1 Timɔti 4

Ki bəne bə keehnə bə yo kaalənə

Fiana Wɛɛŋ yɔɔ ntiiŋ lə, ə bwɔɔ nnu dɨŋ bəŋ duŋ, ə bəne bədi tukwaŋ ə kimbemi kibə go yee bə wō bieŋ ə duŋ bə bəfiana bbəŋ bə́ fìhi bəne maa bilaanənə bi bənchinda bə bəcheh. 2 Bilaanənə bɨhŋ yáa bi bwō kah ə kwáŋ ŋə bəne bbəŋ bə́ jàa bə́ fìhi bəne, bə́ kaalə yó, bíwɛɛ bibə dùŋ biŋkpi ye bə́ tɔŋna lə bə choo kkɨŋ bə́ yiila hətaŋ. 3 Bə́ lə yee bə́ lōoŋkə lə bəne kə yee bə́ bāanə biah kə, maa dəŋ lə mbɛɛ kə diee dɨŋ bieŋ bidi kə. Ə duŋ Chu nnu i mà fə bieŋ bɨhŋ lə yee bəne dī, bəne bbəŋ bə́ kə̀nə kimbemi baa kələ kichɛɛŋ, bwɔɔ nnu bə́ dì, bə́ nə̀ kimbaafɛɛ bə Chu. 4 Fieŋ finhliŋ ffɨŋ Chu mà fəə duŋ finwaa, fidi hləŋ həmə ffɨŋ fi dùŋ lə yee mbɛɛ nɨ̄hŋ ə duŋ lə i jəə fi ə Chu kwáŋ bə kimbaafɛɛ, 5 yulahalə die Chu bə Chu cheenə fəə bieŋ chaa.

Mbɛɛ nimi Jisho Kleto nwaa

6 Ə wə nyii bieŋ bɨhŋ bə bəŋgwoŋ biaa, ə yee wə dūŋ mbɛɛ nimi Kleto Jisho nwaa nnu i kòhi gbo wiih bə die Chu nni i dùŋ ki kimbemi bə kinlaanə kinwaa kkɨŋ wə bə̀lə. 7 Wə kə kənə dəŋ fieŋ fi fənə bə biyɔɔnə bi woo woo binya bbɨŋ bi dùŋ kə kənə fieŋ bənfə bə Chu kə. Keeh gbo wo bənduŋ ə kinduŋh kkɨŋ Chu kìɛɛ mə. 8 Bənyini nyieenə kidi hlooli gbo kənə kwaa mbɨŋ ə mbɛɛ go. Kwaalə bənduŋ ə kinduŋh kkɨŋ Chu kiɛɛ mə kənə mbɨŋ ə mbɛɛ go ə jé yinhliŋ mə, yulahalə fɨhŋ kənə mbɨŋ ə kinduŋh ki fidiɛɛ mə, fi baa kənə ə kinduŋh kkɨŋ ki bwō kie mə. 9 Biyɔɔnə bɨhŋ duŋ ba chɛɛŋ, ə biyɔɔnə bbɨŋ bi wuna bbɨŋ duŋ ə mbɛɛ bemi bi kə naamə kə. 10 Ə fi ffɨŋ kkə nɨ̀ŋ bigəə ə nimi lɨhŋ mə, yulahalə kkə yiila bufe bwaa bunhliŋ ə Chu nnu i kə̀nə yo kinduŋh mə. Chu duŋ Nchuu Fwoo bəne bənhliŋ, gbɛntɛlɛ bə bəne bbəŋ bə́ bèmi bə wu kibɛɛ.

11 Yee wə lâanə bəne bieŋ bɨhŋ, wə yɔ̀ɔ bə́ fə̀ bi. 12 Wə kə tookwaŋ lə mbɛɛ yee i jə̂ wə kwe yu wə kaani hlɔŋ kə. Yee wə dûŋ kinyii bə bəne bə kimbemi ə je nni wə yɔ̀ɔ ye mə bə fwɔ wo, maa kinleki kkɨŋ wə kə̀nə, maa tɔŋ llɨŋ wə yìi ə Chu mə, bə ə je nni wə chì ye gbo wo mə wi duŋ wɛɛŋ. 13 Nə gbo wo bənchee Kiŋwaati ki Chu bə bəne bə kimbemi wɛɛŋ, wə dòntə dəŋ die Chu, wə làanə dəŋ bə́ gəŋ bwii bwɔɔ nnu n'yá mbwo. 14 Wə kə jɨŋnə nnə lo kə. Nnə lɨhŋ duŋ llɨŋ bə́ mà nəə bə wə bwɔɔ nnu kintu ki bəche bikuu bi kimbumə ki bəne bə kimbemi mà chi kwáŋ ŋəbə ə wə bəŋ, die bəne bə hlɨŋ Chu bwo ə wə mə. 15 Nə gbo wo bə bieŋ bɨhŋ, yee wə fə̂ bi binhliŋ, ə bəne bənhliŋ yee bə́ ŋə̄ŋ ye wə gə̄ŋ fwi fwi. 16 Yee wə jə̂ bwɔɔ bə gbo wo maa bə kinlaanə ko. Yee wə kə̂nə mu ntakə, fo ye wə fələ nəni, ə yee wə fwōo gbo wo, fwoo dəŋ maa bəne bbəŋ bə́ wò fieŋ ffɨŋ wə yɔ̀ɔ.