1 Timɔti 5

Keehnə ye duŋ ə Timɔti yee i fə̄ bə bəne bə kimbemi

Bwɔɔ nnu wə kiɛɛ lə wə lɛhiŋ ŋwucha, wə kə yee wə nyîeemi wu bu nyieeminə kə. Kwaalə keeh wu ə ŋkeeh mə ye chwa lə. Wə jə̀ hlɔŋ yiniɛ ye bəmwaa bəniɛ lə. 2 Yee wə jə̂ dəŋ bəkwɛɛ bəcha ye bəmwah lə, wə jə̀ hlɔŋ yikwɛ ye jɛ́ɛmi yo lə, wə kèeh bə́ ə je wɛɛŋ mə ə fieŋ finhliŋ mə.

Ye duŋ ə kintu yee ki fwōŋ bəkwɛɛ bə bəŋkwu

3 Yee bə fwôŋ bəkwɛɛ bə bəŋkwu bbəŋ bə́ dùŋ bie mbɛɛ fwoŋ nə bə́ hləŋ dududu. 4 Kwaalə, ə kpɛɛ ŋkwu lə kənə bwɔni, ləkə bwɔŋ bə bwɔni, bə́ hlaa laanə bənɨŋ nimi libə li kimbemi, bənfwoŋ dəŋ bəmahni bəbə ye bə́ màa bə́ fwōŋ lə bə́. Fɨhŋ lə fieŋ ffɨŋ fi wunə ə Chu fwi. 5 Kpɛɛ ŋkwu nnu i duŋ ba kpɛɛ ŋkwu nnu i duŋ kə kənə mbɛɛ nnu i fwòŋ wu, i duŋ nnu i kèe kwaa fwi ə Chu go, i chèe Chu bwɔɔ mənhliŋ, i dè bə Chu ə butuu bə bushi. 6 Kwaalə, kpɛɛ ŋkwu nnu i jàa ŋkwo wi i dì gbo wiih, duŋ nnu i kpee yo ba maa ye i kaani lə i jàa fa.

7 Yee bə yɔ̂ɔ bieŋ bɨhŋ bə bə́, fo bəne lə nakə yee bə́ hlāah bə́ kə. 8 Ə mbɛɛ lə duŋ nnu duŋ ə i nakə fwoŋnə kichəŋ kiih, gbɛntɛlɛ chəŋ yi, kəə i nɨhŋna fwɔ wi kimbemi. Mbini yo mbɛɛ duŋ nnu fwɔ wiih beela kah wi mbɛɛ nnu i dùŋ kə kənə kimbemi.

9 Kpɛɛ ŋkwu nnu duŋ ə bə́ yii yii liih ə kintu ki bəkwɛɛ bə bəŋkwu mə nnu duŋ ə bə́ chɨnə wu, i kənə bənduŋ nnu i bwiila bigoŋ mbwɛɛbuhlɔ, nnu i mà duŋ kwaa kpɛɛ nyo mwi, 10 ə duŋ nnu bə́ kə̀lə kinwaa lə i kə̀nə fwɔ winwaa. Nnu i koha bwɔni biih ə je nwaa mə, i jə̀ nfúuntə ə wu chəŋ, i wìi wuh ŋə bəne bə Chu, i chɨ̀nə bəne bbəŋ bə́ dùŋ ə ŋgə mə, i nə̀ gbo wiih bənɨŋ nimi linwaa ə jé yinhliŋ mə.

