Hiblu 6

Ye fi duŋ lə nəni, kəə kkə tukwaŋ ə kinlaanə ki Kleto go kkɨŋ kkə mà hlaa chɔɔ kie bənlaanə, kkə gəŋ fwi ə duŋ bə ki ye bəne bbəŋ bə́ mɛɛhla lə. Kkə kə gbee bənchi kichili ki kinlaanə kkɨŋ ki dùŋ kie lə bəne fii tɔ́ŋ ŋəbə ə fwɔ́ ŋəbə ŋəwaha mə ŋŋəŋ ŋə dùŋ ə ŋə bwo bə kpe, maa kinlaanə kɨhŋ lə bəne yii tɔ́ŋ ə Chu mə. 2 Duŋ ə kkə baa chɔɔ bənlaanə bu laanənə ye ki ŋ'wii^ª bəne, maa bənchi kwáŋ ə bəne bəŋ kə. Duŋ ə kkə baa chɔɔ bənlaanə ki nfu ə kpe mə maa ki nhlaa kaalənə nnu i dùŋ kə kaa kə. 3 Bieŋ bɨhŋ duŋ lə kkə tukwaŋ ə bi go yee kkə gə̄ŋ fwi, ə Chu lə nəə je. 4 Kkə tukwaŋ ə fi go yu bəne lə duŋ bbəŋ bə́ chaala bə fieŋ fi Chu, ə duŋ bə́ mɔŋna nnə llɨŋ li fù ə buh, bə́ kəna dəŋ Fiana Wɛɛŋ hlə ja tu wuh, kəə je baa duŋ mu dududu kə nni duŋ ə bə́ baa fə ə bə́ hlə fii tɔ́ŋ ŋəbə fiimə chu dɨŋ. 5 Bəhŋ bəne duŋ bbəŋ bə́ mɔŋna kinjənjə ki die Chu, baa kələ múŋga mu kinduŋh kkɨŋ ki yá bwo kie. 6 Ə bə́ lɛɛ ba ə bieŋ bɨhŋ mə baa tu wuh, kəə je baala duŋ mu nni duŋ ə i fə ə bə́ hlə fii tɔ́ŋ ŋəbə chu dɨŋ kə, yu fieŋ ffɨŋ bə́ fə duŋ lə, bə́ chu dɨŋ bə́ jə ə duŋ Ŋwa Nchu bə́ bweeni ə kiŋgwa go bə kwáŋ ŋəbə, bə́ nə wu giaali ə kintu mə. 7 Wɛɛh kkɨŋ jaŋ bwò lɛɛ kwe ə ki mə bwɔɔ mənhliŋ nə̀ bieŋ bə bəne bbəŋ bə́ nɨ̀ŋ bie wɛɛh kie, fo bə́ lə yee bə́ fūkwoo yu ki, ə ki kkɨŋ ki bà bəŋkənə kinhləmə ki Chu. 8 Kwaalə, ə lə duŋ lə ə bimbɛɛnə bə kɔ́ɔ bbɨŋ bi kò mə sho, kəə ki choo wɛɛh kinya. Ə fi lə duŋ nəni ə kida chili ki, ə bə́ tɔŋ ki bu tɔŋnə.

9 Bəmbweŋ biaa bə tɔŋ, maa ye kkə yɔɔlə nəni, kkə kə̀lə lə bə lèmi ŋkwo weŋ ə duŋ ə bieŋ binwaa bəŋ kah bibə, ə duŋ bi bbɨŋ bi bwò bəŋ bə kinfukwoo. 10 Chu duŋ nə mbɛɛ nnu i fìhi fihinə bənduŋ kə ŋəŋ nə nimi lieeŋ llɨŋ bə nɨ̀ŋ maa kinleki kkɨŋ bə nyìi chɔɔ jə foo bwo bwii fidiɛɛ bə bəne bbəŋ bə́ dùŋ biih yu wu kə. 11 Kinhle kiaa gbaaŋ duŋ lə mbɛɛ bə kwoo kiih yee i lēmi kwaa ə fimbini fie fieŋ bəŋ gəŋ kpee həŋgbɔŋ, fo bə yá kənə fieŋ ffɨŋ bə yiila fie bufe bweeŋ bunhliŋ mə bə kèe fwi ə fi go. 12 Bə kə yee bə kpà gbo kə. Yee bə bə̂lə wuh ŋə bəne bbəŋ bə́ yìi tɔ́ŋ ə Chu mə, bə́ kwàa tɔŋ bəmbwo kənə fieŋ ffɨŋ Chu mà kaachi.

Chu gaanə lə bəŋkaachi biih kə

13 Bə hle bwɔɔ nnu Chu mà kaachi Ablahaŋ. Bwɔɔ nnu i màa i kāa i kaŋ yii liih kibɛɛ, yulahalə mbɛɛ ju mà kə baa lə duŋ həmə nnu i kò kah wu, nnu mə lə kaŋ yii liih kə. 14 Bwɔɔ nnu Chu mà kaŋ i yɔɔ lə, “Bə kichɛɛŋ, n'yá yi hləmə wə, ə nfə ə bwɔni bwo ŋaŋ.” 15 Lə Ablahaŋ wo nəni, i ba shiiiŋ, i jaa nəni bwo bənə fieŋ ffɨŋ Chu mà kaachi fie. 16 Ə chɛɛŋ lə mbɛɛ lə kaŋ muŋkaŋ, i kaŋ ə duŋ yii li mbɛɛ nnu i kò kah wu, muŋkaŋ mwe hlə kaalə nhlaa. 17 Ə duŋ dəŋ yəəŋ ye bwɔɔ nnu Chu màa i kāachi i kiɛɛ bənfə lə bəne bbəŋ bə́ ya bwo kənə fieŋ ffɨŋ i kaachi fie, kələ kinwaa lə i gàanə lə fieŋ ffɨŋ i kìɛɛ kə. Bwɔɔ nnu i mà kaachi i kaŋ muŋkaŋ. 18 Ye Chu mà kaachi lə bwo kaŋ muŋkaŋ nəni, bieŋ fu bifwe bbɨŋ duŋ ə bə́ nakə gaanə kə, yulahalə bi mà fu ə duŋ ə Chu jə, nnu duŋ ə i nakə kaalə yo kə. Nəni be bbəŋ kkə lɔɔ bie nimi wu kwe hlə yee kkə kə̄nə tɔŋ lintaabə bəmbwo kɨkə jə fieŋ ffɨŋ i chiee be yee kkə kēe fwi ə fi go. 19 Fieŋ ffɨŋ kkə kèe fie fwi ə fi go, ə fi ffɨŋ fi kə̀nə tɔ́ŋ ŋiaa chɛɛŋ chɛɛŋ, ŋə tà ye ŋgooli lə fo ŋə lə nakə yee ŋə nə̄nə kə. Ə fi ffɨŋ fi fə ə kkə kah lɛɛ gəŋ ə kikɔ ki nɔŋnə ki Chu ə kidɨŋ ki kindu kkɨŋ bə́ kəəla baŋ kikɔ kie mu. 20 Ə həmə nnu Jisho mà lɛɛ ye mbɛɛ nnu fwii bənfə dɔhɔ yu be. I duŋ che kwoo ki bəche ntofi kə kaa ə je nni Mɛlkishidɛk dùŋ ye ə yi mə.