1 Timɔti 6

Nfwa nnu i dùŋ ŋwuŋ kimbemi yee i wō bə mbɛɛ nnu i kə̀nə wu

Bəne bənhliŋ bbəŋ bə́ dùŋ ntiɛɛ munfwa kwe duŋ lə yee bə́ nə̄ kiŋkohi ə jé yinhliŋ mə bə bəne bbəŋ bə́ kə̀nə bə́. Yee bə́ fə̂ nəni, fo bəne lə yee bə́ dūŋ kə yɔɔ lə díe yíwaha ə yii li Chu go maa kinlaanə kiaa go kə. 2 Bənfwa bbəŋ bikuu bibə duŋ bəne bə kimbemi kə yee bə́ jə̂ bə́ kwe kə, yulahalə bə́ bənhliŋ duŋ kimaani ə Kleto mə. Bə́ kənə ba bənɨŋ bə bə́ gbaaŋ kahiŋ lə, yulahalə bəne bbəŋ bə́ kə̀nə mbɨŋ nimi libə duŋ ə duŋ bəne bə kimbemi, bə́ lèki bə́ gbaaŋ.

Bəne bə laanənə bə yo kaalə bə kiŋkuntaŋ kintiiŋ

Yee wə lâanə bəne bieŋ bɨhŋ, wə kèeh bə́ lə yee bə́ fə̂ bi. 3 Ə mbɛɛ ju yee i lāanə kinlaanə kidi chili kkɨŋ ki dùŋ kə bemi bə kinlaanə kintiiŋ ki Baba ya Jisho Kleto maa kinlaanə kkɨŋ ki wùnə bə too wwuŋ Chu kìɛɛ, 4 kəə mbɛɛ yo kòhi ə duŋ gbo wiih nya, i kələ lə fieŋ kə. Mbini yo mbɛɛ gɔŋ jəŋ noonə maa bə kijə kitanə ki díe yyɨŋ yí bwò bə mɛɛ kiluhunə maa bikpənini, bəntɔnɔ, maa bəmbiilə mbɛɛ nnu i kə̀nə kinhle kiwaha, 5 maa bəŋkəh kijə ə bəne bbəŋ bufe bubə mà fiima, bə́ laala kichɛɛŋ. Bə́ fə̀ nəni, bə́ hlè lə fieŋ fi Chu duŋ ə duŋ je ji nni bə́ lə ko ə yi mə.

6 Kwaalə ə mbɛɛ lə duhŋ kinduŋh ye Chu kìɛɛ lə, i baa i wò njənjə bə fieŋ ffɨŋ i kə̀nə, kəə ə kiŋkuntaŋ ki kiŋaŋ ba, 7 yulahalə kkə mà bwo yaŋ ə mbiŋ nu mə kwáŋ ŋəŋɨmə, kkə yá chu dəŋ dɨŋ kwáŋ ŋəŋɨmə. 8 Nəni ə kkə kənə bieŋ bidinə bə bindu, kəə bimbini bie wuna be. 9 Kwaalə bəne bbəŋ bə́ kìɛɛ ə duŋ kiŋkuntaŋ bwò li bə́ lɛ̀ɛ ə bimɔŋnə mə, choo kwo bə́, bə́ hlə lɛɛ ə hlɔɔ bieŋ mə kiŋaaŋkə binfili bbɨŋ bi bwò bə bəŋgə. Bieŋ bɨhŋ duŋ bbɨŋ bi mìhi bəne ə bəŋgə mə ə duŋ bbɨŋ duŋ ə bi laa mbɛɛ ə laa mə. 10 Bieŋ biwaha chili chili binhliŋ mɛŋ ə kinleki ki kpo mə. Ə duŋ yu hlɔɔ ŋkuntaŋ nnu bəne kə̀nə ə kpo mə, nnu bəne bədi nyɔka ə je kimbemi kibə mə, bɛŋ tɔ́ŋ ŋəbə bə bieŋ binlo go kiŋaaŋkə.

