Hiblu 2

Kkə kə tələ kinfukwoo kkɨŋ Jisho màa i jāa kie i làanə ki ki kə

Fi duŋ lə kkə kənə bən'yii bufe kinwaa ə fieŋ ffɨŋ kkə mà wo mə, fo kkə lə nakə jaa yee kkə jāaŋka bu jaaŋkanə kə. 2 Kkə hle lə, ə hlɨŋ nni bənchinda bə Chu mà keeh ye fwii mà duŋ fieŋ fintaabə ba gbaaŋ, ə mbɛɛ lə bwuŋ ŋkɨnə ləkə nɨhŋ bənfə ye i yɔ̀ɔ lə, ə mbɛɛ yo dəŋ kənə bikoonə bi mu yəəŋ, 3 ə yá fə laha ə kkə hlə nakə ŋəŋ nə ə ŋgə go ə kkə jə kinfukwoo kiŋkuntaŋ kɨhŋ lə ə fieŋ finya lə? Kinfukwoo kɨhŋ lə Baba Jisho nnu i mà hlaa chɔɔ bən'yɔɔ ki ki, bəne bbəŋ bə́ mà woo ye i dòntə bwo fwɔŋ kah bə kichɛɛŋ kie ye bə́ màa bə́ dōntə lə be. 4 Chu dəŋ mà fwɔŋna kinyii ki bieŋ bbɨŋ bi màa bi nyīi muŋga mwii maa bieŋ bi ŋɨŋ gəə bə nfíŋ yyɨŋ yí màa yí kāh. I baa ga nnə́ ŋə Fiana Wɛɛŋ ə kinhle kiih mə ye i mà kiɛɛ lə bənfwɔŋ mu.

Jisho duŋ mbɛɛ nnu i mà tɔ be je kinfukwoo

5 Chu mà kə chiee mbiŋ fwɔ nnu i yu bwō yo nnu kkə yɔ̀ɔ yo ki wu lə ə bənchinda biih bbəŋ bə́ lə yee bə́ hlāah kə. 6 Bə́ bieŋna ə dɔhɔ kidi mə ə Kiŋwaati ki Chu mə ki diɛɛnə kɨhŋ lə,

“Mbɛɛ ŋkee lə nyəhə nnu wə hlè yo kiih lə?

Ŋwa Mbɛɛ ŋkee lə nyəhə nnu wə kə̀nə yo ŋgɨŋ wi lə?

7 Ə bwɔɔ chɛɛ mə nəni wə mà fəə i duŋ ə dɔhɔ

kkɨŋ ki dùŋ bənchinda bwo kwe.

Wə bwo nɔhiŋ wu, i kənə kiŋkuntaŋ bə kiŋkohi.

8 Wə chiee bieŋ binhliŋ ə mbɛɛ ŋkee kwe, i yu hlāah.”

Ye Chu mà chilə bieŋ binhliŋ ə mbɛɛ ŋkee kwe, fieŋ fidi baalə duŋ ffɨŋ fi dùŋ kə duŋ nə wu kwe kə. Maa ye fi duŋ lə dəŋ nəni, kkə ŋəŋ nə lə bieŋ binhliŋ duŋ ə mbɛɛ ŋkee kwe. 9 Kkə ŋə̀ŋ lə Chu mà fəə Jisho i duŋ ə bənchinda biih kwe ə bwɔɔ bəŋ chɛɛ nəni. Kwaalə Chu duŋ duŋ bihiŋ wu, yee i kə̄nə kiŋkuntaŋ bə kiŋkohi yulahalə i mà woo ŋgə bwo kpe, fo mə lə kpe kpe mbɛɛ mənhliŋ yu kinleki ki Chu bə bəne. 10 Ə Chu nnu i mà fə bieŋ binhliŋ, bieŋ binhliŋ dùŋ biih. Ye i mà kiɛɛlə lə mə lə jə bəne kiŋaaŋkə bbəŋ bə́ dùŋ bwɔni biih bə́ lɛɛ ə kiŋkuntaŋ kiih mə, fi hlə yee fi dūŋ yəəŋ lə i fə Jisho wo ŋgə fo mə lə yee i dūŋ i wuna gəŋ kpee həŋgbɔŋ nnu mə lə tɔ je kinfukwoo kibə. 11 Wu Jisho nnu i fə̀ yo bəne chàa ə Chu fwi, duŋ nnu bə́ bə bəne bbəŋ i fə̀ bie bə́ chàa, kənə Tili bə́ mwi. Fiee fieŋ ffɨŋ gbo duŋ fie kə bee lə wu lə yee i chēe bə́ lə bəmaani biih. 12 I mà yɔɔla bə Chu bwɔɔ ju bəŋ lə,

“Nlə mbihiŋ yii lo buh ə bəŋgwoŋ mə.

Nlə n'yee nshêeni, ŋkòhi wə ə kimbumə kibə mə.”

13 I baa yɔɔ lə,

“Nlə n'yii bufe buŋŋ ə Chu mə.”

I baa yɔɔ dəŋ lə,

“Nu mi fəŋ bee bwɔni bbəŋ Chu nəə mi.”

14 Ye bwɔni bbəŋ i yɔ̀ɔ bəhŋ ə bəne bbəŋ bə́ kə̀nə nyaŋ nni go bə ŋgɔŋ, wu Jisho hlə jə dəŋ nyaŋ mbɛɛ ŋkee, fo mə lə kpe bənlaa wu nnu i kə̀nə yo muŋga mu kpe, nnu i duŋ hlaata. 15 I bwo fə nəni hlə fwoo bəne bbəŋ bə́ dùŋ ə munfwa mə ə kinduŋh kibə mə kinhliŋ yulahalə bə́ màa bə́ lɔ̄ kpe. 16 Fi duŋ ŋgbuuŋ lə i mà kə kənə ŋgɨŋ bə bənchinda bə Chu kə. I mà kənə ə duŋ bə kichəŋ ki Ablahaŋ. 17 Fie màa fieŋ ffɨŋ fi mà fə fie Jisho hlə chu ye bəmaani lə ə fieŋ finhliŋ mə, fo mə lə yee i dūŋ che kwoo ki bəche ntofi bə́ nnu i kwò hlɨŋ bə bə́, ə duŋ i yiila dəŋ tɔŋ ə nimi li Chu mə bənfə gbɛmi yu yíwaha yibə. 18 Ye i mà wolə ŋgə, bimɔŋnə bwò ə wu go, i hlə yee i kə̄lə ye duŋ ə yee i chɨ̄nə bəne bbəŋ bimɔŋnə bwò dəŋ ə bə́ go.