1 Timɔti 2

Keehnə ki Chu cheenə

Fieŋ fi fwii ffɨŋ nnoŋ hlə duŋ lə, yee bəne chêe Chu bə bəne bənhliŋ. Yee bə́ chêe Chu bə́ dè bə Chu, baa noŋ Chu ə bəne bədi bəŋ, yee bə́ nə̂ dəŋ kimbaafɛɛ bə wu. 2 Yee bə́ chêe Chu bə bəŋkɨŋ maa bə bəne bənhliŋ bbəŋ bə́ dùŋ ə biŋkaa biŋkuntaŋ bəŋ. Yee bə́ chêe Chu nəni fo kkə lə yee kkə dūŋh ə kinduŋh kində go mə, maa bə ki bəne bə Chu maa bə kkɨŋ ki kə̀nə kiŋkohi ə jə́ yinhliŋ mə. 3 Bənchee Chu nəni lə fieŋ finwaa, ə duŋ fi ffɨŋ fi wùnə ə Chu fwi nnu i dùŋ Nchuu Fwoo ya, 4 yu i kiɛɛ lə mbɛɛ mənhliŋ yá bwo fukwoo maa lə mbɛɛ mənhliŋ kələ kichɛɛŋ. 5 Chu duŋ kwaa mwi, mbɛɛ nnu i dùŋ hənte bə Chu bə bəne duŋ kwaa dəŋ mwi. Mbɛɛ nu lə Kleto Jisho. 6 Ə wu nnu i mà nə gbo wiih winhliŋ yah bəne bənhliŋ ə ŋgə mə. Fɨhŋ lə fieŋ ffɨŋ Chu mà nyii bwɔɔ nnu bwɔɔ yo yəəŋ mà bwo wunə. 7 Ə yu fieŋ fɨhŋ ffɨŋ Chu mà shaa mi maa nhlə n'yee ndūŋ mbɛɛ dontənə maa mbɛɛ hlɨŋ Jisho, maa lə n'yee ndūŋ mbɛɛ keehnə bəne bbəŋ bə́ dùŋ kə duŋ nə Bəjuu. Fi mà duŋ bəŋkeeh bə́ lə bə́ yii tɔ́ŋ ə Kleto mə, ŋkèeh dəŋ bə́ kichɛɛŋ. Fieŋ ffɨŋ n'yɔ̄ɔ fɨhŋ kə duŋ nə yo kaalənə kə, n'yɔ̄ɔ ə duŋ kichɛɛŋ.

8 Nhlə n'yee ŋkīɛɛ lə yee bənəə chēe Chu ə bidɔhɔ binhliŋ mə, bə́ tùuli ə duŋ kwáŋ ŋə wɛɛŋ buh, kə fwoolə tɔ́ŋ ləkə kə kpənə kpənənə kə. 9 Ŋkiɛɛ dəŋ lə yee bəkwɛɛ dɔ̂hiŋ bindu ə jé yinwaa mə yyɨŋ yí nyìi kinyohi, maa yyɨŋ bəne ŋə̀ŋ lə ə yinwaa yé. Bə́ kə yee bə́ lô bifwee ləkə dɔhiŋ bieŋ bbɨŋ bə́ fə̀ bə chwaa ki kpo ki ge, ləkə díi ŋə munchɨŋ, ləkə bindu bintachuŋ. 10 Yee bə́ dɔ̂hiŋ go ŋəbə ə duŋ bə fwɔ winwaa ye bəkwɛɛ bbəŋ bə́ ŋə̀ŋ lə bə́ yii bwɔ̀kwe bə Chu. 11 Kpɛ kənə bənnə gbo wiih winhliŋ bəŋ'wələ keehnə bu wələnə, i dùŋ kijə ki maalə. 12 Ŋkə nnəə je lə yee kpɛ laanə bənəə ləkə lə yee i kə̄nə muŋgeni ə bənəə bəŋ kə. I kənə bənduŋ kijə ki maalə. 13 Yee fi dûŋ lə yulahalə ə Adaŋ nnu Chu mà hlaa fə, i hlə fə If. 14 Ə mà kə duŋ nə Adaŋ nnu Hlaata mà fihi kə. Ə màa kpɛ nnu bə́ mà fihi, i bwuŋ ŋkɨnə Chu. 15 Maa ye fi duŋ lə nəni, Chu yá fwoo kpɛ kah ə kimbwee mə. Fɨhŋ nini yá duŋ ə mə lə ba bən'yii tɔŋ liih ə Chu mə, i kə̀nə kinleki, i kə̀nə fwɔ wi wɛɛŋ, maa wwuŋ wi kə̀nə kimbwɔkwe.