5
Kkə kələ lə bwɔɔ nnu bə́ bwa che kwoo ki bəche ntofi ə bəne mə chi lə yee i nɨ̄ŋ bə Chu yu bəne, i hlə yee i jə̄ nnə́ ŋə bəne i nɛ̀hiŋ bə Chu, i fə̀ dəŋ bəntofi bə yíwaha yí bəne. 2 Ye wu che kwoo ki bəche ntofi duŋ lə dəŋ mbiaŋ ə jé mə kiŋaaŋkə, i hlə yee i kə̄lə bənduŋ shiiiŋ bə bəne bbəŋ bə́ dùŋ kə kələ bieŋ, bə jàaŋka ə njaaŋkə mə. 3 Yu biaŋnə kiih kɨhŋ, ə i hlə yee i kə̄nə bənfə bəntofi bə yíwaha yiih yəəŋ ye i fə̀lə bə yí bəne bədi. 4 Mbɛɛ duŋ ə i bihiŋ gbo wiih lə mə lə yee i dūŋ che kwoo ki bəche ntofi kə. Ə Chu nnu i shàa ye i mà shaalə Ɛlɔŋ. 5 Ə duŋ dəŋ yəəŋ ye Kleto mà kə jəə lə gbo wiih lə mə lə yee i dūŋ che kwoo ki bəche ntofi kə. Ə màa Chu nnu i mà chi wu hlə yɔɔ lə,“Wə duŋ Ŋiaa,
daŋ n'yɔɔla lə nduŋ Chwa.”
6 I baa yɔɔ ə dɔhɔ kidi mə dəŋ lə,
“Wə duŋ che ntofi nnu i dùŋ kə kaa ə je nni Mɛlkishidɛk duŋ ye ə yi mə.”
7 Ə mà duŋ bwɔɔ nnu Jisho màa i dūŋ yaŋ kwe, i màa i bā bənchee Chu, i nòŋ bə Chu, i dè gbaaŋ, i shòo ndəŋ bə wu Chu nnu i dùŋ yo ə i chɨnə wu ə kpe mə. Ye i mà duŋ lə mbɛɛ nnu i lɔ̀ i baa i bwɔ̀kwe bə Chu, Chu hlə wo Chu wi cheenə. 8 Maa ye Jisho mà duŋ lə Ŋwa Nchu nəni, bəŋgə bbəŋ i mà wo mà fəə wu i laanə bəŋ'wo ə duŋ kwaa bə Chu. 9 Fimbini fie fə i duŋ mbɛɛ nnu i wuna gəŋ kpee həŋgbɔŋ, bənduŋ je kinfukwoo bəne bbəŋ bə́ wò bə wu. Kinfukwoo kɨhŋ duŋ ki kə kaa. 10 Chu shaa Jisho fo mə lə yee i dūŋ che kwoo ki bəche ntofi ə je nni Mɛlkishidɛk dùŋ ye ə yi mə.
Mbɛɛ Kleto kə too gbu kə
11 Bieŋ bie mu kiŋaaŋkə bbɨŋ kkə kənə bən'yɔɔ ki diɛɛnə kɨhŋ. Kwaalə fi duŋ ntakə bənlɛhiŋ lə fi chaa bə bəŋ, yulahalə bə bie jinfii bəŋ'wo bieŋ. 12 Ə fi hə duŋ yəəŋ, ə hə duŋ bəŋ bbəŋ bə hə yee bə lāanə bəne fidiɛɛ. Bə kaka ja yee bə kīɛɛ lə mbɛɛ ju laanə bəŋ bieŋ bi die Chu, ə duŋ bi bbɨŋ bə́ bwò bə́ hlaa chɔɔ ə bi go. Bə bie ye muŋiaa mmuŋ mu kaani mu mwàŋ ə duŋ biŋ ŋə die Chu, bbəŋ bə́ kaani kə gbee bəndi biləə bintaabə kə. 13 Mbɛɛ nnu i kaani i mwàŋ biŋ duŋ ə i nakə duŋ nə nnu i mɛɛhla ə bieŋ bintiiŋ bi Chu mə. Mbini yo mbɛɛ kaani ye fiŋiaa fiwɛ lə. I duŋ ye fiŋiaa fiwɛ ffɨŋ fi kaani fi mwàŋ ə duŋ biŋ. 14 Biləə bintaabə duŋ ndi bəne bbəŋ bə́ koo. Bəhŋ lə bəne bbəŋ bə́ laana bənfwiilə kələ kichili ki bieŋ binwaa bə biwaha.