Hiblu 3

Jisho ko kah Mushe

Nəni, bəŋgwoŋ bbəŋ bə́ dùŋ wɛɛŋ, bbəŋ bə́ cheela jə dəŋ bə́ lə bə́ lɛɛ ə mbiŋ nnu buh mə, bə yii bufe ə Jisho mə. I dùŋ mbɛɛ faŋnə Jisho Chu baa duŋ dəŋ che kwoo ki bəche ntofi bə kimbemi kkɨŋ kkə ba bən'yɔɔ bə bəne lə ə kiaa. 2 I màa i nɨ̄ŋ bə tɔŋ liih linhliŋ bə Chu nnu i mà chi yo wu lə yee i nɨ̄ŋ bə wu dəŋ ye Mushe màa i nɨ̄ŋ lə bə tɔŋ liih linhliŋ ə chəŋ Chu mə. 3 Kwaalə, Jisho dùŋ mbɛɛ nnu bə́ lə yee bə́ dōhi gbaaŋ kah Mushe dəŋ yəəŋ ye mbɛɛ bwò lə i wɛɛ chəŋ yee bə́ dōhi wu kah chəŋ ye. 4 Chəŋ ji hləŋ həmə nni i dùŋ kə duŋ nə ŋ'wɛɛ mbɛɛ kə. Kwaalə, ə Chu nnu i wɛɛ bieŋ binhliŋ. 5 Mushe màa i nɨ̄ŋ kinwaakə bə tɔŋ liih linhliŋ ə chəŋ Chu mə ye mbɛɛ nimi lə. Bieŋ binhliŋ bbɨŋ i màa i fə̄ màa bi fwɔ̄ŋ ə duŋ fieŋ ffɨŋ Chu yá bwo yɔɔ ba. 6 Kwaalə, Kleto mà bwoo yee i dūŋ dəŋ bə muŋgeni ə chəŋ Chu mə bə tɔŋ liih linhliŋ i dùŋ ye ŋiaŋ nnu chəŋ lə. Chəŋ Chu ni lə be, ə kkə lemi ntakə ə fieŋ ffɨŋ kkə kwàa tɔŋ kkə kèe fwi ə fi go bə kiŋ'we.

Mbɛɛ kə jɨŋ nə fieŋ fi Chu kə

7 Nəni, kkə wo fieŋ ffɨŋ Fiana Wɛɛŋ mà yɔɔ. I mà yɔɔ lə,

“Ə bə wo Chu yɔ̀ɔ bə bəŋ daŋ,

8 bə kə yee bə tâ bikuu ye bəchwa bieeŋ mà hləələ bə Chu

bwɔɔ nnu bə́ mà mɔŋ Chu ə nji kə.

9 Ə màa həmə nnu bəchwa bieeŋ mà mɔŋ mi Chu,

bə́ ŋəŋ bieŋ bintaabə bbɨŋ mmà nfə ə bigoŋ mə mbwɛɛnya.

10 Nəni, nfwoo tɔŋ bə ŋkaani bəne yo, nhlə n'yɔ̀ɔ lə,

‘Tɔ́ŋ ŋəbə duŋ nə ba ə mi mə bwɔɔ mənhliŋ kə.

Bə́ baala kələ jé yɨŋŋ kə.’

11 Tɔŋ lo mi, ŋkaŋ muŋkaŋ lə,

‘Duŋ ə bə́ yá baa lɛɛ ə dɔhɔ kɨŋŋ ki ŋɔɔninə mə kə.’”

12 Bəŋgwoŋ, yee bə jə̂ bwɔɔ lə mbɛɛ ju ə bəŋ mə kə duŋ nə bə tɔŋ liwaha llɨŋ li nɨ̀hŋ lə i kə bemi bə Chu kə, duŋ ə li fə ə mbɛɛ fii kinhlaŋ bə Chu nnu i kə̀nə yo kinduŋh. 13 Fieŋ ffɨŋ bə kənə bənfə duŋ lə yee bə tâhi gbo wi mbɛɛ mənhliŋ joo ŋənhliŋ, ye fi duŋ lə lə butuu bwe lə, “Daŋ.” Yee bə fə̂ nəni fo fieŋ fiwaha fidi ya kə ja bwo lɛɛnti mbɛɛ ə i ja chɔɔ bənta kwoo. 14 Yee bə kə̂lə lə kkə bie fieŋ fimwi bə Kleto, ə kkə ba bəŋkənə fieŋ ffɨŋ kkə màa kkə lēmi fie ə fi bəŋ bwɔɔ nnu fwii gəŋ kpee həŋgbɔŋ. 15 Yee bə hlê fieŋ fɨhŋ lə,

“Ə bə wo Chu yɔ̀ɔ bə bəŋ daŋ,

bə kə yee bə tâ bikuu ye bəchwa bieeŋ mà hləələ bə Chu kə.”

16 Ə bə́ bənyəhə bbəŋ bə́ mà wo Chu yɔ̀ɔ bə bə́ lə, yee bə́ hlə̂ə bə wu lə? Ə mà kə duŋ nə bəne bənhliŋ bbəŋ Mushe mà jə ə Ijip fu bə bə́ kə lə? 17 Ə bənyəhə bbəŋ Chu mà fwoo tɔŋ bə bə́ ə bigoŋ mə mbwɛɛnya lə? Ə kə duŋ nə dəŋ bə́ bbəŋ bə́ mà fə yíwaha, hlə kpe mə nji kə lə? 18 Ə baa duŋ dəŋ bənyəhə bbəŋ Chu mà kaŋ lə duŋ ə bə́ lɛɛ ə dɔhɔ kiih ki ŋɔɔninə mə kə lə? Nhle lə ə bə́ dəŋ bbəŋ bə́ mà ta bikuu lə? 19 Nəni kkə ŋəŋna lə bəne bie mà duŋ ə bə́ gəŋ lɛɛ ə dɔhɔ kie mə kə, yulahalə bə́ mà duŋ kimbemi hləŋ ə Chu mə.