Ye fwɔ wi bəche kwoo ki kimbumə ki bəne bə kimbemi kənə bənduŋ
3
Biyɔɔnə bidi bie həmə bbɨŋ bi duŋ ba chɛɛŋ. Biyɔɔnə bi duŋ lə: Ə mbɛɛ lə chi tɔŋ liih lə i yu kiɛɛ kiŋkaa bənduŋ che kwoo ki kimbumə, kəə i kiɛɛ ə duŋ nimi llɨŋ li kə̀nə kiŋkohi. 2 Che kwoo ki kimbumə ki bəne bə kimbemi kənə bənduŋ mbɛɛ nnu i dùŋ kə kənə fieŋ ffɨŋ bə́ lə yee bə́ kɔ̄ŋ wu ə fi go kə. I kənə bənduŋ nyimi kpɛ mwi, i kə yee i fə̂ bieŋ woo woo kə, yee i hlê bieŋ kinwaa, i kə̀nə kimbwɔkwe, i tɨ̀ŋ i jə̀ bəne bə kpuuni ə wu chəŋ, i kə̀lə bəŋkeeh bəne. 3 I kənə bənduŋ mbɛɛ nnu i dùŋ kə ŋwee mbihŋ mə kwò wu kə. I kənə bənduŋ shiiiŋ bə bəne i kə chɔɔ lə kə, i kə kpənə kpənənə kə, i kə yii lə tɔŋ ə kpo mə kə. 4 I kənə bənduŋ mbɛɛ nnu i kə̀nə bənfwoŋ chəŋ yi kinwaakə, i fə̀ bwɔni biih wò wu ə fieŋ finhliŋ mə, bə́ bwɔ̀kwe bə wu. 5 Ə mbɛɛ lə nakə yee i kə̄lə bənfwoŋ chəŋ yi kinwaa, mə lə kah ləhəŋ hlə yee i fwōŋ kimbumə ki bəne bə Chu lə? 6 I kə duŋ nə mbɛɛ nnu i kaani i fii tɔŋ liih bemi bə Jisho, nnu duŋ ə i ja ə bwɔɔ ju bəŋ chɔɔ bəŋ'we, lɛɛ ə ŋgə mə ye fiŋkwini lə. 7 I kənə dəŋ lə yee i dūŋ mbɛɛ nnu bəne bə bweenə ŋə̀ŋ dəŋ lə i yo mbɛɛ kiyəyəŋ. Ə nakə duŋ nə nəni, ə i ja nə gbo wiih giaali gbe ə choo ki fiŋkwini mə.Ye fwɔ wi bəne bbəŋ bə́ chɨ̀nə bənɨŋ nimi ə bəne bə kimbumə mə, duŋ lə yee wi dūŋ
8 Bəne bbəŋ bə́ chɨ̀nə bənɨŋ ə bəne bə kimbumə ki bəne bə kimbemi mə kənə dəŋ bənduŋ bəne bbəŋ bə́ kə̀nə fwɔ wu kiyəyəŋ. Bə́ kə duŋ nə bəne bbəŋ bə́ yɔ̀ɔ die fie fie, ə kə duŋ nə bəne bbəŋ bə́ nə̀ go ŋəbə ə biŋwinə mə gbaaŋ, bə́ kə duŋ nə bəne bbəŋ bə́ bə̀lə mbɨŋ nya kə. 9 Bə́ kənə bəŋkənə fieŋ fi nələnə ffɨŋ Chu nyiila bə be ki kimbemi, fieŋ kə hlaa lə bə́ ə bíwɛɛ bibə go. 10 Bəmbwo yii bə́ ə nimi mə, duŋ lə bə hlaa mɔŋ ŋəŋ foo bə́ nyɔɔŋ. Ə bə́ nyii tɔ lə bə́ lə bə gbenə kə, bə́ hlə yii bə́ yee bə́ dūŋ bəne bbəŋ bə́ chɨ̀nə bənɨŋ nimi ə kimbumə ki bəne bə kimbemi mə. 11 Bəkwɛɛ bəbə kənə bənduŋ dəŋ bbəŋ bə́ dùŋ bə fwɔ wintiiŋ, bə́ kə duŋ nə bə duhnə kə. Bə́ kə fəə bieŋ woo woo kə. Bə́ kənə bənlemi ə fieŋ fi kichɛɛŋ bəŋ finhliŋ. 12 Mbɛɛ nnu i chɨ̀nə bənɨŋ nimi ə kimbumə mə kənə bənduŋ nyimi kpɛ mwi. I kənə dəŋ bəŋkənə bwɔni biih bə wu chəŋ kinwaakə. 13 Bəne bbəŋ bə́ chɨ̀nə bənɨŋ ə kimbumə mə, bwɔɔ nnu bə́ nɨŋ kinwaakə, bə́ kə̀nə yii linwaa ə bə́ go, bə́ kə kənə dəŋ naamənə kiŋaaŋkə bə tɔ́ŋ llɨŋ bə́ yiila le ə Kleto Jisho mə kə.
Fieŋ ffɨŋ fi ko gbaaŋ ffɨŋ fi dùŋ ə kimbemi kiaa mə
14 Ŋŋəŋ lə ə she bwɔɔ chɛɛ ə mbwo ŋŋəŋ wə. Kwaalə mbieŋna bieŋ bɨhŋ bə wə yulahalə, 15 ə nlə nja n'yee ŋkɛ̄hiŋ bwɔɔ, ə yee wə kə̄lə ye bəne duŋ lə yee bə́ fə̄ bieŋ ə chəŋ Chu mə, nni i duŋ kimbumə ki bəne bə Chu nnu i kə̀nə yo kinduŋh. Kimbumə kɨhŋ duŋ wooli bə kichili kkɨŋ ki kə̀nə kichɛɛŋ. 16 Fieŋ fie həmə ffɨŋ fi ko gbaaŋ. Fieŋ fɨhŋ duŋ ffɨŋ fi mà hlaala duŋ ə nələ mə ki kimbemi kiaa kkɨŋ kkə yɔ̀ɔ kie, Chu fəə dəŋ kkə kələ. Fieŋ fɨhŋ duŋ lə:
I mà nyiila gbo wiih ə nyaŋ mbɛɛ ŋkee go.
Fiana Wɛɛŋ mà nyiila mbɛɛ nnu i dùŋ yo.
Bənchinda bə Chu mà ŋəŋna ə wu go.
Bə́ mà donta kiih ə bitɨŋ mə.
Bəne mà yiila tɔ́ŋ ə wu mə mbiŋ mənhliŋ.
Bə́ mà jəə wu i biŋ buh ə dɔhɔ ki kiŋkuntaŋ mə.