1 Timɔti 1

Kiŋwaati ki fwii kkɨŋ Pwɔɔ mà bieŋ bə

Timɔti

Ə mi Pwɔɔ, nduŋ mbɛɛ faŋnə Kleto Jisho ye Chu nnu i dùŋ yo Nchuu Fwoo ya bə Kleto Jisho nnu kkə yìi yo bufe ə wu mə mà yɔɔlə lə n'yee ndūŋ.

2 Mbīeŋ kiŋwaati kɨhŋ bə wə Timɔti nnu wə duŋ yo ŋiaa kichɛɛŋ ə kimbemi mə.

Chu Tah bə Kleto Jisho Baba ya, i nyii wə tɔŋ linwaa, kwo hlɨŋ bə wə, nə wə kindunshiiŋ.

Yee Timɔti lôoŋkə bikeehnə bi yo kaalənə

3 Ye mmà ŋkwilə kwáŋ bə wə bwɔɔ nnu mmàa ŋgə̄ŋ ə Meshedonia lə wə she yee wə dūŋ ə Ɛfɛshu. Mbaa ŋkwī kwáŋ lə yee wə dūŋ kwaa həmə fo wə lə yee wə lōoŋkə bəne bbəŋ bə́ làanə bie dɨŋ binlaanə bidi chili chili. 4 Yee wə lôoŋkə dəŋ lə bə́ kə yee bə́ jə̂ bwɔɔ bə́, bə́ kɛ̀hiŋ ə duŋ ə cháh yí yo kaalənə go maa ə yíi ŋə bəche bichəŋ bi bəne bbɨŋ bə́ jəə bwɔɔ bə́ fà. Dɨŋ bɨhŋ bieŋ bwò kwaa bə noonə, ə kə duŋ nə bə nimi li Chu llɨŋ li bə̀lə kimbemi kə. 5 Ŋgɨŋ keehnə kɨhŋ duŋ bənfə lə bəne yee bə́ kə̄nə kinleki kkɨŋ ki fù ə tɔ́ŋ ŋə wɛɛŋ go bə ŋŋəŋ ŋə fù ə tɔ́ŋ li mbɛɛ llɨŋ i fə̀ fieŋ fidi ffɨŋ fi lə yee fi dūŋ kə hlaah lə wu maa llɨŋ li fù ə tɔŋ li kichɛɛŋ go llɨŋ mbɛɛ yiila ə Chu mə. 6 Bəne bədi mà shee je ni yee bə́ bə̄lə ə duŋ biyɔɔnə binya. 7 Bə́ kìɛɛ lə yee bə́ dūŋ bəne bbəŋ bə́ kèeh bəne bəŋkɨnə bə Chu, kwaalə bə́ kə kələ dəŋ fieŋ ffɨŋ bə́ yɔ̀ɔ fie ki fi kə, ləkə kinuu ki fieŋ ffɨŋ bə́ dɨ̀ɨmə fie ə fi go kə.

8 Kkə kələ lə ŋkɨnə Chu lə fieŋ finwaa, ə mbɛɛ lə jə ŋkɨnə yo ə je nwaa mə nni i duŋ lə yee i jə̄. 9 Kkə kələ dəŋ lə bə́ mà kə chiee ŋkɨnə yu bəne bə ntiiŋ kwaa kə. Bə́ mà chi ə duŋ yu bəne bbəŋ bə́ bwùŋ bəŋkɨnə bə bbəŋ bə́ tà bikuu, maa bə bbəŋ bə́ nɨ̀hŋ Chu, bə bbəŋ bə́ fə̀ yíwaha, bə bbəŋ bə́ dùŋ kə chaalə, bə bbəŋ bə́ nyɛ̀hiŋ bieŋ bbɨŋ bi dùŋ ki Chu, bə bbəŋ bə́ jìi bətili ləkə bəmahni bəbə, maa bə bbəŋ bə́ jìi bəne bədi. 10 Fi duŋ dəŋ yu bəkwɛɛ bə bənəə bbəŋ bə́ waali kiwaali, maa bə bənəə bbəŋ bə́ nɔ̀ŋ bə bədi. Fi duŋ dəŋ bə bəne bbəŋ bə́ yì bəne bə́ gə̀ŋ bə bə́, bəne bbəŋ bə́ yɔ̀ɔ bieŋ woo woo, maa bəne bbəŋ bə́ dùŋ lə yɔɔ kichɛɛŋ, bə́ kaka kaalə ə duŋ yo. Ə duŋ dəŋ bə́ bbəŋ bə́ fə̀ maa fieŋ fi laha ffɨŋ fi dùŋ kə bələ keehnə kintiiŋ. 11 Keehnə kɨhŋ bə̀lə hlɨŋ nwaa ŋkuntaŋ nni i dùŋ Chu nnu bə́ kòhi yo, hlɨŋ ye duŋ nni bə́ mà nə ə mi kwáŋ.

