Taytu 3

Ye bəne bə kimbemi dùŋ lə yee bə́ fə̂ bə bəne bedi

Yee wə ŋôo bəne bə kimbemi lə yee bə wô bəne bbəŋ bə́ hlàah kɔnɔ bə bbəŋ bə́ kə̀nə muŋgeni ə bə́ bəŋ. Yee bə́ fə̂ fieŋ ffɨŋ bəne bie yɔ̀ɔ, bə́ duŋ bbəŋ bə́ bwɛɛla bənfə fieŋ finhliŋ ffɨŋ fi dùŋ yəəŋ. 2 Bə́ kə yee bə́ yɔ̂ɔ bieŋ biwaha ə mbɛɛ go kə. Bə́ kə yee bə́ kpə̂nə bikpənini kə. Yee bə́ dûŋ bə kindunshiiŋ, bə́ bwɔ̀kwe ə bəne bənhliŋ fwi. 3 Hle dəŋ lə kkə mà shee fə nfili, kkə tà bikuu, bəne fə̀ kkə nyɔ̀kɔ je. Kkə mà duŋna bənfwa bə bieŋ chili chili bbɨŋ go ŋiaa lèki, baa di go ŋiaa. Kkə màa kkə dūŋh kinduŋh kkɨŋ fwɔ waa kə̀nə kwaa ə duŋ tɔ́ŋ ŋəŋ'waha bə bimi biluhunə, bəne lòh bə be, kkə lòh dəŋ bə bəne.

4 Kwaalə, bwɔɔ nnu Chu Nchuu Fwoo ya mà nyii tɔŋ li kwaanə bə kinleki kiih ə be mə, 5 i hlə fwoo be. I mà fwoo be yu fieŋ fidi finwaa ffɨŋ kkə mà fəə kə. I mà fwoo yu tɔŋ linwaa kah ə ŋ'wii nnu i mà wii be kkə kənə bwee lifwɔ, Fiana Wɛɛŋ gaanə be yee kkə dūŋ bəne bəfwɔ. 6 Fiana Wɛɛŋ nu duŋ nnu Chu mà shoola ə nshoo mə ə be bəŋ kah ə Jisho Kleto Nchuu Fwoo ya mə. 7 I mà fə nəni, fo mə lə jə be lə kkə duŋ nə bə gbenə kə yu kinleki kiih bə be. Nəni kkə lə yee kkə dūŋ bəndi kwili biih kkə kèe fwi bəmbwo kənə kinduŋh ki kə kaa. 8 Biyɔɔnə bbɨŋ n'yɔ̄ɔ bɨhŋ lə chɛɛŋ ba.

Ŋkiɛɛ dəŋ lə yee wə yɔ̄ɔ wə kpeba ə bieŋ bɨhŋ bəŋ bə bəne, fo bəne bbəŋ bə́ bema bə Chu lə ŋəŋ lə bə́ nəə go ŋəbə bənfə fwɔ winwaa. Bieŋ bɨhŋ duŋ dəŋ binwaa gbaaŋ, bi bwò bə mbɨŋ ə bəne bəŋ bənhliŋ. 9 Kwaalə, yee wə gɛ̂hiŋ noonə kinfili, bə yíi ŋə bəche bichəŋ bi bəne bbɨŋ bə́ jəə bwɔɔ fa bə́. Yee wə gɛ̂hiŋ dəŋ binoonə bə bikpənini ki bəŋkɨnə bə Bəjuu. Bimbini bɨhŋ bieŋ kə̀nə lə ba mbɨŋ kə. Bi dùŋ bieŋ binya. 10 Ə mbɛɛ duŋ mu nnu i bwò bə kiŋga, wə yɔɔ bə wu. Ə wə yɔɔ bə wu cha mi gəŋ bwii ə chá bəŋ fie ə mə nakə wii lə kə, wə tukwaŋ ə je yi go. 11 Yee wə kə̂lə lə mbini yo mbɛɛ duŋ nnu i shee je ntiiŋ yee i fū ə nfu mə, fwɔ wiih duŋ wiwaha, i yiila kwoo kiih ə bəŋgə mə.

Biyɔɔnə bə cheenə ki həŋgbɔŋ

12 Bwɔɔ nnu nlə nfaŋ Atema ləkə Tikiku ə wə go, ə mə bwo, wə ju ba gbaaŋ bəmbwo chili mi ə Nikopoli. Ə mə nnu ndɔɔ lə nlə nduŋ ə bwɔɔ fwee kintaabə kie mə. 13 Ju ba gbaaŋ bənchɨnə Jena mbɛɛ nnu i kəla bəŋkɨnə, bə Apolo ə gbɛŋ wibə mə. Ju dəŋ bəŋəŋ lə bə́ kə jɨnə fieŋ finhliŋ ffɨŋ bə́ kìɛɛ kə. 14 Bəne biaa dəŋ kənə bənlaanə bənnə go ŋəbə bənfə nimi linwaa, fo bə́ lə yee bə́ chɨ̄nə bə bieŋ bbɨŋ bi dùŋ lə yee bə́ chɨ̄nə mu. Bə́ kə yee bə́ dûŋ kwaa nya kə.

15 Bəne bənhliŋ bbəŋ kkə dùŋ fəŋ bee bə́ faŋna cheenə kibə bə wə. Chee bəne bə kimbemi bənhliŋ bbəŋ bə́ lèki be. Kinleki ki Chu yee ki dûŋ bə bəŋ bənhliŋ.