1 Teshalonika 3

Nəni ye kkə mà ŋəŋ lə lə fi kaah be bəŋ bənduŋ bəŋ hləŋ, kkə hlə hle lə, kkə she dɨŋ ə Ateŋ be be, 2 hlə faŋ ŋgwoŋ ya Timɔti, nnu kkə nɨ̀ŋ bə Chu bəndontə hlɨŋ nwaa ki Kleto. Kkə mà faŋ lə i bwo noo bəŋ fa lɛhiŋ tɔŋ ŋieeŋ ə kimbemi kieeŋ mə, 3 lə bəŋgə bəhŋ kə nɛhiŋ mbɛɛ ju ə bəŋ mə kə. Bəŋ kibɛɛ yii kə̀lə lə bəŋgə chu duŋ fieŋ fiaa. 4 Bə kə̀lə dəŋ lə bwɔɔ nnu kkə mà duŋ bə bəŋ, kkə mà yɔɔla bə bəŋ ə kaani lə kkə bie kkə wo bəŋgə. Fi bwoo fu dəŋ lə yəəŋ ye fi duŋna lə, ə duŋ bə kələ. 5 Fɨhŋ lə fieŋ ffɨŋ fi mà fə nhlə ŋŋəŋ lə fi kaah bəŋ, nhlə nfaŋ Timɔti fo nlə ŋkələ ye kimbemi kieeŋ duŋ, yulahalə nɨŋ maa i kwō mi lə ləkə mbɛɛ nnu i mɔ̀ŋ yo bəne hə mɔŋna dəŋ bəŋ, fə nimi linhliŋ llɨŋ kkə nɨŋna le bə bəŋ chu linya.

Timɔti nə hlɨŋ kimbemi ki bəne bə Teshalonika

6 Kwaalə fidiɛɛ, Timɔti hə bwoo ə bəŋ mə fiimə chu dɨŋ ə be go, bwo yɔɔ hlɨŋ nwaa ki tɔ́ŋ ŋŋəŋ ŋə bə yiila ə Kleto mə, bə ye bə nyìi kinleki bə bəne. Mə hlə yɔɔ dəŋ ye bə hlè be gbaaŋ, bə kə̀nə dəŋ ŋgɨŋ bəŋəŋ ə be go, ye kkə kənə lə dəŋ ŋgɨŋ bəŋəŋ ə bəŋ go. 7 Yu fɨhŋ bəŋgwoŋ biaa, maa dəŋ ye kkə duŋ lə ə kinlogo mə bə ə bəŋgə mə, tɔ́ŋ dəə be gbaaŋ yu tɔ́ŋ ŋŋəŋ bə yiila ŋie ə Kleto mə. 8 Fidiɛɛ fuu tima ə be go yu bə lema ba ntakə ə Baba go. 9 Nəni yee kkə nə̂ kimbaafɛɛ bə Chu gbaaŋ yu bəŋ. Kkə nə̀ kimbaafɛɛ bə Chu yu njənjə nnu kkə wò wu fwi yu bəŋ. 10 Kkə chèe Chu bə tɔ́ŋ ŋiaa ŋənhliŋ butuu bə bushi lə duŋ ə kkə baa ŋəŋ ə bəŋ go dii bə dii fo kkə lə nə bəŋ fieŋ ffɨŋ bə jɨnə ə kimbemi kieeŋ mə.

11 Kkə chèe Chu lə Chu nnu i dùŋ yo Chu Tah ya kibɛɛ bə Baba ya Jisho wɛ je bə be lə kkə bwo ə bəŋ go. 12 Kkə chèe Chu dəŋ lə Baba fə kinleki kieeŋ ko gəŋ fwi fwi, yee bə lêki go ŋieeŋ bə bəne bənhliŋ yəəŋ ye kkə lèki lə bəŋ. 13 Kkə chèe Chu nəni fo mə lə fə tɔ́ŋ ŋieeŋ yee ŋə tā, ə yee bə dūŋ gbenə hləŋ, bə dùŋ wɛɛŋ ə Chu Tah ya fwi bwɔɔ nnu Baba ya Jisho yá bwo bə bəne bənhliŋ bbəŋ bə́ dùŋ biih.