11 Bə wə Timɔti, wə duŋ fo ŋwuŋ Chu. Yee wə lɔ̂ bieŋ bɨhŋ binhliŋ wə fo. Yee wə kêeh ə duŋ bəŋkənə fwɔ wintiiŋ maa fwɔ wwuŋ Chu lèki. Yee wə kə̂nə ə kimbemi ko go, wə kə̀nə kinleki, wə kwàa tɔŋ, wə kə̀nə dəŋ fwɔ wu shiiiŋ. 12 Yee wə jû nyɨmə yi kimbemi yinwaa. Yee wə lêmi ə kinduŋh ki kə kaa kkɨŋ bə́ diila wə lə wə lɛɛ ə ki mə, wə mà lema ə bəne fwi kiŋaaŋkə bbəŋ bə́ bèmi kah bə nhlaa wa, wə yɔ̀ɔ yəəŋ ki kimbemi ko.

13 Nhlə n'yee n'yɔ̄ɔ bə wə ə Chu fwi nnu i nə̀ yo kinduŋh bə bieŋ binhliŋ, maa ə Jisho Kleto fwi nnu i mà lema ə Pɔntiyu Paylɛt fwi yɔɔ fieŋ fi kiyəyəŋ bə kijə kiih ki kwoo kiih, 14 n'yee n'yɔ̄ɔ bə wə lə wə chi bəŋkɨnə bəhŋ, kə duŋ nə bə gii kə, fieŋ kə duŋ nə ffɨŋ mbɛɛ lə hlaa wə ki fi gəŋ bwii bwɔɔ nnu Baba ya Jisho Kleto yá bwo kə. 15 I yá gənə bwo ə duŋ ə bwɔɔ bəŋ yəəŋ, nnu ə nyii Chu nnu bə́ dòhi yo, ə kwaa wu nnu i hlàah bieŋ binhliŋ, i dùŋ Ŋkɨŋ bəŋkɨŋ maa Baba bəbaba. 16 Ə kwaa wu nnu i ya ba kə kpee, i dùŋ ə kinchaa mə kkɨŋ duŋ ə mbɛɛ nakə baha ə ki go kə. Mbɛɛ kə hlaa lə ŋəŋ ə wu go kə, duŋ dəŋ ə mbɛɛ ŋəŋ ə wu go kə. Kiŋkohi bə muŋga duŋ bə wu bwɔɔ mənhliŋ kə kaa. Yee fi Dûŋ lə.

17 Ə wɛɛ wi bəne bə bieŋ bə yaŋ mbiŋ nu mə, yɔɔ bə bə́ lə bə́ kə yee bə́ wê kə. Bə́ kə yîi lə bufe bubə ə bieŋ bbɨŋ duŋ ə bi yá bwo ka kə. Bə́ yii bufe ə duŋ ə Chu mə nnu i shòo yo bieŋ bu shoonə binhliŋ bə be lə yee kkə wō njənjə bə bi. 18 Yee bə́ fə̂ ə duŋ bieŋ binwaa, bieŋ bibə bbɨŋ bə́ kə̀nə duŋ ə duŋ bieŋ binwaa bbɨŋ bə́ fə̀. Bə́ wɛ̀ kwáŋ ŋəbə, bə́ nə̀ nnə́ kə hlee mweŋ. 19 Ni lə je nni duŋ ə yee bə́ chī mbuh go ŋəbə yu mbwaa ə bikuu bibə bəŋ ye kichili kintaabə lə, ə bə́ hlə kənə kinduŋh ə duŋ ba kinduŋh.

20 Timɔti, yee wə fwôŋ kwaa fieŋ ffɨŋ bə́ chiee ə kwáŋ ŋo mə. Ŋəŋ dəŋ lə yee wə gɛ̄hiŋ biyɔɔnə bbɨŋ bi dùŋ kə kənə fieŋ bənfə bə Chu, maa biyɔɔnə bi noonə bbɨŋ bəne hlè lə ə bi bufe. 21 Bəne bədi jaa yee bə́ kīɛɛ bəmbələ bieŋ bɨhŋ, bə́ hlə nyɔkɔ je ə wɛɛ wi kimbemi kibə mə. Baba nyii bəŋ bənhliŋ tɔŋ liih linwaa.