə lɛɛ kindunshiiŋ ə wu go. 2 Ablahaŋ ga fieŋ ffɨŋ i mà kɨŋ jə ə ntɨmə mə wɛ́ɛ yuufi, nə wɛɛ mwe mwe wi fieŋ finhliŋ bə Mɛlkishidɛk. Yii lɨhŋ lə Mɛlkishidɛk duŋ lə, “Ŋkɨŋ Ntiiŋ” yii liih lidi duŋ lə, “Ŋkɨŋ Kindunshiiŋ” yulahalə i mà duŋ Ŋkɨŋ nnu Shalɛŋ.^ª 3 I kənə lə tili ləkə mahni ləkə kichəŋ. Kinduhŋ kiih kənə lə kinchɔɔ ləkə kiŋkpee kə. I duŋ che ntofi kə kaa ye Ŋwa Nchu lə.

4 Bə kee ŋəŋ mbɛɛ nnu Mɛlkishidɛk mà duŋ nu! I mà duŋ ba mbɛɛ ŋkuntaŋ. Maa Ablahaŋ nnu i mà duŋ che kichəŋ ki bəne Bəishlael i kɨŋ jə bieŋ ə ntɨmə mə bwo bə bi ga wɛ́ɛ yuufi yuufi, bwo nə dəŋ wɛɛ mwe bunə nə bə wu. 5 Ki bwɔni bə Lebi bbəŋ bə́ bà bənɨŋ nimi li bəche ntofi duŋ ə dɔhɔ kidi mə yɔ̀ɔ ə bəŋkɨnə bə Mushe mə lə, bə́ ba bənjə bieŋ ə bəne Bəishlael kwáŋ wɛɛ mwe mwe ə wɛɛ ŋə yuufi yuufi mə. Bəne bəhŋ duŋ ba bəmaani bəbə, bə́ bənhliŋ duŋ bwɔni bə Ablahaŋ. 6 Mɛlkishidɛk nu mà kə duŋ nə mbɛɛ ə kichəŋ ki Lebi mə, kwaalə ə wu nnu i mà jə bieŋ ə Ablahaŋ kwáŋ wɛɛ mwe mwe ə wɛɛ yuufi yuufi mə, hləmə wu. Ablahaŋ duŋ mbɛɛ nnu Chu mà fə bəŋkaachi bə wu. 7 Ə kə duŋ nə naamənə lə mbɛɛ nnu i hlə̀mə mbɛɛ ju ko kah mbɛɛ nnu i hlə̀mə yo wu. 8 Bəche ntofi ə kichəŋ ki Lebi mə jə̀ bieŋ ə bəne kwáŋ wɛɛ mwe mwe ə wɛɛ yuufi yuufi mə, bədi jə ə duŋ bəne bbəŋ bə́ kpee. Kwaalə Mɛlkishidɛk nnu i mà jə bieŋ wɛɛ mwe mwe ə wɛɛ yuufi yuufi mə ə Ablahaŋ kwáŋ, duŋ Kiŋwaati ki Chu yɔɔ bə be lə i yu kaani ŋkee. 9 Ə duŋ ə bə́ yɔɔ lə Lebi kibɛɛ nnu kichəŋ kiih jə̀ bieŋ ə bəne kwáŋ wɛɛ mwe mwe ə wɛɛ yuufi yuufi mə mà nə biih bieŋ bə Mɛlkishidɛk kah ə Ablahaŋ kwáŋ. 10 Duŋ ə bə́ yɔɔ nəni yulahalə bwɔɔ nnu Mɛlkishidɛk mà bənə bə Ablahaŋ mà duŋ wu Lebi kaani ə Ablahaŋ bulə nnu i mà duŋ che bəche tili.

11 Ə fi lə duŋ lə nimi llɨŋ kichəŋ ki Lebi nɨ̀ŋ ye bəche ntofi lə wuna bənfə lə yee bəne dūŋ ntiiŋ ə Chu dí gəŋ kpee həŋgbɔŋ, ə kinhle ki che ntofi ju hə baa yee ki dūŋ ki laha lə? Kkə kələ lə Chu mà nə bəŋkɨnə bə bəne Bəishlael bələ nimi llɨŋ bəche ntofi bə kichəŋ ki Lebi fə̀. Ye fi duŋ lə nəni, bə́ kaka yɔɔ lə mbini yo che ntofi kənə bənduŋ ə je nni Mɛlkishidɛk dùŋ ye ə yi mə, kahiŋ bənduŋ ə duŋ ə je nni che ntofi ə kichəŋ ki Ɛlɔŋ mə dùŋ ye ə yi mə duŋ ləhəŋ lə? 12 Ə chɛɛŋ lə ə bə́ lə gaanə kichəŋ ki bəche ntofi, kəə bə́ lə gaanə dəŋ bəŋkɨnə. 13 Mbɛɛ nnu kkə yɔ̀ɔ yo kiih, duŋ nnu i mà fu ə kichəŋ kidi mə chili, mbɛɛ mà kə hlaa lə fu ə kichəŋ kie mə nɨŋ ə taŋ li ntofi mə kə. 14 Mbɛɛ nu lə Baba ya. Ə chɛɛŋ lə i mà fu ə kichəŋ ki Juda mə. Mushe mà kə hlaa lə yɔɔ fieŋ fidi ki kichəŋ kɨhŋ bwɔɔ nnu i màa i yɔ̄ɔ ki bəche ntofi kə.

