Taytu 1

Kiŋwaati kkɨŋ Pwɔɔ mà bieŋ bə

Taytu

Ə mi Pwɔɔ, ndùŋ ŋwuŋ nimi Chu, ndùŋ mbɛɛ hlɨŋ Jisho Kleto. Nimi lɨŋŋ duŋ lə n'yee nfə̄ kimbemi ki bəne bbəŋ Chu shaala yee ki kō ki gə̀ŋ fwi fwi, bə lə yee bə́ kə̄hlə fieŋ fi kichɛɛŋ ffɨŋ fi bə̀lə fwɔ wwuŋ wi duŋ wi Chu, 2 bə́ kee fwi ə kinduŋh ki kə kaa go. Kinduhŋ kkɨŋ ki dùŋ ki Chu nnu duŋ ə i nakə kaalə yo ye i mà ŋkaachi lə mbiŋ nu, i kaani kə chɔɔ lə kə. 3 Bwɔɔ nnu bwɔɔ yəəŋ mà bwo wunə, i hlə nyii die yi wɛɛŋ kah ə die yi nni ndòntə ye mə. Ə Chu Nchuu Fwoo nnu i mà nə muŋgeni mwe lə n'yee ndōntə.

4 Mbīeŋ kiŋwaati kɨhŋ bə wə Taytu. Wə duŋ ŋiaa kichɛɛŋ yo ə kimbemi mə kkɨŋ ki dùŋ kiaa be bənhliŋ. Chu Tah bə Kleto Jisho Nchuu Fwoo ya nyii tɔŋ liih linwaa bə wə, baa nə dəŋ wə kindunshiiŋ.

Nimi llɨŋ Taytu mà she bənfə ə Klɛt

5 Fieŋ ffɨŋ mmà nshe fie wə ə Klɛt, mà duŋ lə wə she lɛhiŋ bieŋ bbɨŋ bi màa bi kaani bīŋkɔ, baa chi bəche bimbumə bi bəne bə kimbemi ə bibalaki mə binhliŋ ə je nni mmà nyii ye wə mə. 6 Bə mbɛɛ bənduŋ che kimbumə, i kənə bənduŋ mbɛɛ nnu i dùŋ kə kənə fieŋ ffɨŋ duŋ ə bə́ kwɛŋ wu mu kə, i kənə bənduŋ nyimi kpɛ mwi, bwɔni biih dùŋ bə kimbemi, ə kə duŋ nə lə bəne ŋəŋ lə bə́ bie woo woo ləkə bie bə́ tā bikuu kə. 7 Ye che kwoo ki kimbumə duŋ lə mbɛɛ nimi Chu, duŋ lə i kə kənə fieŋ ffɨŋ duŋ ə yee bə́ kwɛ̂ŋ wu ə fi go kə. I kə dùŋ nə lə yee i dūŋ mbɛɛ nnu duŋ ə yee bə́ wō kwaa bə wu kə, ləkə i kə̀nə tɔŋ li fwa fwa, ləkə nnu i ŋwì mbihŋ mə kwò wu kə. I kə dùŋ nə lə yee i chɔ̄ɔ bə bəne, ləkə nnu i ge díi bə mbɨŋ nya kə. 8 I kənə bəntɨŋ jə bəne bəkpuuni ə wu go, i lèki fieŋ finwaa, i kə̀lə bəntɨŋ ŋkɛ bə gbo wiih, i dùŋ ntiiŋ, i kə̀nə fwɔ wi wɛɛŋ, i kə̀lə bəŋkənə gbo wiih. 9 I kənə bənduŋ mbɛɛ nnu i kə̀nə kinlaanə kinwaa ntakə, kkɨŋ bə́ mà laanə wu mu. Nəni ə i hlə kələ bənnə keehnə bə bəne i bə̀lə kinlaanə kintiiŋ, i baa i tɔ̀ dəŋ bəne bbəŋ bə́ noo kinlaanə kie.

Yee bə́ chɨ̂lə bikeehnə bi bəne bə yo kaalənə

10 N'yɔ̄ɔ nəni yulahalə bəne bie həmə kiŋaaŋkə bbəŋ bə́ tà bikuu, bə́ yɔ̀ɔ yó yinya, bə́ fìhi bəne, gbɛtɛlɛ bəne bbəŋ bə́ lèmi bie lə bə́ kənə bənyieŋ jó yí bəne. 11 Bəhŋ lə bəne bbəŋ bə́ yá maalə biwu bibə bu maalə nə, yulahalə bə́ jàa bə́ hlàhi chə́ŋ yinhliŋ yí bəne, ye bə́ làanə lə bieŋ bbɨŋ bə́ dùŋ kə kənə bənlaanə. Bə́ fə̀ nəni ə duŋ yu mbɨŋ nya nnu bə́ bə̀lə. 12 Mbɛɛ bə́ ju kibɛɛ nnu bə́ yɔɔ lə i mà duŋ mbɛɛ hlɨŋ mà yɔɔla kibə yɔɔ lə, “Bəne bə Klɛt duŋ bəne bə kaalənə yo bwɔɔ mənhliŋ. Bə́ dùŋ nyáŋ yí nji yiwaha, bə́ dùŋ kwaa bəne bə kifɛɛ bbəŋ bə́ dì tiɛɛ.” 13 Biyɔɔnə bɨhŋ ki bə́ duŋ ba chɛɛŋ. Nəni yee wə tɔ̂ɔ ba bə́ dí dí, fo bə́ kənə kimbemi ə duŋ kintiiŋ, 14 kahiŋ bənnə go ŋəbə bəŋ'wo ə duŋ chá yí yó yí Bəjuu, ləkə bieŋ bbɨŋ bəne bbəŋ bə́ nɨhŋna bieŋ bi kichɛɛŋ bbɨŋ Chu yɔ̀ɔ lə yee bə́ bə̄lə. 15 Bwɔɔ nnu bəne kənə tɔ́ŋ ŋə wɛɛŋ, bieŋ binhliŋ chàa bə bə́. Kwaalə, bwɔɔ nnu bə́ kə̀nə tɔ́ŋ ŋənyi, kimbemi hləŋ, fieŋ hləŋ həmə finchaa ə bə́ mə, yulahalə munhlenə mubə bə jé yyɨŋ bíwɛɛ bibə dùŋ bie mə beela. 16 Bə mbini bie bəne yɔ̀ɔ lə bə́ kə̀lə Chu, kwaalə fwɔ́ ŋəbə bu kaka nyii lə bə́ nɨhŋna Chu bu nɨhŋnə. Fwɔ́ ŋəbə nyieela gbaaŋ lə, bə́ tà bikuu. Bə́ dùŋ nə bəne bbəŋ duŋ ə bə́ fə fieŋ finwaa kə dududu.