Hiblu 1

Kiŋwaati kkɨŋ bə́ mà bieŋ bə

Bəhiblu

Chu yɔɔla bə be ə duŋ ə Ŋiaani jə

Fwii fwii màa dūŋ, Chu yɔ̀ɔ bə bəche tah biaa ə bijə bi bəne biih bə hlɨŋ mə chá kiŋaaŋkə bə ə jé mə chili chili. 2 Kwaalə, ə yee ə dūŋ ə joo ŋə dɨŋ ŋəhŋ mə, i yɔɔla bə be ə duŋ ə Ŋiaani jə. Ə Ŋiaani nu, nnu i shaala lə mə lə duŋ ndikwili fieŋ finhliŋ. Ə duŋ wu nnu Chu mà fə mbiŋ bə bieŋ binhliŋ kàh ə wu kwáŋ. 3 Kinchaa ki Chu tə̀ ə wu go, i bù Chu kibɛɛ. Ə wu nnu i fə̀ buuli bə shishɔ dùŋ. I fə̀ ə duŋ bə die yi nni i kə̀nə muŋga. I mà yaah be ə yíwaha yaa kwáŋ. Ye i mà yah'lə nəni i hlə biŋ buh gəŋ shii ə kwaŋ wi diee wi Chu Kiŋkuntaŋ mə.

Ŋwa Nchu ko kah bənchinda bə Chu

4 Fi hlə duŋ lə Chu mà fəə Ŋiaani yee i kō gbaaŋ kah bənchinda bə Chu, dəŋ yəəŋ ye yii llɨŋ Chu mà do le wu ko li gbaaŋ dəŋ kah ŋəbə. 5 Kkə kələ lə i ko yulahalə nchinda Chu ju hləŋ həmə nnu Chu mà hlaa yɔɔ bə wu lə,

“Wə dùŋ Ŋiaa,

daŋ n'yɔɔla lə ndùŋ Chwa.”

Ju hləŋ həmə nnu nhlaala yɔɔ bə wu lə,

“Nlə n'yee ndūŋ Tili

i dùŋ Ŋiaa”

6 Ə mà duŋ bwɔɔ nnu Chu mà duŋ bənfaŋ Ŋiaani nu fwii ə mbiŋ nu mə, i yɔɔ lə,

“Bənchinda bə Chu bənhliŋ yee bə́ bwɔ̂kwe bə wu.”

7 Fieŋ ffɨŋ Chu mà yɔɔ ki bənchinda biih duŋ fɨhŋ lə,

“I fə̀ bə́ dùŋ ye fwee,

i fə̀ dəŋ bbəŋ bə́ dùŋ bie bəne biih bə nimi

bə́ dùŋ ye liniini li bwii lə.”

8 Ə chu bə Ŋiaani, i yɔɔ lə,

“Oo Chu, wə lə shii ə kabala wa bəŋ yee wə hlâah bwɔɔ mənhliŋ kə kaa.

Fwɔ wintiiŋ yáa wi dūŋ kichɔchɔ ki muŋkɨŋ mwo.

9 Wə lèki ə duŋ fieŋ ffɨŋ fi dùŋ ntiiŋ, wə lòh bə fiwaha.

Nəni mi Chu nnu ndùŋ nu Chu wa

nhlə mbihiŋ wə kah kintu ko,

ye nlɔɔlə wə bə məŋkaŋ mə kintɨŋ.”

10 I baa yɔɔ dəŋ bə Ŋiaani lə,

“Baba, ə wə nnu wə mà fə mbiŋ həmɛɛ,

bieŋ binhliŋ bbɨŋ bi dùŋ buh duŋ nimi li kwáŋ ŋo.

11 Bieŋ bɨhŋ yá yi kah ə she kwaa wə.

Bi yá dɨŋ ye kindu lə.

12 Wə yá ka bi ye kihlə lə.

Wə yá gaanə bi ye bindu bbɨŋ bi dɨŋna lə.

Kwaalə wə yá ba kwaa yee wə dūŋ ye wə duŋ lə.

Bigoŋ bwo yá kaa kə dududu.”

13 Ə nchinda Chu nwɛhɛŋ nnu Chu mà hlaa yɔɔ bə wu lə,

“Shii ə kwaŋ wuŋŋ wi diee mə,

gəŋ bwii bwɔɔ nnu nlə nɔhiŋ

bəne bwo bbəŋ bə́ dùŋ kə jənə bə wə ə wə dí

ye kinu ki wuh ŋo lə,

ə wə diɛŋ wuh ŋo ə bə́ bəŋ lə?”

14 Bə́ kə duŋ nə bənchinda bə Chu bbəŋ bə́ dùŋ kwaa bəfiana bbəŋ bə́ nɨ̀ŋ bə Chu, i fàŋ bə́, bə́ jàa bə́ chɨ̀nə bəne bbəŋ bə́ yá kənə kinfukwoo lə?