11 Kwaalə, wə kə bemi bən'yii bəkwɛɛ bə bəŋkwu bbəŋ bə́ kaani hlɔŋ yikwɛ ə kintu mə lə yee bə́ chɨ̄nə bə́ kə, yulahalə ə gbo wibə lə jaka chɔɔ bənshi, ə bə́ laamə nə ŋkaachi nnu bə́ mà kaachi bə Kleto, yee bə́ kīɛɛ bəŋgəŋ bah bənəə bədi. 12 Ə bə́ lə fə nəni, kəə bə́ too ŋgə ə bə́ fí yulahalə bə́ bwuŋna ŋkaachi bə́ nnu fwii. 13 Bəmbaa yiinə mu, ə wə yii bə́ ə kintu mə ə bə́ ja yee bə́ dūŋ ye bəne bbəŋ bə́ shì bweenə nya, bə́ lɛ̀ɛ ə chə́ŋ yí bəne mə. Bə́ lèki lə yee bə́ shì həmə nya, bə́ dùh duhnə, bə́ yìi biwu ə bieŋ bi bəne mə, bə́ yɔ̀ɔ bieŋ bbɨŋ duŋ ə bə́ nakə yee bə́ yɔ̄ɔ kə. 14 Nəni n'yee ŋkēeh bəkwɛɛ bə bəŋkwu bbəŋ bə́ kaani hlɔŋ yikwɛ lə, bə́ gəŋ chu ə biah mə bə bənəə bədi, bwee bwɔni, yee bə́ fwôŋ chə́ŋ yibə, fo mbɛɛ nnu i dùŋ yo kə diee njənə lə nakə jaa bwo bwɔɔ nnu dɨŋ bihi yii liaa kə. 15 N'yɔ̄ɔ nəni yulahalə bəne bədi ə bə́ mə nyɔka je bwo chu wɛɛ wi Hlaata. 16 Ə kpɛ lə duŋ nnu i dùŋ mbɛɛ kimbemi, i kə̀nə bəkwɛɛ bə bəŋku ə kichəŋ kiih mə, yee i chɨ̂nə bə́, fo kimbumə ki bəne bə kimbemi lə nakə too ntiɛ ndili gbaaŋ, fo bə́ lə yee bə́ chɨ̄nə ə duŋ bəkwɛɛ bə bəŋkwu bbəŋ bə́ dùŋ bie mbɛɛ fwoŋ nə hləŋkə dududu.

Fieŋ ffɨŋ bəne bə kimbemi duŋ lə yee bə fə̄ bə bəche kintu

17 Bəche bikuu bə kimbumə ki bəne bə kimbemi bbəŋ bə́ nɨ̀ŋ kinwaakə duŋ lə yee bə́ nə̄ bə́ kiŋkohi bə bikoonə kinwaa gbaaŋ, gbɛntɛlɛ bə bbəŋ bə́ dòntə dəŋ die Chu baa laanə bəne. 18 Bə́ kənə bənnə nəni yulahalə Kiŋwaati ki Chu yɔ̀ɔ lə,

“Wə kə kwaa lə biwu bi nyaŋ bwɔɔ nnu i dìɛŋ gɨŋ ŋə bəjaa kə.”

Fi baa duŋ dəŋ lə, “Mbɛɛ nimi kənə bəŋkənə bikoonə biih.” 19 Mbɛɛ kə hlɔmɔ che kwoo ki kimbumə kidi bə wə, wə bu bemi bə wu kə, kahiŋ lə bəne bəfwe ləkə bətɔh bema kah bə nhlaa yo. 20 Ə lə duŋ bbəŋ bə́ bà bie bənfə yiwaha bə́ gə̀ŋ bə yí fwi fwi, wə chɔɔ bə bə́ ə bəne bənhliŋ dí, fo bbəŋ bə́ shee bie lə lɔ.

21 N'yɔ̄ɔ fɨhŋ bə wə ə Chu fwi bə Kleto Jisho maa bənchinda bə Chu bbəŋ i mà bwaa fwii lə, yee wə fə̂ fieŋ ffɨŋ n'yɔ̀ɔ fɨhŋ, wə kə yee wə fə̂ fieŋ ffɨŋ fi bwò bə kinfwɔɔnə kə, yee wə fə̂ fieŋ kə nyii lə kichili kə.

22 Wə kə yee wə kɨ̂kə bənchi kwáŋ ə mbɛɛ bəŋ lə yee i dūŋ che kwoo ki kimbumə ki bəne bə kimbemi kə. Wə kə yîi lə wə fo kwáŋ ə yíwaha yí mbɛɛ ju mə kə. Chi kwoo ko yee ki dùŋ wɛɛŋ.

23 Wə kə chu baa yee wə ŋwî ə duŋ ŋgwiŋ kwaa kə. Ŋwi dəŋ mbiŋ chɛɛ yu te lo, bə ye wə bà lə bəŋgɔŋ nəni. 24 Yíwaha yí bəne bədi nyiee gbaaŋ lə bə́ gbee nhlaa, yí bədi bwo yí jə bwɔɔ yí hlə nyiee. 25 Ə duŋ dəŋ yəəŋ ye fwɔ winwaa bwo li wi nyìee. Ə wi nakə kee lə bənyiee dəŋ, kəə duŋ ə wi yá ba ə nələ mə kə.