Pwɔɔ nə kimbaafɛɛ bə Baba yu hlɨŋ yi kwonə yyɨŋ i mà nyii bə wu

12 Nnə kimbaafɛɛ bə Kleto Jisho Baba ya nnu i nəə yo mi muŋgeni bənɨŋ nimi liih. I mà chiina ŋəŋ lə ŋwuna, i hlə bwa mi nlə n'yee nnɨ̄ŋ. 13 Maa ye mmà nhlaalə duŋ fwi n'yɔ̀ɔ die waha ə wu go, mbɛ̀ŋ kinjɔŋ ə bəne biih dɨŋ, ntò bə́, kwaalə i kwo hlɨŋ bə mi yulahalə mmàa nfə̄ ə jɨbə mə ŋkə kənə kimbemi kə. 14 Baba ya mà ŋoŋna bu ŋoŋnə tɔŋ liih linwaa ə mi go gbaaŋ, i fə n'yee ŋkə̄nə kimbemi bə kinleki ye mbɛɛ nnu i buma bə Kleto Jisho bà lə bəŋkənə. 15 Biyɔɔnə bɨhŋ lə, Kleto Jisho mà bwoo yaŋ kwe lə i bwo fwoo bəne bəwaha lə chɛɛŋ. Ə biyɔɔnə bbɨŋ bi wuna bbɨŋ mbɛɛ duŋ ə i bemi kiɛkiɛ kə naamə kə. Mi kibɛɛ nduŋ ba ŋkɨŋ yiwaha. 16 Kwaalə, Baba kwoo hlɨŋ bə mi, fo Jisho Kleto lə nyii gbo wiih ə mi go, mi nnu nduŋ yo ba ŋkɨŋ yiwaha, hlɨŋ yiih yyɨŋ i kwò ye bə bəne gəŋna tɨŋ həŋgbɔŋ. Ndùŋ nəni ye kinfɛhiŋ bə bəne bbəŋ bə́ bèmi bə wu bəmbwo kənə kinduŋh ki kə kaa. 17 Chu duŋ Ŋkɨŋ nnu i hlàah bwɔɔ mənhliŋ kə kaa, duŋ ə i kpe kə, duŋ ə yee bə́ ŋə̄ŋ ə wu go kə. Ə ba kwaa wu nnu i dùŋ Chu. Yee kkə fâŋ wu kiŋkohi, kkə nə̀ kiŋkuntaŋ bə wu bwɔɔ mənhliŋ. Yee fi Dûŋ lə.

Nimi llɨŋ Timɔti lə yee i nɨ̄ŋ

18 Timɔti ŋiaa, n'yu nnə̄ biyɔɔnə bɨhŋ ə wə kwáŋ, bi bə̀lə ə duŋ ki bieŋ bbɨŋ bəne yɔ̀ɔ ko ye bəne bbəŋ bə́ dòntə hlɨŋ Chu, fo bi lə yee bi chɨ̄nə wə ə wə tɨmə ntɨmə nwaa. 19 Yee wə lêmi kwaa ə kimbemi ko mə, wə wə̀lə kwaa fieŋ fintiiŋ ffɨŋ biwɛɛ bwo yɔ̀ɔ wə. Bəne bədi mà tookwaŋ bəŋ'wələ bə fieŋ ffɨŋ bíwɛɛ bibə yɔ̀ɔ bə́, bə́ hlə gbe ə kimbemi kibə mə ye chəŋ nni njɔ lə, bwɔɔ nnu i hlaamə. 20 Kintu kibə duŋ Hameneyu bə Alekshanda. Nnəə bə́ ə kwáŋ ŋə Hlaata mə, fo bufe bubə lə kwələ, ə bə́ maalə biwu bə yii li Chu llɨŋ bə́ bìhi le.