Jisho duŋ che ntofi ə je nni Mɛlkishidɛk dùŋ ye ə yi mə

15 Fieŋ ffɨŋ kkə yɔ̀ɔ fɨhŋ ki fi nyiila tɔ ba gbo ye che ntofi ju mà fu ye Mɛlkishidɛk lə. 16 I bwo chu che ntofi ə kə duŋ nə ə je nni bəŋkɨnə bwò bə́ yɔ̀ɔ lə mbɛɛ kənə bənduŋ ə kichəŋ ki bəche ntofi mə kə. I duŋ che ntofi ə duŋ ə muŋga mu kinduŋh ki kə kaa mə. 17 Ə fieŋ ffɨŋ bə́ bieŋna kiih lə,

“Jisho duŋ che ntofi ə je nni Mɛlkishidɛk duŋ ye ə yi mə.”

18 Fi hlə yee fi dūŋ lə, je ko nni bə́ màa bə́ fə̄ ye bieŋ ə yi mə duŋ bə́ kəəla mbini ye, yulahalə i baala kənə muŋga ləkə nimi kə. 19 Bəŋkɨnə bə Mushe mà kə yee bə fə̄ fieŋ lə finwaa gəŋ kpee həŋgbɔŋ kə. Kwaalə, fidiɛɛ Chu nyiila je nni i nùaa gbaaŋ nni kkə lə yee kkə yīi bufe ə yi mə kah mbini ye. Ə yi nni kkə kàh ə yi mə hlə bwo baha ə Chu go.

20 Bəmbaa nyiinə mu duŋ lə bwɔɔ nnu Chu màa i chī che ntofi ə je fwɔ ni mə, i kaŋ muŋkaŋ, i màa i dūŋ kə kàŋ nə muŋkaŋ bwɔɔ nnu i màa i chī bədi bie kə. 21 Kwaalə, bwɔɔ nnu i màa i chī nu, i kaŋ muŋkaŋ ə wu bəŋ yɔɔ lə,

“Mi Baba ŋkaŋna muŋkaŋ,

duŋ ə ŋgaanə die njəŋ kə,

‘Wə duŋ che ntofi kə kaa.’”

22 Muŋkaŋ mmuŋ Chu mà kaŋ muhŋ hlə nyii lə Jisho duŋ mbɛɛ i nəə tɨmə kifwɔ kkɨŋ ki lèmi ntakə kah kiko kie.

23 Bəche ntofi bbəŋ bə́ mà duŋ bie fwii màa bə́ dūŋ kiŋaaŋkə, yulahalə kpe mà kə tookwaŋ ə mbɛɛ go lə yee i baa i fə̄ nimi li che ntofi kə. 24 Kwaalə, Jisho duŋ ŋkwo wi che ntofi bwɔɔ mənhliŋ yulahalə kinduŋh kiih kənə lə kiŋkpee kə. 25 Nəni, duŋ ə yee i fwōo bəne bwɔɔ mənhliŋ bbəŋ bə́ bàŋ bə́ bwò ə Chu go, bə́ kàh ə wu mə. I fwòo nəni, yulahalə i yo ba həmə bwɔɔ mənhliŋ bəŋkɔnɔ Chu yu bə́.

26 Fi duŋ yəəŋ lə kkə kənə dɨŋ che kwoo ki bəche ntofi mbini yo. I duŋ ŋkwo wi mbɛɛ wɛɛŋ, i kə̀nə lə gbenə ləkə yili ə wu go kə. I lèmi ŋkwo wi chili ə bəne bə yíwaha mə. Chu mà tuula wu, i biŋ gəŋ tɔ buuli lɛɛ buh. 27 I kənə lə wu fiih kinhle ki fənə bəntofi ye bikuu bi bəche ntofi bbəŋ bə́ ba bie bənfə bəntofi ju ju kə. Bwɔɔ nnu bə́ fə̀, bə́ hlaa fə bə go ŋəbə, bənlɛhiŋ yíwaha yibə, hlə yee bə́ fə̄ yi bəne bədi bie. I mà fəə ŋkwo wi ntofi cha mi ye i mà nə lə kwoo kiih bən'yah bəne mu. 28 Bə kichɛɛŋ, bwɔɔ bəŋkɨnə bə Mushe mə mà duŋ bə́ shàa ə duŋ bikuu bi bəche ntofi ə duŋ bəne bəmbiaŋ. Kwaalə, ə bwo chu ə bəŋkɨnə bə dɨŋ bəhŋ mə, Chu fə ŋkaachi kaŋ muŋkaŋ, hlə shaa ə duŋ ba Ŋiaani nnu i fəə wu i wunə gəŋ kpee həŋgbɔŋ bwɔɔ mənhliŋ.