Taytu 2

Bilaanənə bi kinduŋh kinwaa

Bə wə Taytu, ŋkwo wa duŋ lə yee wə lāanə bəne ə duŋ bə bieŋ bbɨŋ bi gbeemə bə kinlaanə kinwaa. 2 Yee wə kêeh bənəə bəcha lə yee bə́ fwōŋ go ŋəbə ə fieŋ finhliŋ mə, yee bə́ kə̂nə kimbwɔkwe bə go ŋəbə, bə́ tɨ̀ŋ ŋkɛ bə go ŋəbə, bə́ kə̀nə kimbemi kkɨŋ ki dùŋ ntiiŋ, bə́ kə̀nə kinleki kkɨŋ ki dùŋ ntiiŋ, bə́ kwàa tɔ́ŋ ə bəŋgə bənhliŋ mə.

3 Yee wə kêeh dəŋ bəkwɛɛ bəcha lə yee bə kə̄nə kinduŋh kkɨŋ ki nyìi kimbwɔkwe ki Chu. Bə́ kə yee bə́ bîhi yíi ŋə bəne. Bə́ kə dûŋ nə bənfwa bə mbihŋ kə. Yee bə́ lâanə bəne ə duŋ bə bieŋ binwaa.

4 Nəni, ə bə́ hlə yee bə́ lāanə hlɔ́ŋ yí bəkwɛɛ ye duŋ ə yee yí lēki bənəə bəbə maa bə bwɔni bəbə, 5 Yee bə́ tɨ̂ŋ ŋkɛ bə go ŋəbə, bə́ dùŋ ə kinduŋh ki wɛɛŋ mə, bə́ fə̀ bifənə ə chəŋ, bə́ kə̀nə tɔ́ŋ ŋənwaa bə bəne, bə́ wò bə bənəə bəbə. Nəni, ə mbɛɛ nakə yee i yɔ̄ɔ die waha ki die Chu kə.

6 Ə lə dəŋ yəəŋ ye duŋ ə yee wə yɔ̄ɔ bə hlɔ́ŋ yí bənəə lə yee yí tɨ̂ŋ ŋkɛ bə go ŋəbə. 7 Yee wə nyîi fwɔ winwaa ə fieŋ finhliŋ mə ffɨŋ wə fə̀, fo bəne lə yee bə́ ŋə̄ŋ bə́ bə̀lə. Bwɔɔ nnu wə làanə bəne fieŋ fidi, wə yii tɔŋ lo linhliŋ ə fi mə, wə làanə bə ŋgɨŋ, 8 biyɔɔnə bwo dùŋ ntiiŋ ye duŋ ə mbɛɛ nakə kənə fieŋ fiwaha bən'yɔɔ mu kə. Nəni, ə bəne bbəŋ bə́ kə̀nə noonə bə wə kənə gbo wibeenə yulahalə bə́ lə bə fieŋ fiwaha bən'yɔɔ kiaa kə.

9 Laanə bənfwa lə yee bə́ nə̂ go ŋəbə bə bəne bbəŋ bə́ kə̀nə bə́, bə́ fə̀ fieŋ finhliŋ ye bəne bie kiɛɛlə lə yee bə́ fə̄. Bə́ kə yee bə́ chûu bə́ jə kə. 10 Bə́ kə yee bə́ yî bieŋ bibə kə. Bə́ kənə bənyii ə jé mə yinhliŋ lə bə́ dùŋ bəne bə kichɛɛŋ. Ə yee bə́ fə̂ nəni ə fieŋ finhliŋ mə, ə bəne hlə yee bə́ ŋə̄ŋ kinlaanə ki Chu nnu i dùŋ yo Nchuu Nfwoo ya, lə ə fieŋ ffɨŋ fi kə̀nə njənjə.

11 Yee wə kêeh bə́ nəni, yulahalə kinleki ki Chu bwoo fo bəne bənhliŋ duŋ ə bə́ bwo fukwoo. 12 Ki laanə be lə, kkə tukwaŋ ə fwɔ wwuŋ Chu duŋ kə leki go, bə lə kkə kə kənə hlɔɔ ŋkuntaŋ bə bieŋ bi yaŋ kwe kə. Yee kkə dûŋ bə bufe bwaa bunhliŋ, kkə dùŋ bə kinduŋh kintiiŋ maa kinduŋh kkɨŋ Chu kiɛɛ yaŋ ə mbiŋ nu nte. 13 Yee kkə dûŋ nəni, kkə kè njənjə nnu kkə kèe yo fwi ə wu go, nnu i yá fu, nnu i duŋ kiŋkuntaŋ ki Chu ya ŋkuntaŋ, nnu i dùŋ yo Nchuu Fwoo Jisho Kleto. 14 I mà nəə kwoo kiih yu be fo mə lə yah be ə yíwaha yinhliŋ mə, bənfə lə kkə chaa ə yíwaha yinhliŋ mə, bənfə lə yee kkə dūŋ bəne biih bbəŋ bə́ kə̀nə ŋgɨŋ ŋkuntaŋ bənfə fwɔ winwaa.

15 Bɨhŋ lə bieŋ bbɨŋ wə duŋ lə yee wə tāhi go ŋəbə mu. Yee wə lɛ̂hiŋ bə́ bə muŋgeni munhliŋ mmuŋ wə kə̀nə. Wə kə bèmi lə mbɛɛ jɨŋ wə kə.