1 Teshalonika 5

Ye duŋ ə mbɛɛ yee i kē mbwo Baba

Bəŋgwoŋ biaa, mbɨŋ ju hləŋ bə bəŋ nnu duŋ lə kkə bieŋ ki bwɔɔ wo ləkə butuu bu bwonə bu Baba. 2 Bəŋ kibɛɛ kələ kinwaa lə butuu bu bwonə bu Baba yá duŋ ye ŋwuŋ buyi bwolə ə butuu. 3 Bwɔɔ nnu bəne yáa bə́ yɔ̄ɔ lə, “Kindunshiiŋ kie, ə duŋ fieŋ fidi hləŋkə ffɨŋ mbɛɛ lə yee i lɔ̄,” ə ŋgə hlə ja gənə gbe ə bə́ go ye te bwolə li kwo kpɛ bwɔɔ nnu i duŋ bə te, ə je lələnə nakə duŋ nə kə. 4 Kwaalə bəŋgwoŋ biaa, bə duŋ nə ŋkwo weŋ ə jɨbə mə ye duŋ ə butuu bwe ja buhla bwo ə bəŋ mə ye ŋwuŋ buyi lə kə. 5 N'yɔ̄ɔ nəni yulahalə bəŋ bənhliŋ dùŋ bəne bə kinchaa, bə duŋ bəne bbəŋ bə́ fə̀ bieŋ bushi. Kkə duŋ nə bəne bbəŋ bə́ fə̀ bieŋ ə butuu ləkə ə jɨbə mə kə. 6 Nəni, kkə kə yee kkə nɔ̂ŋ kinɨŋ ye bəne bədi nɔŋ lə kə. Yee kkə dûŋ fa bə bufe bwaa bunhliŋ. 7 Bəne bbəŋ bə́ bà bənɔŋ kinɨŋ, nɔ̀ŋ ə duŋ ə butuu, bəne bbəŋ mbihŋ chɨ̀ŋ bə́, chɨ̀ŋ ə duŋ ə butuu. 8 Kwaalə ye kkə duŋ lə ŋkwo ya ə duŋ bəne bbəŋ bə fə̀ bieŋ ə bushi, yee kkə dûŋ bə bufe bwaa bunhliŋ. Kkə jə kimbemi bə kinleki yee ki dûŋ ye kinchaah ki ntɨmə lə, kkɨŋ kkə kəəla bəkɔŋ biaa mu, baa jə ŋkee nnu kkə kèe fwi bəmbwo kənə kinfukwoo, ki duŋ ye kiŋkɔkɔ ki ntɨmə lə, kkɨŋ kkə bɛŋna. 9 Yee bə kə̂lə lə Chu mà yaa shaa be chi lə i ya nyii be ə duŋ tɔŋ liih llɨŋ li fwèe kə. I mà shaa be lə kkə kənə ə duŋ kinfukwoo kkɨŋ ki kàh ə Baba ya Jisho Kleto go. 10 Jisho Kleto duŋ nnu i mà kpe yo yu be, ə kkə dūŋ bəŋkee lee, ləkə bəŋkpi lee, ə yee kkə dūŋ kwaa bə wu. 11 Nəni, yee bə tâhi gbo wi bə mbɛɛ bə mbɛɛ, yee bə wɛɛ dəŋ mbɛɛ bə mbɛɛ lə yee bə́ kô dəŋ ye bə bie bə fə̄lə nəni.

Keehnə ki həŋgbɔŋ bə Chu cheenə

12 Bəŋgwoŋ biaa, kkə kɔ̄nɔ bəŋ bu kɔnɔnə lə, yee bə bwɔ̂kwe bə bəne bbəŋ bə́ nɨ̀ŋ ə bəŋ mə, bə́ fwòŋ bəŋ ə diɛɛnə ki Baba baa keeh bəŋ. 13 Yee bə nyîi kiŋkohi bə bə́ kinwaa ə kinleki mə yu nimi libə. Yee bə dûŋ dəŋ bə kindunshiiŋ ə go ŋieeŋ mə. 14 Kkə baa noŋ dəŋ bəŋ bəŋgwoŋ biaa lə, yee bə kêeh bəne bbəŋ bə́ shì nya, bə tàhi go ŋə bəne bbəŋ bə́ kə̀nə nɨŋ. Bə chɨ̀nə dəŋ bəne bəmbiaŋ, yee bə kwâa tɔ́ŋ bə bəne bənhliŋ. 15 Yee bə jə̂ bwɔɔ lə, mbɛɛ kə chuulə yiwaha bə yiwaha kə. Yee bə kə̂nə ŋgɨŋ bwɔɔ mənhliŋ bənfə ə duŋ bieŋ binwaa bə go ŋieeŋ bə bəne bənhliŋ. 16 Yee bə dûŋ bə kintɨŋ bwɔɔ mənhliŋ, 17 bə chèe Chu bwɔɔ mənhliŋ, 18 bə nə̀ kimbaafɛɛ bə Chu ə fieŋ finhliŋ mə ffɨŋ fi duŋna. Fɨhŋ lə fieŋ ffɨŋ Chu kiɛɛ bə bəŋ bbəŋ bə́ dùŋ ə Kleto Jisho mə. 19 Bə kə yee bə́ nyɛ̂hiŋ nimi li Fiana Wɛɛŋ kə. 20 Bə kə nyɛ̀hiŋ biyɔɔnə bbɨŋ bəne bə hlɨŋ Chu kèeh kə. 21 Yee bə fwîilə bieŋ binhliŋ, bə jə̀ binwaa bie bə lèmi ə bi bəŋ, 22 yee bə fwôo kwáŋ ŋieeŋ ə bieŋ biwaha mə binhliŋ.

23 Kkə noŋ lə Chu kibɛɛ nnu i dùŋ yo Chu kindunshiiŋ, lə i fə lə yee bə chāa ə fieŋ finhliŋ mə gəŋ gbee. I chi fiana weŋ bə tɔ́ŋ ŋieeŋ maa go ŋieeŋ lə ŋə yá kə duŋ nə bə yili bwɔɔ nnu Baba ya Jisho Kleto yá bwo. 24 Wu Chu nnu i mà chee yo bəŋ, i lemi ba ə die yi bəŋ, i yá yi fə lə.

25 Bəŋgwoŋ biaa, yee bə chêe Chu bə be.

26 Bə chee bəŋgwoŋ biaa bənhliŋ, yohi yohinə ki bəne bə Chu.

27 N'yɔ̄ɔ bə bəŋ ŋkaŋ ə Baba fwi lə, bə chee kiŋwaati kɨhŋ bə bəŋgwoŋ biaa bənhliŋ bə́ wo.

28 Yee kinleki ki Baba ya Jisho Kleto yee ki dûŋ bə bəŋ.