1 Teshalonika 4

Fwɔ wwuŋ Chu leki

Bəŋkaanə bəŋgwoŋ biaa, kkə bie kkə kɔ̄nɔ bəŋ kkə kwì kwáŋ bu kwinə ye bəne bbəŋ bə́ buma ə Baba Jisho mə, lə ye bə mà laanə lə bə be ye bə kənə lə bənduŋ ye Chu leki lə, ə duŋ kwaa ye bə duŋ lə fidiɛɛ, yee bə fə kwaa lə, bə gəŋ fwi fwi. 2 Bə yii kə̀lə ba keehnə kkɨŋ kkə mà nə bəŋ bə muŋgeni mu Baba Jisho. 3 Fieŋ ffɨŋ Chu kìɛɛ duŋ lə, yee bə dûŋ ba wɛɛŋ. Bə kə yee bə wâali kə. 4 Mbɛɛ mənhliŋ ə bəŋ mə duŋ lə yee i kə̂lə bəŋkənə gbo wiih ə jé yí wɛɛŋ mə yyɨŋ yí duŋ bə kiŋkohi.^ª 5 Gbo wi mbɛɛ kə yee wi shî bu shinə, ye wi ŋwuŋ woo kitɨŋ nnu i dùŋ kə kələ Chu kə. 6 Mbɛɛ kə yee i fə̂ yiwaha ləkə fihi maani ə diɛɛnə kɨhŋ mə. Kkə mà yɔɔla looŋkə ba bəŋ ə kaani lə Baba yá yi lɛɛ ŋgə ə bəne bbəŋ bə́ fə̀ bieŋ bɨhŋ binhliŋ. 7 Yee bə kə̂lə lə, Chu mà kə chee lə be lə yee kkə dūŋ ə fwɔ wi yili mə kə. I mà chee be lə yee kkə dûŋ ə fwɔ wi wɛɛŋ mə. 8 Fi hlə yee fi dūŋ lə, maa nyəhə nnu i nɨ̀hŋ bəŋ'wo keehnə kɨhŋ, kəə i kə nɨhŋnə bəŋ'wo ə duŋ bə mbɛɛ ŋkee kə. I nɨhŋna bəŋ'wo ə duŋ bə Chu nnu i nə̀ yo bəŋ Fiana wi Kiwɛɛŋ.

9 Kwaalə, ki kinleki kkɨŋ bə kənə lə yee bə kə̄nə bə bəmwaa bieeŋ bə kimbemi, kinhle kidi hləŋ kkɨŋ duŋ ə yee kkə bīeŋ ki fimbini fie bə bəŋ. Fɨhŋ lə fieŋ ffɨŋ Chu kibɛɛ mà laana bəŋ ye duŋ ə yee bə lêki go ŋieeŋ. 10 Bə kichɛɛŋ, bə bie bə lēki ba bəmwaa bieeŋ bənhliŋ bbəŋ bə́ dùŋ ə bidi bi Meshedonia mə. Bəŋgwoŋ biaa, kwaalə kkə bie kkə baa kkə kɔ̄nɔ bəŋ lə yee bə fə̂ kwaa nəni bə gə̀ŋ fwi fwi. 11 Kinhle kieeŋ gbaaŋ yee ki dûŋ ə duŋ lə, yee bə dûŋ bə kindunshiiŋ, bə kə yee bə yîi biwu ə bieŋ bi bəne mə kə. Yee bə nɨ̂ŋ bə kwáŋ ŋieeŋ ye kkə mà keeh'lə bəŋ. 12 Nəni ə bəne bə bweenə hlə yee bə́ nə̄ kiŋkohi bə bəŋ, ə bə nakə yee bə yiimə ə mbɛɛ ju go kə.

Ki bwɔɔ nnu Baba yá baa fiimə bwo

13 Bəŋgwoŋ biaa, kkə yaa kiɛɛ lə yee bə tâ maah ki bəne bəŋkpi kə. Kkə kiɛɛ lə bə kələ yulahalə, bə yá kə duŋ jùu jùu ye bəne bbəŋ bə́ dùŋ lə kə kee lə fwi ki yinwaa yyɨŋ yi yá duŋ ye. 14 Kkə bema lə Jisho mà kpee, i fu ə kpe mə, ə dəŋ yəəŋ ye Chu yá bwo li chuu bə Jisho maa bə bəne bbəŋ bə́ màa bə kpē bbəŋ bə duŋ buhuŋ bə wu. 15 Kkə yɔ̀ɔ fɨhŋ kkə bə̀lə biyɔɔnə bi Baba lə, be bbəŋ kkə she bie ə dɨŋ bbəŋ kkə kaani bie kkə duŋ həmə bəŋkee bwɔɔ nnu Baba yáa i bwō, duŋ ə kkə yá hlaa gəŋ fwi bə bəne bbəŋ bə́ mà kpe bie ba kə. 16 Yee bə kə̂lə lə Baba kibɛɛ yáa i hlīli ə bu, i dìimə bə die ntaabə, ŋkafwi bənchinda bə Chu wìli dəŋ, kiŋgbu ki Chu dè. Ə bəne bbəŋ bə́ mà chu kpe bie bə́ duŋ ə Kleto mə yá hlaa fu. 17 Ə bwɔɔ yo bəŋ, ə be bəŋkee bbəŋ kkə mà she bie, ə kkə ya bumə bə bə́ ə joonə mə bəŋgəŋ bənə bə Baba ə fuu mə. Ə kkə hlə yee kkə dūŋ bə Baba bwɔɔ mənhliŋ. 18 Nəni yee bə dîɛɛ tɔ́ŋ li mbɛɛ bə mbɛɛ bə díe ni.