Hiblu 4

Ki nlɛɛ ə dɔhɔ ki ŋɔɔninə ki Chu mə

Ə chu duŋ lə, ŋkaachi nnu Chu mà kaachi nu lə bəne yá lɛɛ ə dɔhɔ kiih ki ŋɔɔninə mə yu kaani i lèmi həmə. Nəni yee kkə jə̂ bwɔɔ lə, bwɔɔ nnu bə́ kèe ə bə́ nakə ŋəŋ nə lə mbɛɛ ju ə bəŋ mə kə wunə bənlɛɛ ə ki mə kə. 2 N'yɔ̄ɔ nəni yu hlɨŋ nwaa ni bwoo ə be mə yəəŋ ye i mà bwolə ə bə́ mə. Kwaalə, hlɨŋ nni bə́ mà wo ye mà kə chɨnə bə́ kə, yulahalə i mà bwo ə bə́ mə bə́ nakə bemi yi kə. 3 Bə be bbəŋ kkə bèmi bie yi, duŋ ə kkə lɛɛ ə dɔhɔ ki ŋɔɔninə kie mə. Bə bədi bie duŋ Chu mà yɔɔla lə,

“Tɔŋ lo mi, ŋkaŋ muŋkaŋ lə,

‘Duŋ ə bə́ yá baa lɛɛ ə dɔhɔ ki ŋɔɔninə kɨŋŋ mə kə.’”

Chu màa i yɔ̄ɔ nəni, ə kə duŋ nə lə dɔhɔ ki ŋɔɔninə kie ki jɨ̄nə kə, yulahalə nimi liih mà kaa chɔɔ jə ye i mà fə mbiŋ. 4 Kkə kələ lə bə́ bieŋna ə Kiŋwaati ki Chu mə ə dɔhɔ kidi mə ki joo fumanyaaŋ ə je ni mə lə,

“Chu mà nɨŋna ními ŋiih ŋənhliŋ,

lə ə bwo yiinə joo fumanyaaŋ, i ŋɔɔni.”

5 Bənchu ki dɔhɔ kkɨŋ bə́ hə yee bə́ yɔ̄ɔ kie ki ki, i baa yɔɔ lə, “Duŋ ə bə́ yá lɛɛ ə dɔhɔ kɨŋŋ ki ŋɔɔninə mə kə dududu.” 6 Fie fi kaani fi lèmi kwaa lə bəne bədi yá bwo lɛɛ ə dɔhɔ ki ŋɔɔninə kie mə. Bəne bbəŋ bə́ mà hlaa wo bie hlɨŋ nwaa ni mà kə lɛɛ lə yulahalə bə́ mà woo, kwaalə bə́ nɨhŋ bənfə ye Chu yɔ̀ɔ lə. 7 Nəni Chu hlə baa chi butuu budi bbuŋ i chèe lə, “Daŋ.” Ye i mà chilə, i hlə gəŋ yɔɔ fieŋ ə kijə ki Ŋkɨŋ Daafi mə ə duŋ bigoŋ kaah kiŋaaŋkə ye kkə mà wolə lə,

“Ə bə wo Chu yɔ̄ɔ bə bəŋ daŋ,

bə kə yee bə tâ bikuu kə.”

8 Ə duŋ lə dɔhɔ kkɨŋ Joshwa mà jə kie bəne gəŋ lɛɛ bə bə́ həmə mà duŋna ə duŋ dɔhɔ ki ŋɔɔninə kie, ə Chu màa baa yɔɔ ki butuu budi lə ə bu ŋɔɔninə kə. 9 Fi hlə yee fi dūŋ lə, butuu bu ŋɔɔninə bwe bwi kaani fwi bə bəne bə Chu, ye bbuŋ Chu mà ŋɔɔni bwe ə bwi mə. 10 Fi duŋ lə, ə mbɛɛ lɛɛ ə dɔhɔ kiih ki ŋɔɔninə mə, kəə i ŋɔɔna ə ními ŋiih mə ŋənhliŋ yəəŋ ye Chu mà ŋɔɔni lə ə ŋiih ními mə. 11 Nəni yee kkə jû gbaaŋ bənlɛɛ ə dɔhɔ ki ŋɔɔninə kɨhŋ mə, fo mbɛɛ ju ya kə gbe lə ə yəə tələ kwoo kintaabə wu ye bəne bə fwii bie lə. 12 Yee bə kə̂lə lə die Chu kənə kinduŋh, i nɨ̀ŋ. I dì kah hlo kkɨŋ bə́ fwɔŋna kiwɛɛ kinhliŋ. I bwò i lɛɛ gəŋ bwii dɔhɔ kkɨŋ kinduŋh bə fiana mbɛɛ toomə, i lɛ̀ɛ dəŋ gəŋ bwii ə dɔhɔ kkɨŋ bikuu bə fɔmi toomə. I bwò i wɛ̀ munhlenə bə bieŋ bbɨŋ bi dùŋ ə tɔŋ li mbɛɛ mə. 13 Fieŋ fidi hləŋ həmə dududu ffɨŋ Chu mà fə ffɨŋ duŋ ə yee fi nə̄lə ə wu dí. Bieŋ binhliŋ nyìee ə wu dí wɛɛŋ. Ə wu nnu kkə kənə bəmbwo yɔɔ biwu ə wu fwi.

Jisho duŋ che kwoo ki bəche ntofi ŋkuntaŋ

14 Nəni ye kkə hə yɔɔlə lə kkə kənə che kwoo ki bəche ntofi ŋkuntaŋ, nnu i duŋ Jisho Ŋwa Nchu, nnu i biŋna tɔ buuli gəŋ buh, yee kkə kə̂nə kimbemi ntakə kkɨŋ kkə ba kie bən'yɔɔ bə bəne. 15 Che kwoo ki bəche ntofi ya nu duŋ nə mbɛɛ nnu duŋ ə i nakə kwoo hlɨŋ bə be ə biaŋnə kiaa mə kə. I duŋ mbɛɛ nnu bimɔŋnə mà bwoo dəŋ ə wu go, ə jé mə yinhliŋ ye bi bwòlə ə be go, kwaalə i mà kə fəə yiwaha kə. 16 Nəni, yee kkə bâŋ kkə bwò naamə hləŋ baha ə kabala Chu go ə dɔhɔ kkɨŋ i nyìi tɔŋ liih linwaa, fo mə lə kwo hlɨŋ bə be bwɔɔ nnu bieŋ kah be, ə i nyii tɔŋ liih linwaa bə be chɨnə be.